LAMENTACIONES 5
5
Llaquita apaj gentecunami, Diosta mañashca
1Mandaj Dioslla, ñucanchi llaquichi tucushcataca yaripairi.
Ñucanchita nalicachishpa rimanajujtaca ricupairi.
2Ñucanchi alpacunaca, na rijsishca gentecunapajmanmi yalishca.
Ñucanchi huasicunapash, shuj llactamanda shamushca gentecunapajmanmi yalishca.
3Taita illaj, jichushca huahuacunamari canchi.
Ñucanchi mamacunapash, sapalla huarmicunashnami.
4Ñucanchi yacutallatami, culquipaj ufianchi.
Ñucanchi yamdatallatami randinchi.
5Ñucanchitaca catiriashpami, ninanda llaquichinajun.
Samanatapash na charishpami, shaijushpalla causanajunchi.
6Micushpa vijsa pactangapajpash, Egipto llactamanda, Asiria llactamanda gentecunatami, maquita vichai churashpa mañanajunchi.
7Juchata ruraj ñucanchi taitacunaca, ñamari huañushca.
Paicunamandaca, ñucanchimari llaquita apanajunchi.
8Servijcunarami ñucanchitaca mandanajurca.
Paicunapaj maquimanda cacharichijca, pipash na tiarcachu.
9Ñucanchi micunataca, jichushca pambapi espadahuan huañuchi tucunalla cashpapashmi, apamun carcanchi.
10Ñucanchi aicha carapash, yarjaimanda rupajunshna tucushpami, jornoshna yanayarca.
11Sion pueblopi causaj huarmicunata, Judá llactapi tiaj pueblocunapi causaj, jarihuan nara tacarishca cuitsacunataca, munai na munaimi llaquichinajurca.
12Mandajcunataca, maquipi huatashpami huarcunajurca.
Rucu taitacunatapash na cazushpami, ñavi ñavi rimanajurca.
13Chairalla viñaicunataca, cutachunmi apanajurca.
Huambracunapash yamdata apachijpimi, shaijushpa ña huañungashna tucunajurca.
14Pueblo pungucunapica mandaj rucucunapash, ña na ricurinllu.
Chairalla viñaicunapash, paicuna candanajushcataca saquircami.
15Ñucanchi shungupi cushijunaca tucurircami.
Ñucanchi danzanaca, ninan llaquimanmi tigrarca.
16Ñucanchi umamanda coronapashmi urmarca.
¡Cunanga, aij ñucanchilla!
Juchata rurashcamandami, cashna llaquipi canchi.
17Chaimandami ñucanchi shungupica, llaquilla causanajunchi.
Chaimandami ñucanchi ñavicunaca, amsayashcashna causanajunchi.
18Sion urcuta llaquinayaita tucuchishcamandami, chashna causanajunchi.
Añascunallami chaitaca purinajun.
19Mandaj Dioslla, ashtahuangarin canga, causaita causaicamanmi causajungui.
Can mandashpa tiajunaca, mirai miraicamanmi canga.
20¿Imamandata ñucanchitaca, cungaitapacha cungarcangui?
¿Imamandata cai tucui huatacunata jichushpa saquingui?
21Mandaj Dioslla, ñucanchitaca cambajman tigrachihuayari, ñucanchica tigraripashunllamari.
Ñucanchi punllacunataca, callaripishnallata mushujyachipairi.
22Ñucanchitaca shitashpami saquishcangui.
Ñucanchihuanga ninandapachami fiñarishcangui.
Currently Selected:
LAMENTACIONES 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.