1 PEDRO 4
4
Diospaj mana c'uyaipajta c'uyaita alli apajcunami
1Cristoca ñucanchijmantami paipaj aichapi llaquita aparca. Cancunapish llaquita apana yuyailla allichirichij. Maijanpish aichapi llaquita apajca, juchamantami tucui anchurishca. 2Tucui paipaj crij causaipica, mana runacunapaj munaita rurangapaj ashtahuanpish Diospaj munaita rurangapajmi chashna anchurishca. 3Diosta mana rijsijcuna munashcata ruranataca, ñami sarunman yallitaj rurarcanguichij. Aicha munashcata rurashpa, aichata cushichishpa, machashpa, maipish cachun fiestacunata rurashpa, mana alli yuyaicunallahuan cushicushpa, millanayaj rurashcalla dioscunata adorashpami purircanguichij. 4Cancuna paicunahuan ima millaitapish ruranaman cacharishca shina ña mana rijpimi, imamanta ña mana chashna rurashcata mana yachashpa cancunataca maipish cachun c'amincuna. 5Paicunaca causajcunapish, huañushcacunapish, imalla rurashcata ricuchingapaj allichishca tiyacujmanmi, paicunallataj huillangacuna. 6Shujtajcunata shinallataj llaquichishca cashpapish Dios causacuj shinallataj espirituca causachun huañushcacunamanpish alli huillaitaca huillashcami.
Shujtajcunapaj allita ruranami
7Tucui imalla tiyajcuna tucurinaca chayamucunmi. Chaimanta alli yuyaiyujcuna caichij. Diosta mañashpa chaparaichij. 8Tucuimanta yallica, cancunapurapi tucui shunguhuan c'uyaj caichij. C'uyaica, achca juchacunatapish perdonachijmi. 9Caishuj chaishuj puzachinacuichijlla. Ama huashalla parlanacunguichijchu. 10Tucuicunami Diosmantaca ch'ican ch'ican rurai tucunata chasquircanguichij. Chai rurai tucunahuanca caishuj chaishujpaj allita ruraichij. Chashna cashpami, Diospaj mana c'uyaipajta c'uyashpa cushca tucui laya ruraicunataca alli apanguichij. 11Maijan huillacushpaca, Diospaj shimi nishca shinalla huillachun. Maijan allita rurajca, Dios cushca poderhuan allita rurachun. Jesucristomanta Diostaca, tucuipi jatunyachishca cachun chashna ruraichij. Huiñai huiñaita jatunyachishca canapish, tucuita mandanapish paipajmi. Chashna cachun.
Cristo apashca shinallataj llaquicunata apanami
12C'uyashcacuna, cancuna crijtaj cashcata ricuchij llaquicuna nina shina cancunapajman shamujpica, ima mana ricushcata shinaca ama mancharichijchu. 13Chaipaj randica, Cristo apashca shinallataj llaquicunata apacushcata yuyarishpa cushicuichigari. Chashna llaquita apashcamantaca pai achij nicuj sumaj shamujpica, cancunaca jatuntami cushicunguichij. 14Cristopaj shutimanta c'amishca cashpaca cushichishcami canguichij. Cancunapica Diospaj sumaj Espiritumari causacun. Paicunaca paitami c'amin. Ashtahuanpish cancunaca paitaca jatunyachinguichijmi. 15Chaimanta cancunaca huañuchij cashcamanta, shuhua cashcamanta, millaita ruraj cashcamanta, shujtajcunapajpi satirij cashcamanta shujllapish amalla llaquichishca cachun. 16Cristota catij cashcamanta llaquita apacushpaca, ama pingarichun. Ashtahuanpish Cristota catij cashcamantaca Diosta jatunyachichij. 17Llaquichina punllaca, Diospaj familiapimari ña callarishca. Ñucanchijtaraj chashna llaquichi callarijpica, Diospaj alli huillaita mana chasquijcunacarin ¿imachari tucunga?
18“Cashcata rurajpish llaquicunahuan quishpirijpica, Diosta mana manchaj juchayujcarin ¿imachari tucunga?”
19Dios munashca shina llaquita apajcunaca, paicunata ruraj imatapish pajtachij Diospaj maquipi paicunapaj causaita mingashpa allita ruracuchunlla.
Currently Selected:
1 PEDRO 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.