DANIEL 2
2
Nabucodonosor muscushca imata nisha nishcata Daniel huillashcami
1Nabucodonosorca ña ishqui huatata mandacushpami, tauca muscuicunata charirca. Paica paipaj yuyaipi musparishpami mana dormi tucurca. 2Jatun mandajca, pai muscushca imata nisha nishcata huillachunmi jatun yachajcunata, luzerocunamanta yachajcunata, brujocunata, caldeocunatapish cayachirca. Tucui paicuna shamushpa paipaj ñaupajpi ña cajpimi, 3jatun mandajca paicunataca:
–Ñucaca shuj muscuitami muscurcani. Chai muscui imata nisha nishcata yachasha nicushpalla ñuca yuyaica musparishcamari– nirca.
4Chaimi caldeocunaca jatun mandajtaca arameo rimaipi:
–¡Jatun mandaj, cambaj causaica huiñaita cashca cachun! Can muscushcataca cambajta ruraj ñucanchijman parlayari. Chai imata nisha nishcata ñucanchij huillangapaj– nircacuna.
5Chaimi jatun mandajca caldeocunataca cashna nirca:
–Imallata muscushcataca mana yuyarinichu. Ashtahuanpish imata muscushcata, chai imata nisha nishcata mana huillajpica cancunataca ñutuchishami. Cancunapaj huasicunapish mapata shitana pambata rurashcami canga. 6Ashtahuanpish imata muscushcata, chai imata nisha nishcata huillajcunaca achca convidanacunata, alli nishca canata, jatun canapi churashca canatapishmi chasquinga. Shina cajpica, imata muscushcata chai imata nisha nishcata huillaichij– nircami.
7Adivinocunaca cutinllatajmi:
–Jatun mandaj can muscushcataca cambajta rurajcunaman parlayari. Chai muscui imata nisha nishcata huillangapaj– nircacuna.
8Chaimi jatun mandajca cashna nirca:
–Cancunaca ñuca imata rurasha nishcata uyashcamantami, imatapish llullashpa huillangapaj ñuca imata muscushcallatataj tapushpa huillashun nicunguichij. Chaitaca allimi yachani. 9Imata muscushcata mana huillajpica tucui cancunapajmi chai shinallataj llaqui tucuna tiyacun. Llullashpa huillangapaj yuyarinacucushpa, imapish mana alli shimicunata ñuca ñaupajpi rimaringapajmi yuyarinacucunguichij. Chaipajca punllacuna ima shinalla tucujtami shuyashpa uniyacunguichij. Ñuca imata muscushcata ña huillaichij. Chaita huillajpica, ñuca muscushca imata nisha nishcata huillanatapish crishami– nirca.
10Chaimi caldeocunaca, jatun mandajtaca:
–Can jatun mandaj tapushca shinata adivinajcunaca tucui cai pachapi pi mana tiyanchu. Jatun yachajcunatapish, luzerocunamanta yachajcunatapish, caldeocunatapish pi jatun mandajpish, pi mandajpish, pi jatun amopish can jatun mandaj tapushca shinaca mana tapushcachu. 11Jatun mandaj tapushcaca yallitaj sinchi mana cutichi tucuipajmari. Chaitaca jatun mandajmanca pi mana cutichingachu. Dioscunallamari chaitaca cutichi tucunga. Paicunapaj huasica manamari runacunapaj chaupipi tiyanchu– nircami.
12Chaimi jatun mandajca yallitaj jatunta p'iñarishpa Babiloniapi tiyaj tucui jatun yachajcunata huañuchichun mandarca. 13Jatun yachajcunata huañuchichun nishca mandashcataca tucui llajtacunaman cachashpami huillachirca. Danieltapish, paihuan cajcunatapish huañuchingapajmi mashcarcacuna.
14Jatun mandajta cuidaj soldadocunata mandaj Ariocca Babiloniapi caj jatun yachajcunata huañuchinamanmi llujshirca. Danielca paihuanca yachaisapa, sumaj shimicunahuan parlashpami, 15jatun mandajpaj soldadocunata mandaj Arioctaca:
–Jatun mandajca ¿imamantataj cai mandashcataca utca tucuicunaman huillachicun?– nirca.
