LUCAS 1
1
Teofiloman Lucas quillcashcamanta
1Tauca runacunami cai ñucanchic llactapi ima tucushcacunataca, callarimanta allita quillcasha nicurca. 2Callarimanta chaicunata quiquin ñahuihuan ricuccunami huillarca. Paicunaca Diospac shimita huillaccunami carca. 3Alli nishca Teofilolla, ñucapish tucui chaicunata callarimanta alli tapushpa, yachac chayashpami, canman sumacta quillcashpa yachanata yuyacurcani. 4Chashnami canman yachachishcaca cierto cashcata yachangui.
Bautizac Juan huacharinamanta
5Judea llactata jatun mandac Herodes mandacui punzhacunapimi, Abías curacunapuramanta Zacarías curapish causarca. Paipac huarmica Aarón curapac huahua huahuapuramanta Elisabetmi carca. 6Zacariaspish, Elisabetpish Diospac ñaupapi cashcata ruhuashpami, allita causarca. Paicunaca Dios mandashcacunatapish, yachachishcacunatapish tucuita pactachicmi carca. 7Elisabetca mana huahuata chari pudircachu. Chaimantami huahua illaclla carcacuna. Ña yuyaccunapishmi carca.
8Shuc punzhaca, Zacarías curacunapuramanta Diosta mañana huasipi Diospacta ruhuanami pactarca. 9Suerteta ruhuacpica, curacuna ruhuac cashca shinallatac, Diosta mañana huasipi, Diospaclla chicanyachishca ucuman yaicushpa, inciensota rupachinami Zacariasman urmarca. 10Pai inciensota rupachicucpica, tucui gentecunami canzha pambapi Diosta mañacurca. 11Mandac Dios cachashca angelmi altar alli ladopi shayacuc Zacariasman ricurirca. 12Chaita Zacarías ricushpaca, manchaihuan imata mana nishpa, upalla saquirirca. 13Ashtahuanpish angelca:
—Zacarías, Diosca can mañashcata uyashcami. Ama mancharichu. Cambac huarmi Elisabetca cari huahuatami charinga. Chai huahuataca Juantami shutichingui. 14Yallitami cushicunguimi. Achcacunami pai huacharishcamantaca cushicunga. 15Paica Diospac ñaupapica alli nishcami canga. Paica vinotapish, machachic yacutapish mana ubiangachu. Mamapac huicsamanta pachami, Diospac Espíritu junda canga. 16Achca israelcunatami, Mandac Diospacman cutichimunga. 17Juanca Quishpichicpac ñaupatami ringa. Huillac Elías shinami, Diospac Espirituhuan, poderhuan ringa. Paimi taitacunahuan, huahuacunahuan piñanacushcatapish alli allichinga. Mana cazuccunatapish cashcata ruhuanata yachachishpami, yuyaita cunga. Chashnami Quishpichic shamucpica, alli chasquina yuyaita charinga— nirca.
18Zacariasca angelta:
—Ñucapish, ñuca huarmipish ña yuyacmi canchic. ¿Ima shinatac can huillashca pactanataca yachasha?— nirca.
19Shina nicpimi angelca:
—Ñucaca Diospac ñaupapi, paita servic ángel Gabrielmi cani. Paimi canman cai alli huillaita huillachun cacharca. 20Ñuca huillashcaca pactana punzhami pactanga. Ashtahuanpish canca ñuca huillashcata mana crishcamantaca, cambac huahua huacharingacamanmi upayashpa, imata mana rimai pudingui— nirca.
21Chaicamanca, canzhapimi achca gentecuna shuyacurca. Shinallatac Diospaclla chicanyachishca ucupi Zacarías unaiyashcamantami mancharicurca.
22Zacarías llucshishpaca, imata mana rimai pudishpami, ima tucushcataca señallahuan huillarca. Chaimantami canzhapi cac gentecunaca “Diospaclla chicanyachishca ucupimi imata ricushca canga” nishpa yuyarca.
