DANIEL 1
1
Danielpish paihuan cajcunapish Babiloniapi cashcami
1Babilonia llajtata jatun mandaj Nabucodonosorca, jatun mandaj Joacim Judá llajtata ña quimsa huatata mandacujpimi, Jerusalenman shamushpa chai pueblo muyundijta paipaj soldadocunahuan shayarirca. 2Jatun Diosmi Judá llajtata jatun mandaj Joacimtapish, Diospaj huasipi Diospajta ruranapaj caj imalla charinacunatapish, Nabucodonosorpaj maquipi churarca. Chaicunataca Nabucodonosorca, Sinar llajtaman apamushpami, achca valijcunata huaquichina paipaj diospaj huasipi churarca. 3Jatun mandajca eunucocunata mandaj Aspenaztami israelcunata mandajcunapaj churicunata pushamuchun mandarca. 4Paicunataca tucui imapish alli cajta, alli ñahui cajta, tucui imata yachachijpipish jahualla yachai tucuipaj cajta, ima yachanatapish jahualla yachai tucuipaj cajta, jahualla entendi tucuipaj cajta, jatun mandajpaj mandana huasipi imatapish rurai tucuipaj cajcunata pushamuichij. Paicunamanca rimanatapish, quillcanatapish ñucanchij caldeocunapajta yachachichij nishpami mandarca. 5Jatun mandajca paicunamanca micunatapish, vinotapish pai imatami micun, pai imatami ubyan chaillatataj punllanta carachun, yachaitapish quimsa huatacunata alli yachachichun, chai q'uipaca paipaj ñaupajman ricurigrichunmi mandarca.
Danielpish paihuan cajcunapish jatun mandaj mandana huasipi cashcami
6Chaicunapurapica Judá aillupuramanta Daniel, Ananías, Misael, Azarías shuticunami carca. 7Paicunataca eunucocunata pushajca, shujtaj shuticunata churashpami, Danieltaca Beltsasarta, Ananiastaca Sadracta, Misaeltaca Mesacta, Azariastaca Abed-nego shutita shutichirca. 8Danielca, jatun mandajpaj micunata micushpa, pai ubyana vinota ubyashpaca mapayashami nishpami paipaj shungupica manataj micuna, manataj ubyana tucurca. Chaimi eunucocunata pushajtaca: “Cai micunacunata micushpa, cai vinota ubyashpaca mapayashamari. Chaicunata micuchuntaj, ubyachuntajca ama mandahuaichu” nirca. 9Danieltaca Taita Dios eunucocunata pushajpaj ñahuipi alli ricurichun churajpimi, eunucocunata pushajca paihuan alli cana yuyai tucurca. 10Chaimi eunucocunata pushajca Danieltaca:
–Jatun mandaj ñuca amotajmari micunatapish, vinotapish cancunaman mashnata cunataca mandarca. Mana chashna carajpica, manamari cancunapura huiñaillataj caj caishujcuna shina alliyashca ñahui ricuringuichijchu. Cancunalla irqui ñahui cajta ricushpaca, jatun mandajca ñucata huañuchinatamari manchani. Chaipica cancunapaj jahuami canga– nircami.
11Shina nijpimi Danielca paitapish, Ananiastapish, Misaeltapish, Azariastapish cuidachun eunucocunata pushaj churashca Melsartaca cashna nirca:
12–Cambajta ruraj ñucanchijmanca chunga punllacunacama yacu granocunallata carashpa, ubyanapajpish yacullata cushpa ñucanchij ima shina tucujta ricuchunmi roganchij. 13Chai q'uipaca, ñucanchijtaca jatun mandajpaj micunata micuj mosocunahuan ch'imbapurashpa ricupangui. Chaipica cambajta ruraj ñucanchijtaca canpi ima shina alli cashcata ricushpa imatapish rurapanguillami– nirca.
14Paicuna mañashcata ari nishpami, chunga punllacunacama paicunamanca chashnalla carashpa ricurca. 15Chunga punllacuna ña tucujpica, yacu granollata micujcunataca jatun mandaj cushca micunata micuj mosocunatapish yalli alli, c'ari c'ari, puca ñahuicuna cajtami ricurca. 16Chaimi Melsarca, jatun mandaj carachun nishca micunataca mana carashpa, ubyana vinotapish mana cushpa yacu granocunallata carashpa catirca.
17Chai chuscu mosocunamanca, Taita Diosmi quillcanatapish, imata yachaj canatapish alli yuyaita cushpa yachaisapata rurarca. Danielca muscuipi shina ricushcacunatapish, muscushcacunatapish imata nisha nishcata entendijmi tucurca. 18Jatun mandajca ima punlla paipaj ñaupajman pushanatami mandashca carca. Chaimi punllacuna ña pajtajpica, eunucocunata pushajca Nabucodonosorpaj ñaupajman pusharca. 19Tucui chaipi caj mosocunahuan jatun mandaj parlanacushpaca, chaipi cajcunapurapica pi shujtajtaca Daniel shina, Ananías shina, Misael shina, Azarías shinataca pita mana japircachu. Chaimi paicunaca jatun mandajpajta ruranapaj chaipi saquirircacuna. 20Tucui imapipish yachaisapa canata, alli yuyaiyuj canata jatun mandaj tapujpipish, paicunaca pai mandacun llajtapi tiyaj tucui jatun yachajcuna, luzerocunamanta yachajcuna cutichishcamantaca chunga cutihuan yallimi cutichircacuna. 21Danielca, jatun mandaj Ciro mandai callari huatacamami chaipi saquirirca.
Currently Selected:
DANIEL 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.