LAMENTACIONES 4
4
Siondaca llaquichishpami tucuchishca
1¡Oropash llaquinayaitamari yanayashca!
¡Ali oropaj punchapambapash, llaquinayaitamari chingashca!
Diospaj huasi rumicunapash, tucui ñan cruzarijuj tigranacunapimi, caita chaita shitashca sirinajun.
2Sionbi causajcunaca, ashtahuan ali orotapash yali munashca, juyashcamari carca.
Shina cashpapash, ¡llaquinayaitamari mangata ruraj runa rurashca alpa mangashna tucushca!
3Chacal nishca animalcunapashmi, paicunapaj huahuacunaman chuchuchinajun.
Ashtahuangarin ñuca llacta huarmicunaca, jichushca pambapi causaj avestruz nishca animalcunashnami, paicunapaj huahuacunataca na llaquin.
4Chuchujuj huahuapaj jalluca, yacunayachishpa chaquishpami, shimi ucu jahuaman llutarirca.
Huahuacuna micunata mañanajujpi, paicunaman chaupishpa carangapaca, pipash na tiarcachu.
5Ali micunatalla micujcunapash ñangunapimi, llaquinayaita yarjaimanda huañunajurca.
Juyailla churajunata churajushpa viñashcacunapash, huanuta shitanacunapimi siririnajurca.
6Ñuca llactapi causajcuna nalita rurashcacunaca, Sodoma pueblopi causajcunapaj juchatapash yalimi ashtahuan mirarca.
Chai puebloca, napash pipash macanajungapaj shayarijpitami, ñapash tucuchi tucurca.
7Alicachi tucushca paita mandajcunaca, imahuambash na mapayashca rasushnami carca.
Lechetapash yali yurajcuna, coral nishcatapash yali pucacunami carca.
Paicunaca, zafiro nishca rumita yali juyaillagumi carca.
8Cunanga, tutatapash yali yanacunami ricurinajun.
Ñangunapi purinajujpipash, paicunataca pipash na rijsinllu.
Paicunapaj carapash tullupi llutarishpami, caspishna chaquishca.
9Espadahuan huañuchi tucushcacunami, yarjaimanda huañushcacunahuan ricujpica, ashtahuan ali carca.
Paicunaca, alpapi ima granocunapash na fucujpimi, yarjaimanda asha asha huañunajurca.
10Ninanda llaquij huarmicunapash, paicunapaj huahuacunatallatami quiquin maquihuan yanunajurca.
Ñuca llactapi causajcunata ninanda llaquichijui punllapica, quiquin huahuacunatallatami micunajurca.
11Mandaj Diosca, pai fiñarishcataca pactachircami.
Nina japirinshna pai fiñarishcataca, talinshnami cachamurca.
Chashna cachamushpa, Sionbi ninata japichishpami, callari rumicunacaman rupachirca.
12Cai pachapi jatun mandajcuna, tucui cai pachapi causajcunapash, Jerusalén pueblo pungucunata fiñashpa na ricunayachijcuna yaicumunataca,
yaritallapash na yarinajurcachu.
13Paicunaman villajcuna juchacunata rurashcamanda, paicunapaj curacunapash ninan nalicunata rurashcamandami, chashna tucunga.
Paicunaca, imatapash cashcatapacha rurajcunatami, Jerusalén chaupipillata huañuchishpa, yahuarta jichanajurca.
14Ñangunapipash, ñausacunashnami maitapash purinajurca.
Yahuarhuan mapayashcacuna cajpimi, paicunapaj churajunacunataca pipash na tacari ushanajurca.
15Paicunataca: “¡Anchurichi, mapa runacuna anchurichi!
¡Anchurichi, na tacarinachu canguichi!” nishpami caparinajurca.
Paicunaca pacajushpa rishpami, caita chaita rinajurca.
Shuj llacta puracunapica:
“Ima horapash na ashtahuan caipi causanajungachu” ninajurcami.
16Mandaj Diosmi, fiñashpa anchuchirca.
Paicunataca, na ashtahuan ricungachu.
Curacunapaj ñaupajpipash na cazunajurcachu, rucugucunatapash na llaquinajurcachu.
17Ñucanchita ayudaj shamuchun, yangamanda chaparianajujpimi, ñucanchi ñavicunapash shaijurca.
Napash quishpichi ushaj llactatarami, ñucanchica yariashpa shuyanajurcanchi.
18Ñucanchi ñangunata ama purichunga, ñucanchi yalinapi chapashpami japinajurca.
Ñucanchi tucurinaca chayamujunmi.
Ñucanchi tucurina chayamujpimi, ñucanchi tucurina punllacunaca pactarca.
19Ñucanchita japingapaj catijcunaca, jahuata rij jatun angacunatapash yali ñapash calpajcunami carca.
Urcucunata catishpa rishpami, jichushca pambapi pacalla chapanajurca.
20Ñucanchiman causaita cuj samaica, Mandaj Dios agllashca jatun mandajmi.
Ñucanchica: “Shuj llactacunapaj chaupipi cashpapash, pai llandujpimi causashun” nijmi carcanchi.
Ashtahuangarin paipashmi, lazuhuan japi tucurca.
21Uz shuti llactapi causaj Edom runacunalla, cushijushpa asinajuichilla.
Cangunapajpash, copamanda ufianaca chayangami.
Cangunapash machashpami, shungu tigrachinguichi.
22Sion pueblopi causajcunalla, cangunata llaquichinaca ña pactamushcami.
Cangunataca, ima horapash na ashtahuan prezu cachangachu.
Edom llactapi causajcunalla, canguna nalita rurashcallatami llaquichinga, cambaj juchacunaca ricuringami.
Currently Selected:
LAMENTACIONES 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.