1 PEDRO 5
5
Ancianocunata yuyachishpa cunashcami
1Cancunapaj ancianocunatami yuyachisha nini. Ñucapish paicuna shinallataj ancianomi cani. Cristo llaquita apashcata ricushcata huillajmi cani. Ñucapish shamuj punlla sumaj ricurinapica, tucui cancunahuanmi alli sumaj ricurisha: 2Dios cancunaman mingashca canlla ovejacunataca alli michichij, ama cuidachun nishcallamanta cuidaichijchu. Ashtahuanpish Dios munashca shina cuidanata munashcamanta cuidaichij. Cullquita japinga raicullaca ama ruraichijchu. Ashtahuanpish ama q'uillashpalla ruraichij. 3Cancuna cuidacushcacunataca, ama quiquin munaita rurashpa mandanguichijchu. Ashtahuanpish canlla ovejacuna ricushpa catinallata ruranguichij. 4Chashna ruracujpi michijcunata Jatun Michij shamujpica, cancunaca mana ismuj, achij nicuj sumaj coronatami chasquinguichij.
Q'uipa huiñaicunata yuyachishpa cunashcami
5Shinallataj q'uipa huiñaicunapish ancianocunata cazuichij. Tucuicuna caishujmanta chaishujmanta cazunacuichij. Mana jatun tucushca cana yuyaita churarichij.
“Jatun tucushcacunataca, Diosca mana ricunachinchu.
Mana jatun tucushcacunamanca paipaj mana c'uyaipajta c'uyaj canatami cun”.
6Tucuita rurai tucuj Diospaj maquipi cashcamanta, ama jatun tucuichijchu. Pai cancunata jatunyachina punlla chayamujpica jatunyachingallami. 7Diosmi cancunataca cuidacun. Chaimanta ima llaquicuna yuyailla canataca paiman mingaichij.
8Cancunata p'iñaj diabloca, león huacaricuj shinami, maijanta millpungapaj muyundijta mashcashpa puricun. Chaimanta yachajcuna caichij, chaparacuichij. 9Cai pachapi tucui crijcunapish cancuna apacushca llaquicunallatataj apacushcata yachashcamanta, crishcapi sinchiyashpa diablotaca mishaichij.
10Mana c'uyaipajta c'uyaiyuj Diosca Jesuscristomanta paipaj huiñaita sumaj canaman cayaj Diosmi. Paica asha llaquicunata apachun saquishpaca, cancunataca allitaj caj tucungacama pi mana cuyuchipaj sinchitami ruran. 11Pai tucuita mandanapish, jatunyachishca canapish huiñai huiñaita cachun. Chashna cachun.
12Ñucaca alli crij huauqui Silvanohuanmi cai asha quillcata quillcashpa cancunapajman cachani. Caita quillcashpaca, Dios cancunata mana c'uyaipajta c'uyashcata yuyachishpami, chai c'uyaimantaca amataj anchurichun cunani.
13Babiloniapi caj tandanacushca crijcunataca, cancunata shinallataj Dios agllashcacunami, chai tandanacushca crijcunapish ñuca huahua shina caj Marcospish cancunataca alli cashca cachun nincunami. 14Caishuj chaishuj c'uyaj muchahuan alli cashca canguichij ninacuichij. Jesucristohuan shujlla cajcunahuanca, tucuicunallahuantaj sumaj causaica cashca cachun. Chashna cachun.
Currently Selected:
1 PEDRO 5: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.