ESTER 2
2
Estertaca jatun mandaj huarmi cachun churashcamanta
1Jatun mandaj Asueroca, chashna quillcachishcamanta tauca punllacuna q'uipami, p'iñarishcamanta alli tucushpa Vasti shuti paipaj huarmita yuyarirca. Shinallataj paita mana cazushcamanta llujshichishcatapishmi yuyarirca. 2Chaimantami pai churashca mandajcunaca cashna nircacuna:
–Can jatun mandajpaj can c'arihuan manaraj chayarinacushca huambraraj sumaj huarmicunatamari mashcana. 3Can jatun mandaj mandacun tucui llajtacunamantaca, tucui sumaj huarmicunata cai Susa pueblopi cambaj huarmicuna tiyacun huasiman cambaj apamuchunca, llajtacunata mandajcunamanmari mingana. Chai huarmicunata apamushpaca, sumajyachij jambicunahuan jambishpa allichichunca, cambaj huarmicunata cuidaj Hegai shuti eunuco runamanmari mingana. 4Chai q'uipaca, can jatun mandaj ashtahuan munashca, ashtahuan sumaj solterata agllashpaca, Vasti shuti huarmipaj randi jatun mandaj cachun churanguillami– nircacunami.
Chashna yuyaita cushcaca alli yuyachijpimi, jatun mandajca chashnataj rurarca.
5Jatun mandaj causacun Susa pueblopica, judiocunapuramanta Mardoqueo runami causacurca. Paica Simeipaj huahua huahuapura caj Jairpaj churimi carca. Simeica, Benjaminpaj aillupura caj Cispaj huahua huahuapurami carca. 6Mardoqueoca, Babilonia llajtata jatun mandaj Nabucodonosor, Judá llajtapi caj Jerusalén pueblomanta prezu apashcacunapurami carca. Chai jatun mandajmi, Judá llajtata jatun mandaj Jeconiastaca achcacunandij prezu apashca carca. 7Mardoqueomi, paipaj tío huañujpica, chai tiopaj ushushi Hadasa nishca Estertaca, paipaj quiquin huahuata shina huiñachirca. Esterpaj mamapish ñami huañurca. Esterca, sumaj ñahuiyuj, jatun, alli solterami carca. 8Jatun mandaj Asuero mandashpa tucui llajtacunapi huillachishca shinallatajmi, pai causacun Susa pueblopi caj mandana huasimanca c'arihuan manaraj chayarinacushca achca solteracunata aparcacuna. Chai huarmicunapurapica, Esterpishmi carca. Chai huarmicunataca, jatun mandajpaj huarmicunata cuidaj Hegai shuti eunuco runa cuidachunmi churarca. 9Hegaica, chai Ester huarmica tucuicunata yalli alli cajpimi, sumajyachij jambicunahuan paitaraj utca allichichun churarca. Micunatapish ashtahuan allitami cararca. Shinallataj paipajta rurajcuna cachunca mandana huasipi caj, ashtahuan alli yachaj canchis huarmicunatami agllarca. Chai huarmicunahuanmi Estertaca, jatun mandajpaj huarmicuna tiyana huasipi caj ashtahuan alli ucucunapi causachun churarca.
10Esterca, ama huillachun Mardoqueo yachachishcamantami, Judá llajtamanta cajcunapura cashcatapish, pipaj huasi ucupura cashcatapish piman mana huillarca. 11Ester allilla cashcata, mana allilla cashcata, shinallataj ima shina charicujta yachangapajmi, Mardoqueoca huarmicuna tiyacun huasi canllapi punllanta puricuj carca.
