ESTER 2
2
Jatun mandajpaj huarmi cachunmi, Esterta agllashca
1Chashna tucushca jipami, jatun mandaj Asuero shuti runaca, chai fiñarishcata ña yalichishca cashpa, Vasti shuti paipaj huarmi imata rurashcatapash yarijurca. Chai huarmita imashna llaquichinata mandashcatapashmi yarijurca. 2Chaimandami, paipaj huasipi servijcunaca, cashna ninajurca:
—Jatun mandajpaca, jarihuan nara tacarishca chairalla viñai, ali ñavi cuitsacunata mascachun. 3Can jatun mandajca, can mandajuj tucui llactacunapimi, jarihuan nara tacarishca, chairalla viñai ali ñavi tucui cuitsacunata apamuchun, shuj runacunata churana cangui. Chai runacunami, can jatun mandaj causajuj Susa shuti pueblopi cambaj huarmicuna tiana huasiman apamunga. Chaipica chai cuitsacunataca, can jatun mandajpaj huarmicunata cuidaj Hegai shuti eunuco runami cuidashpa, juyailla churajunacunahuan alichinga. 4Jarihuan nara tacarishca maijan cuitsagupash, jatun mandajpaj ñaupajpi ali ricurijpica, paimi Vasti huarmipaj randica, mandaj tucunga— ninajurcami.
Chai nishcacunaca ali uyarijpimi, jatun mandajca chashna rurarca.
5Jatun mandaj causajuj Susa shuti pueblopimi, Judá llactamanda Mardoqueo shuti runa causajurca. Paica, Jair shuti runapaj churimi carca. Jair shuti runaca, Simei shuti runapaj churimi carca. Simei shuti runaca, Cis shuti runapaj mirai, Benjamín aillu purallatami carca. 6Mardoqueo runaca, Judá llactata jatun mandaj Jeconías shuti runahuan, Jerusalenmanda prezu apai tucushca purami carca. Paicunataca, Babilonia llactata jatun mandaj Nabucodonosor runami, prezu apashca carca. 7Mardoqueo runaca, Hadasa nishca Ester shuti paipaj tiopaj ushitami, taita mama illaj cajpi viñachirca. Chairalla viñai chai cuitsaguca ali ñavi, juyaillagumi carca. Esterpaj taitapash, mamapash huañujpimi Mardoqueo runaca, quiquin ushigutashnalla japishpa viñachirca. 8Shuj punllami, cashna tucurca: Jatun mandaj mandashcata escribichishca shimicuna tucuilla llactacunapi uyarijpica, jatun mandaj causajuj Susa shuti pueblopimi, jarihuan nara tacarishca ashtaca cuitsacunata tandachirca. Paicunataca, Hegai shuti runami cuidajurca. Estertapashmi, huarmicunata cuidaj Hegai shuti runa cuidachun, jatun mandajpaj huasiman aparca. 9Jarihuan nara tacarishca Ester cuitsaguca, Hegai shuti runapaj ñaupajpi aligu ricurijpimi, ninanda alicachishpa juyailla churajunacunahuan, paitara ucha alichishpa, micunatapash cararca. Shinallata paita ricuchunga, jarihuan nara tacarishca ashtahuan ali yachaj canchis cuitsacunatapashmi, jatun mandajpaj huasimanda curca. Estertaca, jarihuan nara tacarishca paipaj cuitsacunandimi, jatun mandajpaj huarmicuna causana ashtahuan ali huasiman pusharca.
10Esterca, maijan llactamanda, maijan familia puramanda cashcatapash na villarcachu. Mardoqueo runami, ama villanguichu nishpa mandashca carca. 11Ester imashna cajta, shinallata imashna charinajujta yachangapajmi Mardoqueo runaca, huarmicunapaj huasi patio ñaupajpi, punllandi purijun carca.
