PROVERBIOS 31
31
Jatun mandajta cunashca shimicunami
1Cai shimicunaca, jatun mandaj Lemuel, paipaj mama yachachishcata Dios huillachun nijpi, huillashca sumaj shimicunami:
2Ñuca huahualla, ñuca huijsamanta
llujshishca huahualla.
Ñuca yallitaj c'uyashca churimari cangui.
3Huarmicunahuan ama cambaj fuerzata
tucuchinguichu.
Jatun mandajcunata urmachijcunapipish,
ama cambaj yuyaita churanguichu.
4Lemuel, canca ama machanguichu.
Chaica mana jatun mandajcunapajchu.
Mandajcunapish vinota, sidrata
mana ubyanllacunachu.
5Ñataj chaicunata ubyashpaca,
alli mandanata cungarinmancuna.
Llaquichishcacunapaj allita ruranatapish
saquinmancuna.
6Sidrataca llaquilla causajcuna
ubyachun cuichijlla, vinotapish
shaicushca cajcuna ubyachun saquichijlla.
7Chaita ubyashpami huajcha cashcatapish,
llaquicunata apacushcatapish cungarishpa
ashallatapish samaringacuna.
8Mana rimai tucujmantaca can rimangui.
Mana mitsari tucujcunatapish,
juchachijpica can mitsangui.
9Cambaj shimihuanca,
cashcata
mandashpa mitsangui.
Huajchacunapaj, imata mana charijcunapajca,
alli ricushpa cashcata rurangui.
Allita ruranata yachaj huarmita alli nishca shimicunami
10Yuyaisapa yachaj huarmitaca,
¿pitaj jahualla japi tucungari?
Chashna alli huarmica achij nicuj sumaj
rumicunatapish maihuan yalli valijmari.
11Cusaca paipimi shunguta churan.
Paihuanca ima illaj mana causanchu.
12Paica llaquichinapaj randica,
cusa cushicunata rurashpami causan.
13Millmatapish, linotapish maipipish
randishpami, cushicushpa paipaj
maquihuan sumajta ahuan.
14Carumanta sumaj micunacunata randishpami,
c'atunacunahuan jatun barco shamuj
shina chayamun.
15Utcata jatarishpami paipaj tucui
familiacunaman caran.
Pai huiñachishca huarmicunamanpishmi raquin.
16Alli allpata ricushpami, paipaj
maquihuan ganashca cullquihuan randin.
Chai allpapica uvata tarpushpami,
alli chagrata ruran.
17Imata rurangapajpish, sinchi
sinchita chumbillishcami purin.
Paipaj rigracunapish, mana shaicuj
rigracunami.
18Randishcapish, c'atunapish alli
llujshichun ricuranmi.
Paipaj lamparapish tutaca rupacunllami.
19Shuj maquihuanca sijsijta, caishuj
maquihuanca puchcana ruedata
cuyuchishpa puchcacunllami.
20Huajchamanpish, ima illajcunamanpish
maquita cacharishpami caran.
21Rasujpipish paipaj huahuacuna
chirichinataca mana manchanchu.
Paipaj tucui familiamari racu
churanacunahuan purin.
22C'atacunatapish paillatajmari ahuan.
Churanacunatapish ashtahuan alli
linota ahuashpami, morado sumaj
churanacunata churarin.
23Paipaj cusapish, llajtata mandaj
yuyajcunahuan pueblo pungu tandanacuipi
tiyarishpaca, tucuicuna rijsinalla runami.
24Sumaj linsocunata ahuashpami c'atun.
C'atushpa randishpa purijmanmari
sumaj chumbicunata c'atun.
25Paipajca imata mana atichij cana,
tucuicuna alli nishca canaca, sumaj
churanata churarishca shinami.
Caya minchatapish paica asinllami.
26Paica alli yachaihuanmi imatapish
shimi llujshin.
Llaquij canatami yachachishpa mandan.
27Huasipi imapish alli cachun ricuranmi.
Micunallatapish mana yanga micushpa tiyanchu.
28Paipaj huahuacuna jatarishpapish,
cushicui mamita nincunami.
Cusapish cashnami nishpa cushichin:
29“Achca huarmicunami allita rurancuna.
Ashtahuancarin canmari tucuicunata yalli
allita ruraj cangui” ninmi.
30Ñahuilla sumaj cashpaca, inquitanllami.
Ricuilla c'uyananqui cashpaca, yangallami.
Ashtahuanpish Mandaj Diosta manchaj
huarmimari, tucuicuna alli nishca canga.
31Paipaj maquihuan trabajashcamantaca,
paimanpish allita cutichichigari.
Pai imallata rurashcamantaca,
pueblo pungupipish alabaichigari.
Currently Selected:
PROVERBIOS 31: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.