12Huarmicunataca, allichirichun mandashca shinallatajmi ashtahuan sumajyachunca, huarmicuna tiyana huasipi shuj huatata allichishpa charijcuna carca. Chaupi huatataca, mirra nishca aceitehuanmi llihuishpa sumajyachijcuna carca. Caishuj chaupi huatataca huarmicuna allichiringapajllataj rurashca mishquijllata ashnaj jambicunahuanpish, shujtaj jambicunahuanpish llihuishpami sumajyachijcuna carca. Chashnami chai huarmicunataca jatun mandaj Asueropajman richunca, huata jundata allichishpa sumajyachijcuna carca. 13Chai q'uipami, chai huarmicunaca, ashtahuan sumaj churarinacunata mañashpa churarishpaca, paicuna tiyacushca huasimantaca jatun mandajpajman rijcuna carca. 14Jatun mandajpaj huasiman rij huarmica, chishiman yaicushpaca, cayandij tutamantatami jatun mandajpaj caishuj huarmicuna tiyacun huasiman tigraj carca. Chaipi caj huarmicunataca, jatun mandajpajta ruraj Saasgaz shuti eunuco runami cuidaj carca. Chai huarmicunaca jatun mandajpajmanca, ña mana ashtahuan tigrajcunachu carca. Ashtahuanpish jatun mandajllataj maijanta munashpa cayajllapimi, rij carca.
15Esterca, Mardoqueopaj tío Abihailpaj ushushimi carca. Paitaca Mardoqueomi paipaj quiquin ushushita shina huiñachirca. Esterca jatun mandajpajman rina punlla chayajpica, ima sumaj churarinacunata mana mañarcachu. Jatun mandajpaj huarmicunata cuidaj Hegai shuti eunuco runa mandashcallatami churarirca. Estertaca, tucui paita cuidajcunami c'uyarcacuna. 16Jatun mandaj Asueroca, ñami canchis huatata mandacurca. Chai huatapaj chunga quilla caj Tebet shuti quillapimi Estertaca, jatun mandajpajman pusharcacuna. 17Jatun mandaj Asueroca, Estertami tucui caishuj huarmicunamanta yalli munarca. Chashna munashpa c'uyashpami, paitaca Vasti shuti huarmipaj randi jatun mandaj cachun coronata churachirca. 18Chai q'uipaca, jatun mandajca, Estertaca tucui huarmicunamanta yalli sumaj huarmi cashcata ricuchingapajmi, pai churashca mandajcunahuanpish, paita servijcunahuanpish jatun micuita rurarca. Shinallataj tucui llajtapi causajcunamanta impuestota japinatapishmi uriyachirca. Jatun mandaj cashcamantami, ima allicunatapish mana llaquishpa achcata shujtajcunamanpish curca.
Jatun mandajta huañuchichun Mardoqueo huillashcamanta
19C'arihuan manaraj chayarinacushca solteracunata cutintaj tandachicujpica, Mardoqueoca mandana huasiman yaicuna pungupimi tiyacurca. 20Esterca, paita huiñachij Mardoqueo yachachishca shinallatajmi mai llajtamanta cashcatapish, maijanpaj huasi ucupura cashcatapish piman mana huillarca. Paica, Mardoqueohuan causacushca shinallatajmi, pai imalla yachachishcataca cazurca. 21Mandana huasi pungupi cuidaj Bigtán, Teres shuti eunucocunaca yallitaj p'iñarishpami, jatun mandaj Asuerota huañuchingapaj parlanacucurcacuna. Chaitaca Mardoqueomi mandana huasi pungullapitaj tiyacushpaca uyarca. 22Chaita uyashpaca Mardoqueoca, jatun mandaj Estermanmi huillarca. Paimi jatun mandaj Asueromanca, caitaca Mardoqueomi huillanaman cachan nishpa huillarca. 23Chaita huillajpimi jatun mandajca, paita huañuchishun nicushcata alli tapuchirca. Chashna tapuchishpami, chashnataj cashcata yachaj chayashpaca, chai ishqui eunucocunataca sipichirca. Chashna imalla tucushcataca, tucui llajtapi ima tucushcata quillcachishca tiyaj libropimi, jatun mandajpaj ñaupajpi quillcarca.
Currently Selected:
ESTER 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.