12Chai tucuilla huarmicunatami, mandashcapi nijushcashnallata paicuna juyailla tucuchunga, shuj huatacaman alichina carca. Punda sucta quillataca, mirra nishca aceitehuan, shuj sucta quillataca, mishquillagu ashnajuj jambicunahuan, huarmicuna churarina mishquillagu ashnajuj jambicunahuambashmi alichina carca. Shuj huatata chashna alichishca jipaca, jatun mandaj Asuero shuti runapaj ñaupajman shamuna punlla chayajpimi, jarihuan nara tacarishca cuitsacunaca, shuj shuj shamushpa ricurina carca. 13Chashnami, jarihuan nara tacarishca maijan cuitsa cashpapash, jatun mandajpaj ñaupajman shamuna carca. Chai cuitsa alichiringapaj imata mañajpipash, tucuita cunllami carca. Chaicunata churajushpa alichirishpami, huarmicuna tiana huasimandaca, jatun mandajpaj huasicaman shamuna carca. 14Chai cuitsa chishi shamushpaca, cayandi tutamandami, jatun mandajpaj caishuj huarmicuna tianajuj caishuj huasiman tigran carca. Chaipica, Saasgaz shuti eunuco runami cuidajun carca. Chai cuitsaca, na ashtahuan jatun mandajpajman shamui ushanachu carca. Maijan shamuchun munashpapash, jatun mandaj shutipi cayajpillami, shamuna carca.
15Esterca, Mardoqueo runapaj tío Abihail shuti runapaj ushimi carca. Mardoqueo runami, paipaj ushigutashna viñachirca. Esterca, jatun mandajpajman ña rina chayajpica, imatapash na ruranachu carca. Jatun mandajpaj huarmicunata cuidaj Hegai shuti eunuco runa mandashcatallami rurana carca. Esterca, tucui paita ricujcunapaca, ashtahuan aligumi ricurijurca. 16Jatun mandaj Asuero shuti runaca, ñami canchis huatacunata mandajurca. Tebet shuti chunga quillapimi Esterca, jatun mandajpajman pushai tucurca. 17Jatun mandajca, tucui huarmicunamanda ashtahuan yalimi Estertaca juyarca. Esterca, jarihuan nara tacarishca tucui cuitsacunamanda yali aligumi, paipaj ñaupajpica ricurirca. Chaimandami, jatun mandajcunapaj coronata paipaj umapi churachishpa paitaca, Vasti shuti huarmipaj randi jatun mandaj cachun churarca. 18Chai jipaca jatun mandajca, pai churashca tucui mandajcunamambash, paita servij runacunamambashmi, Esterta alicachishpa jatun micuita rurarca. Shinallata llactacunapi causajcunapaj impuestotapash ashatallami japichun mandarca. Jatun mandajcuna na mitsashpa caranshnallatami, ashtaca caranacunata carajurca.
Jatun mandajta huañuchingapaj pacalla parlanajujtami, Mardoqueo runaca villashca
19Jarihuan nara tacarishca cuitsacunata cutin tandachinajujpimi Mardoqueo runaca, jatun mandajpaj huasi pungupi tiajurca. 20Esterca, Mardoqueo runa mandashcashnallatami, maijan llactamanda cashcatapash, maijan familiapura cashcatapash na villarca. Esterca, Mardoqueo runa alita yachachijpi imashna yachajushcashnallatami rurajurca. 21Chai punllacunami, jatun mandajpaj pungupi cuidaj Bigtán shuti, Teres shuti eunuco runacuna ninanda fiñarishpa parlanajujta Mardoqueo runaca, jatun mandajpaj huasi pungupi tiajushpa uyarca. Paicunaca, jatun mandaj Asuero shuti runata huañuchingapajmi yarinajurca. 22Mardoqueo runa chaita yachashpami, jatun mandaj Esterman villarca. Chaitaca, Mardoqueo runami villan nishpami Esterca, jatun mandaj Asuero shuti runaman villarca. 23Shina villashcata callarishpa tapuchijpimi, chaica chashnapacha cashca ricurirca. Chaimandami, chai ishcai eunuco runacunaca, huarcushpa sipinapi huarcui tucurca. Chashna tucushcataca, jatun mandaj imatalla rurashcata escribishca libropimi escribishpa saquirca.
Currently Selected:
ESTER 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.