EZEQUIEL 48
48
Israel aillupurallajtata ima shinalla chaupina cashcamanta
1Janaj ladomanca cashnami canga: Jatun Cuchamantaca, Hetlón puebloman rina ñanta catishpaca, Hamat shuti, Hazar-enán shuti pueblocunaman yaicuna ñancamami canga. Chaitaca Damasco pueblo, Hamat pueblo ura ladocamami cada Israel aillu cashna japinga: Dan ailluca inti llujshin ladomantaca, inti huashicun ladocamami mirga allpata japinga. 2Dan aillupaj allpa ura ladomanca, Aser aillumi inti llujshin ladomantaca, mama cucha ladocama mirga allpata japinga. 3Aser aillupaj ura ladomanca, Neftalí aillumi inti llujshin ladomantaca, mama cucha yacucama mirga allpata japinga. 4Neftalí aillupaj ura ladomanca, Manasés aillumi inti llujshin ladomantaca, mama cucha ladocama mirga allpata japinga. 5Manasés aillupaj ura ladomanca, Efraín aillumi inti llujshin ladomantaca, mama cucha ladocama mirga allpata japinga. 6Efraín aillupaj ura ladomanca, Rubén aillumi inti llujshin ladomantaca, mama cucha ladocama mirga allpata japinga. 7Rubén aillupaj ura ladomanca, Judá aillumi inti llujshin ladomantaca, mama cucha ladocama mirga allpata japinga.
8Judá aillupaj ura ladomanca, inti llujshin ladomantaca, mama cucha ladocama mirga allpata ch'icanyachinguichij. Chai allpapi Diospaj huasita rurangapaj largomanpish anchomanpish, 78 kilómetro, 750 metro allpata ch'icanyachinguichij.
9Diospajlla ch'icanchishca allpaca largomanca, 78 kilómetro, 750 metrota charichun. Anchomanca, 31 kilómetro, 500 metrota charichun. 10Chai allpallamantataj mirga allpataca, curacunapajlla cachun ch'icanyachinguichij. Chaishuj mirga allpaca janaj ladomanca, 78 kilómetro, 750 metro largo cachun. Shinallataj inti huashicun ladomanpish, 31 kilómetro, 500 metro ancho cachun. Cutin caishuj mirga allpaca inti llujshin ladomanca, 31 kilómetro, 500 metro ancho cachun. Ura ladomanca, 78 kilómetro, 750 metro largo cachun. Chai mirga allpacuna chaupipica, Diospajlla huasimi canga. 11Sadocpaj churi curacunaca ñuca mandashcacunataca, tucui shunguhuanmi cazurcacuna. Israelcuna millaita ruracujpipish, paicunaca mana ima millaita rurarcacunachu. Paicunaca, levita curacuna shina mana ima pandata rurarcacunachu. 12Paicunaca levita curacunapaj allpa c'uchullapitajmi, mirga allpataca charingacuna. Chai allpaca, chai curacunapajlla ch'icanchishcami canga. 13Levitacunapaj allpaca, Sadocpaj churi curacunapaj allpa c'uchullapitajmi canga. Chai allpapish largomanca, 78 kilómetro, 750 metromi canga. Anchomanca, 31 kilómetro, 500 metromi canga. 14Levitacunaca paicuna charicushca allpataca, mirga allpallatapish mana piman c'atui tucunchu, mana pihuan cambiai tucunchu. Chai allpapi p'ucushca punta granotapish, mana piman cui tucunchu. Chaicunaca Mandaj Dios ñucapajlla cashcamantami, chaicunataca mana rurai tucuncuna.
15Chai 78 kilómetro, 750 metrota charij allpamanta 15 kilómetro, 750 metro saquirij mirga allpaca pueblo ruranapajpish, causanapajpish, michina q'uihuacunapajpishmi canga. Chai mirga allpa chaupipimi puebloca canga. 16Chai pueblota rurana allpaca, janaj ladomanpish ura ladomanpish, 14 kilómetro, 175 metrota charichun. Shinallataj inti llujshin ladomanpish inti huashicun ladomanpish, 14 kilómetro, 175 metrollatataj charichun. 17Chai pueblo janaj ladotapish ura ladotapish, 787 metro, pichca chunga centímetro largoca michinapajmi saquiringa. Shinallataj inti llujshin ladotapish inti huashicun ladotapish, 787 metro, pichca chunga centímetro largoca michinapajllatajmi saquiringa. 18Pueblota rurana allpa c'uchupi caj allpaca pueblopi trabajajcuna micuchun tarpuna allpami canga. Chai allpaca inti llujshin ladomanpish, inti huashicun ladomanpish, 31 kilómetro, 500 metrota charichun. 19Pueblopi trabajajcunaca, tucui Israel aillucunapuramanta cachun. 20Largomanpish anchomanpish, 78 kilómetro, 750 metrota charij chai allpataca mirga mirga ch'icanyachinguichij. Chai mirga allpacunapimi, Mandaj Diospajlla huasipish, pueblopish shayaringa.