23Zacariasca Diosta mañana huasipi servina punzhacuna ña tucuricpimi, huasiman rirca. 24Chai quipami, paipac huarmi Elisabetca huicsayuc tucushpa, pichca quillacunata mana maiman llucshishpa huasillapi carca. Paica: 25«Ñuca mana huahuayuc cashcamanta pipacpish ama pingaichishca cachunmi, Diosca ñucata chashna ruhuashca» nishpami yuyacurca.
Ángel Jesús huacharinata huillashcamanta
26Elisabet ña sucta quillata huicsayuc cacpimi, Diosca ángel Gabrielta Galilea llacta, Nazaret puebloman cacharca. 27Davidpac huahua huahuapuramanta Josehuan cazarangapac ari nishca, María solteramanmi huillangapac rirca. 28María maipi cashcaman ángel yaicushpaca:
—María, Dios canhuan cashcamanta cushicui. Canca tucui huarmicunamanta yalli, alli nishcami cangui— nirca.
29María angelta ricushpa mancharircami. Paipac shungupica, “¿cai rimashcacunaca imatatac nisha nin?” nishpami yuyacurca.
30Chashna yuyacucpimi angelca:
—María, ama mancharichu. Cantaca Diosmi cuyashpa acllashca. 31Canca huicsayuc tucushpami, shuc cari huahuata charingui. Chai huahuataca JESUSTAMI shutichingui. 32Paica mai alli nishcami canga. Jahua pachapi causac Diospac Churi nishcapishmi canga. Mandac Diosca paitaca ñaupa taita Davidpac mandanapimi churanga. 33Taita Jacobopac huahua huahua israelcunatami huiñaita mandanga. Pai mandanaca manatac tucuringachu— nirca.
34Ángel shina nicpimi Mariaca:
—¿Ima shinatac chashna cangayari? Manarac pi carillahuanpish canichu— nirca.
35Chashna nicpimi angelca:
—Diospac Espiritumi shamunga. Jahua pacha Diospac podermi cantaca llandunga. Chaimantami jucha illac huahua huacharinga. Diospac Churi nishcapishmi canga. 36Mana huahuayuc cambac familia Elisabetca, yuyac cashpapish ña sucta quillatami cari huahuata huicsayuc tucushca. 37Diosmanca imapish ruhuaipacllami— nirca.
38Chashna nicpimi Mariaca:
—Can nishca shina ñucataca ruhuachunlla. Ñucaca Mandac Diosta servicmi cani— nirca.
Shina nicpica, angelca paipac ñaupamanta rircallami.
Elisabetta María ricugrishcamanta
39Chai punzhacunapica Mariaca, Judea llacta urcucuna chaupipi tiyac shuc pueblomanmi utca rirca. 40Zacariaspac huasiman yaicushpami Elisabettaca:
—¿Allillachu cangui?— nirca.
41María rimashca uyarincami Elisabetpac huicsapica huahua cuyurirca. Diospac Espiritupish Elisabetpacman shamurcami. 42Chaimantami sinchita caparishpaca:
—Canca tucui huarmicunamanta yalli, Dios alli nishcami cangui. Cambac huicsapi cac huahuapish, alli nishcami. 43¿Ima shinatac ñucata Mandacpac mamaca ricuc shamunguiyari? 44Can ‘allillachu cangui’ nincami, ñuca huicsapi cac huahuaca cuyurirca. 45Canca Dios nishca pactanatami crishcangui. Chaimanta cushicui— nirca.
46Chaimantami Mariaca:
«Ñuca yuyaimi Diostaca
‘allimari cangui’ nicun.
47Ñuca almapish ñucata Quishpichic
Diosmantami cushicun.
48Diosca huaccha servic
huarmitami acllashca.
Cunanmanta pachami
huahua huahuacuna ñucataca
‘allimari cangui’ nicunga.
