ESTER 3
3
Amanca Mardoqueota p'iñashcamanta
1Jatun mandaj Asueroca, chai ishqui soldadocunata huañuchishca asha punllacuna q'uipami, Agagpaj huahua huahuapura Hamedatapaj churi Amantaca tucui mandajcunata mandachun churarca. 2Chashna churashpami, jatun mandajca paita servijcunataca, Amán ricurijpi, mana cashpaca paicunapaj ñaupajta rijpica, paipaj ñaupajpi tucuicuna cungurishpa pambacama cumurichun mandashca carca. Chaimantami jatun mandajta servijcunaca Amán ricurijpica, paipaj ñaupajpi cungurishpa cumurijcuna carca. Chashna mandashca cajpipish, Mardoqueoca mana cazurcachu.
3Chaimantami jatun mandajta servishpa, chai mandana huasi pungupi caj caishujcunaca Mardoqueotaca: “¿Ima nishpataj jatun mandaj mandashcataca mana cazungui?” nishpa tapurcacuna. 4Punllanta chashna nicujpipish, Mardoqueoca mana cazurcachu. Paica Judá llajta runa cashcamanta paipaj ñaupajpi mana cunguri tucushcataca, ñami huillashca carca. Chaimantami Amanmanpish chashnallataj nishpa, manachu cungurin imamí nishpa paiman huillarcacuna. 5Mardoqueoca, Amán paipaj ñaupajmantaj chayajpipish mana cungurircachu, mana cumurircallapishchu. Chaimantami Amanca yallitaj p'iñarirca. 6Amanca Mardoqueotaca, judiocunapura cashcata yachashpami, mana paillata huañuchinata yuyarca. Ashtahuanpish judiocunataca, tucuicunatami jatun mandaj Asuero mandacun llajtacunapi causajcunataca huañuchinata yuyarirca.
Amanca tucui judiocunata huañuchichun mandashcamanta
7Huata callari Nisán quillapimi, Amanca tucui israelcunata ima quillapi, ima punllapi huañuchinata yachangapaj Pur nishca suertecunata rurachirca. Chashna suerteta rurachijpica, huata tucuri Adar shuti quillapaj chunga quimsa punllapajmi urmarca. Suerteta rurachi punllaca, jatun mandaj Asuero chunga ishqui huatata mandai callari huatami carca. 8Suerteta rurashca q'uipami, Amanca jatun mandaj Asuerotaca cashna nirca:
–Can jatun mandaj mandacun tucui llajtacunapi causajcunapurapimi shujcunaca paicunapuralla ch'ican ruranacunata rurashpa causacuncuna. Mandashcacunatapish tucui shujtajcunamanta ch'ican mandashcacunatami charincuna. Can jatun mandaj mandashcacunataca mana cazuncunachu. Paicunamantaca ima allitapish mana japicunguichu. Chashnacunataca can jatun mandajca, mana ashtahuan charinachu cangui. 9Chashna cashcamantaca, can jatun mandajpaj yuyaipi alli cajpica, tucui chaicunata huañuchichun mandashpa quillcachiyari. Chaicunata huañuchishcamantaca, can jatun mandajpajmi, mandana huasipi cullquita huaquichijcunamanca, 10.000 talento cullquita cusha– nircami.
10Chashna nijpica jatun mandajca, pai mandashcata ricuchij sellota churana sortijasta llujshichishpami, judiocunata p'iñaj Amanman curca. Paica Agagpaj huahua huahuapura Hamedatapaj churimi carca. 11Chai sortijasta cushpami, ñucaman cusha nishca cullquitaca canllataj japilla. Can huañuchisha nicushca runacunatapish, cambaj yuyaipi ima ashtahuan alli cashcata rurailla– nircami.
12Chashna nijpica, huata callari quillapaj chunga quimsa punllapimi Amanca, jatun mandajpaj quillcajcunata tandachirca. Paicunatami Amanca jatun mandaj churashca satrapacunapajpish, cada llajtacunapi churashca mandajcunapajpish, pueblocunata mandajcunapajpish, paicunapaj quiquin rimaicunapi, ima shina quillcanata yachaj shinallataj quillcachirca. Jatun mandaj Asueropaj shutipi quillcachishpami, jatun mandajllataj mandashcata ricuchij sellota churarca. 13Chai quillcacunataca, quillcata apajcunatami tucui llajtacunapi saquigrichun cacharca. Chai quillcacunapica, cashnami mandashca carca: “Judiocunataca c'aricunatapish, huarmicunatapish, huahuacuna cachun, yuyajcuna cachunpish, shuj punllallapi tucuicunata huañuchinguichij. Shinallataj paicuna imalla charishcataca cancuna japinguichijlla. Cai huata tucuri Adar quillapaj chunga quimsa punllapimi, chashna rurana canguichij” nishpami, mandashca carca. 14Tucui llajtacunapi caj pueblocunapi causajcuna chai punllapaj allichirishca cachunmi, chai mandashcataca huillachun quillcacunata saquinaman cacharca. 15Jatun mandajca quillcata apajcunataca, pai causacun Susa pueblopirajmi utca huillachirca. Chaita huillajpica, Susa pueblopi causajcunaca yallitaj llaquillami tucurcacuna. Ashtahuanpish jatun mandajhuan Amanhuanca ubyacurcacunami.
Currently Selected:
ESTER 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.