Shina nijpimi, Ariocca imamanta chashna mandashcata Danielman yachaj chayachijpi, 16Danielca jatun mandajpajman yaicushpaca, jatun mandaj can muscushca imata nisha nishcata ñuca huillangapaj asha punllacunata cuhuai nishpa mañarca. 17Chai q'uipaca Danielca paipaj huasiman rishpami paihuan caj Ananiasmanpish, Misaelmanpish, Azariasmanpish ima tucucushcata huillarca. 18Pi mana yachaipaj cashcataca jahua pacha Taita Dios paicunata llaquishpa huillachichun nishpa mañachunmi chashna huillarca. Jatun mandaj tapushcata mana huillashpaca Danielpish, paihuan cajcunapish Babiloniapi tiyaj jatun yachajcunahuanmi huañuna carca.
19Pi mana yachashcataca Danielmanca tutami muscuipi shina ricuchishpa huillarca. Chaimi Danielca jahua pacha Taita Diostaca allimari cangui nishpaca, 20cashna nirca:
“Jahua pacha Taita Diospaj shutitaca huiñai huiñaita alli nishca cachun.
Tucuita rurai tucuj canapish, yachaisapa canapish paipajmi.
21Huatacunatapish, punllacunatapish paimi shujtajyachin.
Jatun mandajcunatapish paimi churan.
Paimi anchuchin.
Jatun yachajcunamanpish paimi yachaisapa canata cun.
Alli yuyaiyujcunamanpish paimi yachaita cun.
22Ucujman cajcunatapish, pacalla cajcunatapish paimi ricuchin.
Amsapi cajtapish yachanmi.
Luzca paipimi tiyan.
23Ñuca yayacunapaj Taita Dios, quiquintami pagui nini, quiquintami alabani.
Quiquinmari ñucamanca yachaitapish, fuerzatapish cuhuangui.
Cunancarin ñucanchij mañashcatapish ricuchinguimi.
Jatun mandaj imata muscushcata, chai imata nisha nishcatamari ricuchingui” nircami.
24Chai q'uipaca Danielca, Babiloniapi tiyaj jatun yachajcunata huañuchichun jatun mandaj churashca Ariocpajman rishpami paitaca:
–Babiloniapi tiyaj jatun yachajcunataca ama huañuchichu. Ashtahuanpish jatun mandajpajman ñucata pushai. Pai imata muscushcata, chai imata nisha nishcata huillangapaj– nirca.
25Shina nijpimi Ariocca Danieltaca jatun mandajpajman utca pushashpa rishpa cashna nirca:
–Judá llajtamanta prezu apamushcacunapuramantami, shuj runata japimuni. Paimi can jatun mandaj imata muscushcata, chai imata nisha nishcata huillanga– nirca.
26Chaipimi jatun mandajca, Beltsasar nishca Danieltaca:
–¿Canca ñuca imata muscushcata, chai imata nisha nishcata huillai tucunguichu?– nirca.
27Shina nijpimi, Danielca jatun mandajtaca cashna nirca:
–Jatun mandaj can tapushcaca pi mana huillai tucuipajmi. Chaimi jatun yachajcunapish, luzerocunamanta yachajcunapish, brujocunapish, adivinocunapish can jatun mandajmanca mana huillai tucuncuna. 28Shina cajpipish pi mana yachai tucuipajcunata ricuchij Taita Diosmi jahua pachapi tiyan. Paimari can jatun mandaj Nabucodonosormanca, q'uipa punllacuna imalla tucunata ricuchishca. Jatun mandaj cambaj camapi cashpa can muscushpa, muscuipi shina imallata ricushcaca caimi:
29Jatun mandajlla, cambaj camapi cajpimi, q'uipa punllacuna ima tucunata yachana munai cambaj yuyaiman shamurca. Chaimi pi mana yachashca pacalla cajta ricuchij Diosca, q'uipa punllacuna ima tucunata ricuchirca. 30Pi mana yachaipaj pacalla cajtaca ñucamanmi ricuchirca. Caitaca cai pachapi tucui causajcunata yalli jatun yachaj cashcamanta mana ricuchircachu. Ashtahuanpish can jatun mandaj muscushca imata nisha nishcata, can imata yuyacushcata canman entendichishpa huillachunllami ñucamanca ricuchirca.
