ESTER 3
3
Amán runaca, Judá llactamanda gentecunata tucuchingapajmi munashca
1Chashna tucushca jipacunami, jatun mandaj Asuero shuti runaca, Agag shuti runapaj mirai Hamedata shuti runapaj churi, Amán shuti runata alicachishpa, tucui mandajcunata mandaj cachun churarca. 2Jatun mandaj mandana huasi pungupi cuidaj tucui servijcunaca, Amán shuti runapaj ñaupajpi cungurishpami, urai cumurinajurca. Chaitaca, jatun mandajllatami chashna mandashca carca. Ashtahuangarin Mardoqueo runaca na cungurinllu carca, pingai tucushpapash na urai cumurinllu carca.
3Chaimandami jatun mandajta servishpa, pungupi cuidajcunaca: “¿Imashpata jatun mandaj mandashcataca na cazungui?” nishpa, Mardoqueotaca tapunajurca. 4Punllandi paicuna chashna ninajujpipash, Mardoqueo runa na cazujpimi, cashna tucurca: Mardoqueo runaca, Judá llactamandami cani nishpa ñami villashca carca. Chaimandami, pai nishcashnallata napachachu cungurin yashpa, Amán shuti runaman villanajurca. 5Amán shuti runaca, paipaj ñaupajpi na cungurijta, na urai cumurijta ricushpami, Mardoqueo runataca ninandapacha fiñarca. 6Shina cajpipash Mardoqueo runatalla llaquichingapaca, na munarcachu. Maijan familia puramanda Mardoqueo runa cajtapash, ñami villashca carca. Chaimandami Amán shuti runaca, jatun mandaj Asuero mandajuj llactacunapi causanajuj, Judá llactamanda gentecunatapash Mardoqueo runapaj purataca, tucuillata huañuchinata yarijurca.
7Nisán shuti callari quillapi, jatun mandaj Asuero shuti runa chunga ishcai huatata ña mandajujpimi, Pur nishca suerteta ruranajurca. Chaitaca, Judá llacta gentecunata ima punlla, ima quilla, ima huata huañuchinata yachangapajmi, Amán shuti runapaj ñaupajpi suerteta ruranajurca. Chai suerteca, Adar shuti chunga ishcai quillapimi urmarca. 8Shinamandami Amán shuti runaca, jatun mandaj Asuerotaca, cashna nijurca:
—Can mandajuj tucuilla llactacunapi causaj puracunapica, caipi chaipi, shican shican causaj gentecunami tian. Paicunapaj mandashcahuan ricujpica, tucui shuj gentecunapaj mandashcamandaca shujpachami. Chaimandami, can jatun mandaj mandashcataca na cazunajun. Paicunata causanajuchun saquishpaca, can jatun mandajca ima alitapash na japinguichu. 9Can jatun mandajpaj ali cajpica, tucuicunata tucuchinajuchun mandashpa escribichipairi. Shina rurajpica, cambaj jazinda huasipi culquita alichijcunamanmi, can jatun mandajpaj culquita alichina huasipi alichinajuchun, sucta huaranga pusaj patsaj quintalta pezaj culquita cusha— nijurcami.
10Shina nijpimi jatun mandajca, paipaj maquipi churajushca surtijasta llujchishpa, Judá llacta gentecunata fiñaj, Agag shuti runapaj mirai Hamedata shuti runapaj churi Amán shuti runaman curca.
11Paitaca cashnami nirca:
—Ñucaman cusha nijushca culquitaca, canllata japilla. Shinallata gentecunatapash, imata rurashpa cambi ali cana cajpipash ruranguilla— nircami.
12Shina nijpimi, huata callari quillapaj, chai huatapajllata chunga quimsa punllapica, jatun mandajpaj escribijcunata Amán shuti runaca cayarca. Jatun mandaj churashca sátrapa nishca mandajcunata, tucui llactacunapi soldadocunata mandajcunata, tucui gentecunata mandajcunata Amán shuti runa mandashcashnallatami, tucui llactacunapi escribinata yachanshnallata, tucui gentecunapaj rimaipi escribichirca. Jatun mandaj Asuero shuti runapaj shutipi escribishpami, jatun mandajpaj surtijashuanllata sellashca carca. 13Chai cartacunataca, jatun mandaj mandajuj tucui llactacunapi saquigrichunmi, cartacunata apajcunaman cachashca carca. Chai cartacunapica, Judá llactamanda chairalla viñaicunata, rucucunata, huahuacunata, huarmicunatapash shuj punllapilla, tucuicunata huañuchishpa, paicuna imata charishcacunatapash apanajuchunmi mandashca carca. Chaitaca, Adar shuti chunga ishcai quillapaj chunga quimsa punllapi chashna rurachunmi mandashca carca. 14Chai punllapaca, tucuicuna alichirishcalla cachunmi, tucui llactacunapi chai mandashcataca shujman yalichishpa escribishcacunahuan, tucui gentecunaman villachun cacharca. 15Jatun mandaj mandajpimi, cartacunata apajcunaca ucha llujshinajurca. Chai mandashcataca, llactata mandana Susa shuti jatun pueblopimi curca. Chai jipallami jatun mandajhuan, Amán shuti runahuanga ufiangapaj tiarirca. Ashtahuangarin Susa shuti pueblopi causajcunaca, ninandami manllarinajurca.
Currently Selected:
ESTER 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.