OSEAS 13
13
Efraín aillutaca, tucuillatapacha tucuchinatami villashca
1Efraín aillutaca, rimajta uyashpallatami manllanajurca. Paicunaca, Israel llactapica, alicachi tucushcami carca. Ashtahuangarin, Baal shuti diosta mañashpa, juchata rurashcamandami huañurca. 2Cunanga, paicuna yachashcashnallatami culquita yacuyachishpa, imamambash rijchaj dioscunata, yanga dioscunata rurashpa, juchata ashtahuan mirachinajurca. Chai jipami, gentecunataca cashna ninajurca: “Cai dioscunamanmi, animalcunata cushpa huañuchina canguichi. Cai shicu dioscunatami muchana canguichi” ninajurcami. 3Chaimandami, tutamanda fuyu ricurishpa chinganshna, tutamanda urmashca jamzi paramu chaquinshna, trillana pambamanda jupata acapana apajpi chinganshna, huasimanda llujshijuj cushni chinganshna chinganga.
4Ashtahuangarin ñucami, Egipto llactamanda llujchimushca punllamandapacha, cangunata Mandaj Taita Dios cani. Ñucamanda ashtahuan shuj diostaca, na charinachu canguichi. Shuj quishpichijtapash, na charinachu canguichi. Ashtahuangarin ñucatallami rijsina canguichi. 5Ñucaca, chaquishca jichushca pambapimi cangunataca rijsircani.
6Paicunapaj pambamanda na munajta micushpa vijsa pactashca cashpami, paicunapaj shungupica jariyashpa, ñucataca cunganajurca. 7Shinamandami paicunapaca, leonshna casha. Leopardoshnami, ñambi pacalla chapashpa llaquichisha. 8Huahuacunata chingachishpa, fiñarishca purijuj mama ososhnami, israelcunata tarishpaca, shunguta llujchishpa shitasha. Paicunataca, millai león micunshnami, chaipillata ñutushpa tucuchisha. Paicunataca, sacha animalcunami ñutunga. 9Israelcunalla, cangunaca chingashcamari carcanguichi. Ashtahuangarin ñucallami, cangunataca ayudai ushani. 10Cangunaca: “Jatun mandajtapash, shuj mandajcunatapash cuhuai” nishpami mañarcanguichi. Cunanga, cangunapaj pueblocunandi, cangunandi cuidangapaca, ¿canguna mañashca chai jatun mandajca maipitayari? ¿Cangunapaj juezcunapash maipitayari? 11Ñuca ninandapacha fiñarishpami, jatun mandajtaca cangunaman curcani. Chai mandajtaca, cangunallata ñucata fiñachijpimi quichurcani.
12Efraín aillu nalita rurashcapash, huatashcami tiajun. Paicunapaj juchapash, alichishcami tiajun. 13Nanaicunaca, huahuata ungugrijuj huarmitashnami japinga. Unguna punlla pactajpi, maita llujshinatapash na yachaj, juizu illaj huahuashnami canga. 14Paicunataca, Seolman rinamandapash quishpichishami, huañunamandapash llujchishami. Huañui, ñucami canda huañuchij casha. Seol, ñucami canda tucuchij casha. Ñuca ñavimandaca, llaquinapash pacajungami. 15Huauqui purapi, Efrainbaj aillu ninanda mirajujpipash, Mandaj Dios cachamushca rupajlla huairami tucuchij shamunga. Jichushca pambamanda rupajlla huaira shamushpami, paicunapaj llujshijuj yacutaca chaquichinga. Paicunapaj pugyumanda yacupashmi tucuringa. Shinallata paicuna imata charishca munanayai juyaillacunatapash, paimi quichushpa apanga.
16Samaria pueblopi causajcunaca, paicunapaj Taita Diosta na cazushcamandami, llaquinayaita tucuchi tucunga. Paicunaca, espadahuanmi huañuchi tucunajunga. Paicunapaj huahuacunatapash, maipipash cachun shitashpami huañuchinajunga, vijsayu huarmicunatapash vijsatami liquinajunga.
Currently Selected:
OSEAS 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.