2 CORINTIOS 12
12
Pablotaca, aguijón jirruhuan tujsinshnami llaquichishca
1Jariyashpalla imatapash parlashpaca, ima alitapash napacha japinichu. Ashtahuangarin Apunchi Jesús muscuipishna ricuchijpi ricushcatami parlangapaj munani. 2Cristota crij runataca rijsinimi. Chai runaca, quimsa jahua pachacamanmi apai tucurca. ñami chunga chuscu huata tucun. (Chai runataca, cuerpondichu aparca, nachu cuerpondi aparca imacha, na yachanichu. Chaitaca, Taita Diosllami yachan). 3(Chai runaca, cuerpondichu carca, nachu cuerpondi carca, imacha, na yachanichu. Chaitaca, Taita Diosllami yachan). Chai runataca rijsinimi. 4Chai runaca, paraíso nishca juyailla llactamanmi apai tucurca. Chaipica pipash nara uyashca, pipash na yalichishpa parlai ushanalla shimicunatami uyarca. 5Chai runa chashna tucushcata yarishpami cushijusha, ñucamandallataca na jariyashachu. Imatapash na rurai ushashcata ricuchishpami cushijuni. 6Jariyangapaj munashpa imatapash na llullashpa rimajushpaca, na juizu illanshna caimanllu. Ashtahuangarin yachanmi nishpa ñucata ama ricuchunmi, na jariyani. Ñuca rurajujta ricushcata, ñuca villajujta uyashcatalla yarichunmi saquini. 7Ñuca jatun juyaillata ricushcatapash, chaihuan ama yapata jatumbi ricurichunmi, Diosca aguijón jirruhuan tujsinshna, ñuca cuerpo nanachijuchun saquirca. Chaimandami ama yapa jatun tucuchun, Satanaspaj angelca ñavipi huactashpa llaquichijuhuanlla. 8Shinamandami, ñuca nanaita anchuchipai nishpa, Apunchi Jesustaca quimsa viajeta mañarcani. 9Shina mañajpimi Apunchi Jesusca, cashna nihuarca: “Candaca ninandami juyajuni. Imata na rurai ushaj cashpapash, ñuca ninan ushaita charijtaca, alimi ricuchijungui. Chaillahuan cushijujuilla” nihuarcami. Chaimandami imata na rurai ushashpapash, ninanda cushijushpa jariyashpa, Cristopaj ninan ushaica ñucahuan cachun chashna jariyasha. 10Shina cajpipash Cristota juyashpami, imata na rurai ushajushpapash cushijuni. Rimashpa pingaichi tucujushpapash, ima minishtirishcata na charishpapash catiriashpa llaquichinajujpipash, ninan llaquicuna japijpipash, ninandami cushijuni. Ashtahuangarin imata na rurai ushashpapash, ashtahuanmi shinlli cani.
11Shina shunguhuan jariyashpami, shinlli shungu runashna tucushcani. Cangunamandami, cashna nirijuni. Cangunami, ñucata alicachishpa parlana carcanguichi. Yanga runa cajpipash, chai ninan yachajushca Jesusmanda villaj runacunaca, ashallatapash na yalihuanllu. 12Ñuca cangunahuan cashpaca, shuj ricuchinacunatami ricuchircani. Pipash na rurai ushanalla manllarinacunatapash, juyailla ricuchinacunatapash ali shunguhuan rurashpami ricuchijurcani. 13Caipi chaipi tandanajuj crijcunapajpi purinshnallatami, cangunahuambash purijurcani. ¿Imatapash carahuaichi nishpa, cangunata mañarcanichu? ¡Chashna fiñachishca cajpica, cungahuaichilla!
Cai shamuihuanga, ñami quimsa viajeta shamusha nishcami
14Ricuichi, cunan shamushpaca, ña quimsa viajetami cangunapajman shamungapaj alichirishcalla shuyajuni. Shina shamushpapash, cangunataca imagutapash na mañashachu. Canguna imata charishcataca, na mañanichu. Ashtahuangarin cangunatallami yariajuni. Huahuacunaca na taitaman, mamaman mascanllu. Ashtahuangarin taitahuan mamahuanmi, huahuacunaman carangapaca mascanata charin. 15Cangunapaj ali cachunmi, ñuca imaguta charishcatapash, ninanda cushijushpa tucuchisha. Cangunaca, ashallata juyana cajpipash, cangunapaj alma quishpirichunga, ñucallata imapash tucushallami.
16Cangunata ñuca na mañashcataca yachanguichimi. Shina yachashpapash, huaquingunaca: “Paica, umachinata ali yachaj tucushpamari, ñucanchitaca umachirca” nishpami juchachinajun. 17¿Cangunapajman shujcunata ñuca cachamushpachu, cangunataca umachircani? 18Titotami cangunapajman ripai nishpa mingashpa, caishuj huauquindi cacharcani. ¿Titochu cangunata umachirca? ¿Nachu ishcandi chashnallata yarishpa, chashnallata rurashpa purinchi?
19Ninanda juyashca crijcuna, cangunapaj ñaupajpi alicachi tucungapajllami, cashna nijun yanguichiman. Taita Diospaj ñaupajpimi, ñucanchica Cristopaj cashpa, cangunapash ashtahuan shinlli tucushpa catichun, tucui imatapash villanchi. 20Ñuca shamushpaca, ñuca munashcashna causanajujtaca napash japiringachu. Ñucapash canguna munashcashnaca, napash caringachu. Cangunapura fiñanajushpa rimarinajushpa, shujcuna charishcata ñucapaj cashcanman yashpa ricushpa ninanda fiñarishpa, shicanyarinajushpa, imapash tucushpachari ali canman nirinajushpa, huasha parlanajushpa, ninanda jariyashpa, paicunapaj munaita rurashpa causanajujta japigrinatami manllani. 21Cangunapajman cutin tigrashpa, cangunahuan cajpi, Taita Dios ñucatara pingaichinatami manllani. Canguna puramanda taucacunami pundaca mapata rurashpaca, huainayashpa, ima munashcata rurashpa causashcatapash na saquishpa, Diospajman nara tigrarishca cajpica, huacanami tucunga yashpami manllani.
Currently Selected:
2 CORINTIOS 12: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.