NEHEMÍAS 13
13
Alita ruranajuchunmi, Nehemiasca mushujyachishca
1Chai punllapica, Moisés escribishca librotami tucui gentecuna uyajta leyirca. Chai libropica, cashna nishcatami tarirca: Moabita nishca, amonita nishca gentecunaca, Taita Dios agllashcacuna tandanajushcapica, napacha tandanajui ushangachu. 2Paicunaca, israelcunataca na tandahuan, yacuhuan tuparingapaj llujshircachu. Ashtahuangarin israelcunata ninanda nalicachijuchunmi, Balaam shuti runaman culquita cunajurca. Shina cajpipash ñucanchi Taita Diosca, nalicachishpa rimagrijujtaca, bendiciana shimicunatami rimachirca. 3Shina mandashcata uyashpami, israelcunahuan chapurishca shuj llactamanda shamushcacunataca shicanyachirca. 4Nara chashna rurajpica, Eliasib shuti curami, ñucanchi Taita Diospaj huasi ucucunapi mandajurca. Paica, Tobías runapaj familia purami tucushca carca. 5Shina cashpami, shuj jatun ucuta rurachishca carca. Chai ucupimi pundaca, Diosman imatalla cushcacunata, inciensota, imatalla charishcacunata, trigota, vinota, aceiteta, chungamanda shujguta cushcacunatapash alichin cashca carca. Chai alichishcacunataca levitacunaman, candajcunaman, pungucunapi cuidajcunaman, curacunaman cuchunmi mandashca carca. 6Eliasib shuti cura chashna rurajpica, ñucapash na Jerusalenbichu carcani. Ashtahuangarin jatun mandaj Artajerjes shuti runa, quimsa chunga ishcai huatata Babilonia llactata ña mandajui punllacunapica, paita servingapajmi tigrarcani. Chaipi cashpami huaquin punllacuna jipaca, jatun mandajtaca: “Cutinllata tigrashpa cachahuai” nircami. 7Jerusalenman tigrangapajmi, chashna nircani. Jerusalenman ña chayamushpami Eliasib shuti runaca, Tobías runata llaquishpa, Diospaj huasi patiocunapi shuj ucuta rurachishpa nalita rurashcata ricurcani. 8Chaita ricushpa ninanda llaquirishpami, Tobías runa tucui imatalla charishcacunata, chai ucumanda llujchishpa canllaman shitarcani. 9Shina rurashca jipami, chai ucumandaca tucui mapata anchuchinajuchun mandarcani. Shina rurashpami, Taita Diospaj huasipi imata charishcacunata, Diosman carashcacunata, inciensotaca, chai ucupillata cutin churachunmi mandarcani.
10Shinallata levitacunaman carana micunatapash, na caranajurcachu. Chaimandami levitacuna, candajcuna, Diospaj huasipi servijcunaca, paicunapaj alpamanllata pacajushpa rishca carca. 11Chaita ricushpami, mandajcunataca: “¿Imashpata Taita Diospaj huasitaca, cashna jichushpa saquishca?” nishpa shinllita rimarcani. Chai jipami curacunata, levitacunata tandachishpaca, paicuna punda ruranajushca pushtupillata cutin churarcani. 12Chai jipami, Judá llactapi causajcunaca trigota, vinota, aceiteta, chungamanda shujguta cushcacunataca alichina ucucunaman apamunajurca. 13Paicunapaj mayordomocuna cachunga, Selemías shuti curata, escribishpa causaj Sadoc shuti runatami churarcani. Levita puramandaca, Pedaías shuti runatami churarcani. Paicunata ayudachunga, Zacur shuti runapaj churi Hanán shuti runatami churarcani. Zacur shuti runaca, Matanías runapaj churimi carca. Paicunaca, Diosta ali cazuj, imatapash pactachij runacunami carca. Paicunami, caishuj cumbacunamambash chaupishpa cuna carca. 14Ñuca Taita Dioslla, cashna aliguta rurashcamandaca, ñucata yarihuayari. Shina yarishpaca, can Taita Diospaj huasipi ima tiajcunatapash alichishpa canda servinajuchun juyaihuan ñuca rurashcataca, ama cungapanguichu.