21Diospaj huasita ruranapaj, pueblota ruranapaj ch'icanyachishca allpa c'uchupi cada ladoman saquirij mirga allpacunaca mandajpajmi canga. Chaishuj mirga allpaca, 78 kilómetro, 750 metromantaca inti llujshin ladomanmi saquiringa. Caishuj mirga allpaca, 78 kilómetro, 750 metromantaca inti huashicun ladomanmi saquiringa. Chai ishqui mirga allpacunami, mandajpajca canga. Chai ishqui mirga allpacuna chaupipimi, Diospajlla huasica shayaringa. 22Mandaj japina mirga allpaca levitacunapaj allpa c'uchumantaca, pueblota rurana allpa c'uchucamami canga. Shinallataj Judá aillupaj lindemantaca, Benjamín aillupaj lindecamami canga.
23Shinallataj caishuj Israel aillucunapaj allpaca, inti llujshin ladomantaca mama cuchacamami canga. Chaipimi Benjamín ailluca, mirga allpata japinga. 24Benjamín aillupaj allpa ura ladomanca, Simeonpaj aillumi inti llujshin ladomantaca, mama cuchacama mirga allpata japinga. 25Simeón aillupaj allpa ura ladomanca, Isacar aillumi inti llujshin ladomantaca, mama cucha ladocama mirga allpata japinga. 26Isacar aillupaj allpa ura ladomanca, Zabulón aillumi inti llujshin ladomantaca, mama cucha ladocama mirga allpata japinga. 27Zabulón aillupaj allpa ura ladomanca, Gad aillumi inti llujshin ladomantaca, mama cucha ladocama mirga allpata japinga.
28Gad aillupaj allpa ura ladomanca, Tamar pueblomantaca p'iñanacuna yacucama, Cades pueblomantaca Egipto llajtahuan tupanacunpi tiyaj yacu huaicuta catishpa Jatun Cuchacamami lindeca canga. 29Chashnami cai allpataca, Israel aillucunamanca suerteta rurashpa chaupina canguichij. Tucuicunallamantajmi mirga mirga chaupishpa cuna canguichij. Mandaj Jatun Dios ñucatajmi chashna nini.
30Chai puebloca janaj ladomanca, 14 kilómetro, 175 metrotami charinga. Chai pueblopaj pungucamaca cashnami canga. 31Chai pueblocunapaj pungucunaca Israel aillucunapaj shuticunahuanmi canga. Janaj ladomanca quimsa pungumi canga. Shuj punguca Rubén shuti, caishuj punguca Judá shuti, chaipaj q'uipa punguca Leví shutimi canga. 32Shinallataj inti llujshin ladomanpish, 14 kilómetro, 175 metrollatatajmi charinga. Chai ladomanpish quimsa pungucunami tiyanga. Shuj punguca José shuti, caishuj punguca Benjamín shuti, chaipaj q'uipa punguca Dan shutimi canga. 33Ura ladomanpish, 14 kilometrollatatajmi charinga. Chai ladomanpish quimsa pungucunami tiyanga. Shuj punguca Simeón shuti, caishuj punguca Isacar shuti, chaipaj q'uipa punguca Zabulón shutimi canga. 34Inti huashicun ladomanpish, 14 kilómetro, 175 metrollatatajmi charinga. Chai ladomanpish quimsa pungucunami tiyanga. Shuj punguca Gad shuti, caishuj punguca Aser shuti, chaipaj q'uipa punguca Neftalí shutimi canga. 35Chai pueblo muyundijta medijpica, 36 kilómetro, 700 metromi carca. Chai punllamantapachami chai puebloca: Mandaj Diosmi chaipi nishca shutihuan saquiringa nircami.
Currently Selected:
EZEQUIEL 48: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.