31Jatun mandaj canca muscuipica, shuj jatun runaman rijchaj, cambaj ñaupajpi cajtami ricurcangui. Runaman rijchajca yallitaj jatun, jatun tucushca, achij nicujmi carca. Paica cambaj ñaupajpica manchananarucumi shayacurca. 32Chai runaman rijchajca, umaca ashtahuan alli curimi carca. Pechohuan rigracunahuanca cullquimi carca. Huijsamanta sanpicunacamaca broncemi carca. 33Changacunaca fierromi carca. Chaquicunaca mirgaca fierro, mirgaca lodomanta rurashpa cusashcami carca. 34Chaita can ricucujpica, pi manapish p'aquijpi shuj rumi p'aquirishpa shamushpaca, chai runaman rijchajpaj chaquipi huajtashpa fierrotapish, lodomanta rurashpa cusashcatapish tucui ñuturca. 35Chaimi fierropish, lodomanta rurashpa cusashcapish, broncepish, cullquipish, curipish tucui ñuturirca. Usya punllacunapi erapi trillashca ñutu t'amu shinami tucurca. Chaitaca huaira shamushpami, imata mana saquishpa tucuita aparca. Ashtahuanpish runaman rijchajta ñutuj rumica, tucui cai pacha junda jatun urcumi tucurca.
36Can jatun mandaj muscushcaca chaimi. Chai imata nisha nishcatapish, can jatun mandajmanca cunanllatajmi huillagrini. 37Jatun mandaj canca jatun mandajcunata jatun mandajmi cangui. Jahua pacha Taita Diosmi canmanca mandanatapish, imata rurai tucunatapish, fuerzatapish, jatun canatapish cushca. 38Maipi cashpapish causaj gentecunata, tucui animalcunata, huairata purij pajarocunatapish Taita Diosmi cambaj maquipi churashca. Tucui chaicunata mandanataca canmanmi cushca. Chai curi umaca canllatajmari cangui. 39Cambaj q'uipaca shujtaj mandajmi jataringa, paica mana can shina sinchi cangachu. Chaipaj q'uipa shamuj mandajca, bronce layami canga. Paica tucui cai pachatami mandanga. 40Quimsapaj q'uipa shamuj mandajca, fierro shina sinchimi canga. Fierrohuan huajtashpa tucui imatapish ñutuj shinallatajmi, p'aquishpa tucuita ñutunga.
41Chaquicunatapish, dedocunatapishmi ricurcangui. Chaitaca ashaca mangata rurajcuna lodomanta rurashpa cusashcahuan cajta, ashaca fierrohuan rurashca cajtami ricurcangui. Chaica mandana ishquipi chaupirina cashcatami ricuchin. Fierrohuan, lodomanta rurashpa cusashcahuan chagruta ricushca shinallataj chai chaupirishca mandanapica fierro shina ashalla fuerzayuj mandajpishmi tiyanga. 42Chaqui dedocunapish ashaca fierro, ashaca lodomanta rurashpa cusashcahuan cashcamanta chai mandanaca ashaca sinchi, ashaca urmanalla cashcatami ricuchin. 43Fierrohuan, lodomanta rurashpa cusashcahuan chagruta can ricushcaca, mandajcunapura paicunapaj yuyaillamanta tandanacuna cashcatami ricuchin. Ashtahuanpish caishujmanta chaishujmanta mana shuj yuyailla tucungacunachu. Fierrohuan lodohuanca mana chagrurinchu. Chai shinallatajmi canga. 44Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu. 45Urcumanta manapish pi p'aquijpi shuj rumi p'aquirishpa shamushpa fierrotapish, broncetapish, lodomanta rurashpa cusashcatapish, cullquitapish, curitapish ñutujtami ricurcangui. Q'uipa punllacunapi chai shinallataj tucunatami Jatun Diosca can jatun mandajmanca ricuchishca. Can muscushcaca chashnatajmi. Chai imata nisha nishcapish chashnatajmi– nircami.
46Shina nijpica, jatun mandaj Nabucodonosorca Danielpaj ñaupajpi pambaman tupajta cumurishpami alli nirca. Chaimantaca convidanacunata cushpa Danielpaj ñaupajpi inciensota rupachichunmi mandarca. 47Jatun mandajca, Danieltaca:
–Cancunapaj Taita Diosca, tucui dioscunapaj Taita Diostajmi, jatun mandajcunapajpish Jatun Mandajmi. Pi mana yachaipaj pacalla cajtapish ricuchijmi. Chaimi pi mana yachaipaj pacalla cajtaca ñucaman huillangui– nircami.
48Shina nishpami jatun mandajca, Danieltaca jatunyachirca. Jatun canapi churashpami achca convidanacunatapish curca. Tucui Babilonia llajtata mandachun, Babilonia llajtapi tiyaj tucui jatun yachajcunata mandachunpishmi churarca.
49Danielca paihuan purij Sadrac, Mesac, Abed-nego nishca quimsa runatapish Babilonia llajtata ñaupajman pushanata mandajcuna cachun churangapajmi jatun mandajta mañarca. Danielca, jatun mandaj tiyacun ucupimi caj carca.
Currently Selected:
DANIEL 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.