15Chai punllacunallatami, Judá llactapica, samana punllacunapi huaquingunataca, uvasta cutana pushtucunapi uvasta sarunajujta ricurcani. Shinallata granocunata ashtanajujta, vinota, uvasta, jigosta, tucui imatalla aparinacunataca, burrocunaman apachinajujtami ricurcani. Shina apachishpami samana punllacunapipash, Jerusalenman apamunajurca. Chai apamushcacunata samana punllapi jatunajujcunataca, shinllitami tacurircani. 16Shinallata Jerusalenbica, Tiro shuti pueblomanda shamujcunapashmi tiarca. Paicunaca pijicunata, tucui shuj jatunacunatapashmi apamunajurca. Chaicunataca, samana punllacunapimi, Judá llactapi causajcunaman Jerusalenbi jatunajurca. 17Chaita ricushpami, Judá llactapi causajcunata mandajcunataca, cashna nishpa jarcashpa rimarcani: “Samana punllata chashna yangapi churashpaca, jatun nalitami ruranajunguichi. 18¿Nachu cangunapaj ñaupa taitacunapash, shinallata nalita ruranajurca? ¿Nachu chaimanda Taita Diosca ñucanchi jahuapi, cai pueblo jahuapi ninan llaquita cachamurca? ¿Cangunapashchu samana punllata yangapi churashpa, israelcunata llaquichijuchun Diosta ashtahuan fiñachinguichi?” nircanimi.
19Samana punllapaj shuj punllalla tiajpimi, Jerusalén pungucunata ña amsayamujujpi cashna tucurca: Ñucallatami cashna nishpa mandarcani: “Jerusalén pungucunata vichashpaca, samana punlla cayandi chishicaman na pascanachu canguichi” nircanimi. Samana punllapica, aparishca quipicunahuan pipash ama yaicumuchun nishpami, ñucapaj huaquin servijcunata pungucunapi cuidachun churarcani. 20Chaimandami imatapash randishpa jatujcuna, tucui imacunatalla jatujcunaca pundapash, cutin jipamambash Jerusalenmanda canllaman shuyanajurca. 21Paicunataca cashna nishpami, shinlli tacurircani: “Cangunaca, ¿imashpata cai pirca huashapillata shuyanajunguichi? Cutin caipillata ricushpaca, ñuca maquihuambachami llaquichisha” nircanimi. Chashna tacurishcamandami, samana punllapica, cutinga na shamunajurca. 22Chai jipami levitacunataca, Diospajlla tucushpa pungucunapi cuidaj shamuchun mandarcani. Shinallata samana punllacunatapash, Diospajlla shicanyachishca punllacuna cachunmi mandarcani.
Taita Dioslla, ñuca cashna rurashcata yaripangui. Canga, ninanda llaquij cashcashnallata, ñuca nalita rurashcataca cungapangui.
23Shinallata chai punllacunapica, Judá llactapi causajcunataca, Asdod shuti pueblopi causajpura, amonita, moabita huarmicunahuan cazarashcatami ricurcani. 24Chaimandami, paicunapaj huahuacunamanda shuj chaupica, Asdod pueblopi causajcunapaj rimaita rimanajurca. Paicunaca, Judá llacta rimaitaca, na rimai usharcachu. Ashtahuangarin chaipi causanajuj tucui gentecunapaj rimaitami rimanajurca. 25Paicunata shinllita rimashpami, ima llaquipash japishpaca alichari canman nircani. Huaquingunataca, macashpa chugrichishpami, ajchata llujchircani. Chai jipami, cashna nishpa juramentuchircani: “Cangunapaj ushicunataca, paicunapaj churicunahuanga na cazarachinachu canguichi. Shinallata cangunapaj churicunapaj huarmicuna cachumbash, cangunapajllata huarmicuna cachumbash, paicunapaj ushicunataca na japinachu canguichi. 26Israel llactata jatun mandaj Salomombash, ¿nachu chaimandallata juchata rurarca? Paica, shuj llactacunata jatun mandajcunata ashtahuan yali ali mandajmi carca. Taita Dios juyashcapashmi carca. Paitaca, tucui israelcunata jatun mandaj cachunmi, Taita Diosca churarca. Chashna cajpipash shuj llactamanda huarmicunami, paitaca juchata rurachirca. 27¿Cai tucui jatun nalita rurangapajchu, cangunata cazuna canchi? ¿Shuj llactamanda huarmicunahuan cazarashpachu, yachashca jahua na cazushpa, ñucanchi Taita Diosta fiñachina canchi?” nircanimi.
28Shinallata Joiada shuti runapaj churicunamanda shuj churimi, horonita nishcapura Sanbalat shuti runapaj ushita cazarashca carca. Joiada shuti runaca, curacunata mandaj Eliasib shuti curapaj churimi carca. Shina cazarashcamandami, Sanbalat shuti runapaj mashataca, ñuca ñaupajmanda llujchishpa cacharcani. 29Ñuca Taita Dioslla, curacunapash, levitacunapash ari ninajushcata cungashpa, mapayashcamandaca paicunata llaquichinata yaripairi.
30Shuj llactamanda shamushcacunata anchuchishpami curacunata, levitacunataca, paicuna puralla tandachishpa, paicuna servinajushca pushtupillata cutin churarcani. 31Ima horas Diosman carana yamdatapash, punda fucushca granotapash alichinajuchunmi churarcani. Ñuca Taita Dioslla, ñuca chashna rurashcamandaca, ñucamambash aliguta ruranata yarihuayari.
Currently Selected:
NEHEMÍAS 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.