PROVERBIOS 30
30
Agur shuti jatun yachajpaj shimicunami
1Jaqué runapaj churi Agurmi cai sumaj shimicunataca, Dios huillachun nijpi Itielman, Itielman Ucalman cashna nishpa huillarca:
2Ñucaca, tucuicunata yalli
ch'ahuan runami cani.
Mana shujtajcuna shina yuyaita
japi tucunichu.
3Alli yachaitaca imata mana yacharcanichu.
Jucha illaj Diosmantacarin, ima yachanata
mana uyashcanichu.
4¿Pitaj jahua pachaman rishpa
cutin tigramushcari?
¿Pitaj huairataca maquipi lutsashpa
chari tucungari?
¿Pitaj mama cucha yacutapish paipaj jahua
churanapi pillushpa chari tucungari?
¿Pitaj cai allpa maicama canatapish
alli ricushpa churarcari?
¿Tucui chaita rurajtaca,
pi cashcata yachanguichu?
¿Paipaj churitapish rijsinguichu?
5Mandaj Dios rimashca shimicunaca
chuya shimicunami.
Diosca paipi shunguta churajcunapajca,
pacaj escudomi.
6Paipaj shimicunataca, imata ama
mirachinguichu.
Ñataj canta jarcashpa, can llulla
cashcata ricuchinman.
7Taita Dioslla, ñucaca ishquillatami
mañani.
Chaitaca ñuca causacujpitaj cuhuayari.
Ama mana cushpa saquihuaichu.
8Ñucataca yangapi yuyaita churanamantapish,
llulla canamantapish huaquichihuayari.
Shinallataj yalli huajchatapish, yalli
charijtapish ama rurahuaichu.
Micunapaj pajtallata carahuayari.
9Yalli charijyashpaca canta cungarishpa:
“¿Mandaj Diosca pipishchari?”
nipajmi cani.
Yalli huajcha cashpapish shuhuashpa,
can ñuca Diosta c'amichipajmi cani.
10Amota servij runataca, ama cashnami
chashnami nishpa amoman huillangui.
Ñataj canta ima llaqui japishca alli
canman nijpi llaquita apanguiman.
11Quiquin yayallatataj ima llaqui
japishpa, alli canman nijcuna tiyanmi.
Chaicunaca mamatapish ima allita
mana nincunachu.
12Millaita ruranata mana saquishpapish,
ima jucha illajmi canchij
yuyajcunapish tiyanmi.
13Jatun tucushpa, shujtajcunataca
p'iña ñahuihuan yurajman
ricujcunapish tiyanmi.
14Ñaupaj quiruta shinaca espadata,
jashlin quiruta shinaca cuchillota
charijcunapish tiyanmi.
Chaicunaca llajtapi causaj huajchacunata,
mana mitsari tucujcunatami tucuchincuna.
15Sanguijuela nishca c'uruca, manataj
sajsashpa, mañacujlla ishqui
ushushitami charin.
Chai shinallataj manataj shaicurijcunaca,
quimsapishmi tiyan.
Manataj chailla nij shujhuancarin chuscupishmi.
16Chaicunaca: Seolmi mana huachaj
huarmimi, mashnata tamyajpipish
chaquirijlla allpami.
Ninacarin rupashpapish, manataj chailla ninchu.
17Yayata mana cazushpa yurajman ricuj
churica, mama yachachishcatapish p'iñanmi.
Chai ñahuicunataca, angacuna surcushca cachun.
Paicunatapish cuervocuna micushca cachun.
18Ñucaca quimsatami mashnata yuyashpapish,
manataj yachai tucuni.
Mana yachashcallataj shujhuancarin chuscupishmi.
19Huairata águila purishcapish, c'aca
quinricunapi culebracuna purishcapish,
mama cuchapi jatun barcocuna huambushcapish,
c'arita manaraj rijsij huarmipi c'ari
chayarishcapish, ima mana ricurinchu.
20Maijan huarmi huainayashpaca: “Ima
millaita mana rurashcanichu” ninmi.
Micushca q'uipa, shimita p'icharishca
shina saquirinllami.
21Quimsamantami cai pachapi causajcunaca,
mancharishpa chujchuncuna.
Chashna mancharinacunaca chuscupishmari:
22Servij runalla llajtata jatun mandaj
tucujpi, rumi shungu runa achca
micunata charijpi,
23tucuicuna millashca huarmi casarajpi,
catishpa causaj huarmi paipaj amapajta
quichujpimi mancharincuna.
24Cai pachapi tiyaj yachaisapacunatapish, yalli yachaisapa chuscu uchilla
animalcunami tiyan:
25Añangucunaca ima sinchita mana rurai
tucushpapish, usya punllacunapimi
micunataca sumajta tandancuna.
26Cunucunaca mana sinchicuna cashpapish,
jatun rumi quinricunapimi huasichishpa
causancuna.
27Langostacunapish jatun mandajta
mana charishpapish, ch'ican ch'ican
achcacunapura tandanacushpami shamuncuna.
28Maquihuan llapinalla arañacunapish,
jatun mandaj tiyana ucupimi tiyan.
29Sumajta purijcunaca quimsami tiyan.
Ashtahuan jatun ricuj shujhuancarin chuscupishmi:
30Tucui animalcunata yalli c'ari
c'arica leonmi.
Paica imata ricushpapish, mana
siquiman tigranchu.
31Alli chumbillirishca runapish,
c'ari chivopish, pi mana c'ariyaipaj
jatun mandajpishmi.
32Rumi shungu runa shina, jatun
tucunata yuyarishca cashpapish, pita
llaquichinata yuyarishca cashpapish,
shimita huichcashpa yuyaringuiraj.
33Maijanpish lecheta batishpaca,
mantequillata surcunmi.
Singata yalli c'acushpapish yahuaryachinmi.
Pita yalli p'iñachishpapish
macanacuipi churanmi.
Currently Selected:
PROVERBIOS 30: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.