49Imatapish ruhuaclla Diosca
mancharinacunatami ruhuashca.
Paica jucha illacmi.
50Diosca paita manchaccunataca
huahua huahuacaman llaquicungallami.
51Paipac maquihuanmi
mancharinacunata ruhuashca.
Jatun tucushcacunapac
yuyaitapish chingachishcami.
52Jatun mandaccunata
mandanamanta anchuchishcami.
Huacchacunatami
jahuaman churashca.
53Yarcaihuan caccunamanca,
allicunatami achcata carashca.
Chayuccunataca, chushac maquitami
cachashca.
54Paita servic
israelcunata
llaquinata mana cungarishcachu.
Chaimantami ayudashca.
55Chashna llaquingapacmi
taita Abrahamhuanpish,
paipac huahua huahuacunahuanpish
huiñaicaman ari
nishca» nirca.
56Mariaca Elisabethuan quimsa quilla shinata cashpami, paipac huasiman cutirca.
Bautizac Juan huacharishcamanta
57Elisabetca sajuarina punzha pactacpica, cari huahuatami charirca. 58Chaita uyashpaca, Dios cuyac cashcata yachashpami, vecinocunapish, paipac familiacunapish Elisabethuan cushicungapac rirca. 59Ña pusac punzhapimi chai huahuata circuncisionta ruhuachingapac rircacuna. Chashnami taitapac shuti Zacariasta shutichishun nirca. 60Shina nicucpimi Elisabetca:
—¡Mana! Juan shutimi canga— nirca.
61Chashna nicpica:
—¿Imamantatac chaita shutichisha ningui? Cancunapurapica, Juan shutica mana tiyanchu— nirca.
62Chaimantami taitata señallapi huahua ima shuti canamanta tapurca. 63Shina tapucpimi, taita Zacariasca uchilla tablata mañashpa: “Juan shutimi canga” nishpa quillcarca. Chaimantami tucui gentecuna mancharirca. 64Chai ratomi callu huatarishca cachariricpi, Zacariasca Diosta: «allimari cangui» nirca. 65Chashna tucucpica, tucui vecinocunami yallita mancharirca. Chaica tucui Judea llacta urcucunapimi yacharirca. 66Tucui chaita uyaccunaca: «Cai huahua jatunyashpaca, ¿imalayashi canga?» nishpami, shungullapi yuyacurca. Mandac Diosmi chai huahuahuan carca.
Chai huahua ima shina canata Zacarías huillashcamanta
67Juanpac taita Zacariasca Diospac Espíritu yuyaita cucpi, ima shina canamanta huillashpaca:
68«Israelcunata
Mandac Diosca alli nishca cachun.
Paimi pai acllashcacunata
quishpichingapac shamushca.
69Diosta servic Davidpac
huahua huahuapuramanta,
imatapish ruhuaclla
Quishpichicta cachashca.
70Pai ima nishcata huillac,
jucha illac huillaccunamanmi,
utcaman huillachishca carca.
71Paicuna huillashca shinami,
ñucanchicta piñashpa
mana ricunayachiccunapac maquimanta
quishpichinga.
72Ñaupa taitacunata llaquishpa,
paipac sumac ari nishcata
mana cungarishpa pactachicungami.
73Diosmi ñucanchic
taita Abrahamhuan
ari nishcataca
pactachishca.
74Ñucanchic imata mana manchashpa,
paipacta ruhuac cachunmi,
piñaccunapac maquimanta cacharichinga.
75Tucui ñucanchic causaipi
paipac ñaupapi allillata ruhuashpa,
causachunmi,
chashna cacharichinga.
76Ñuca huahualla,
canca jahua Dios
ima nishcata huillacmi cangui.
Canmi Quishpichic purina ñanta
allichishpa ñaupangui.
77Pai acllashcacunapac
juchacunata perdonashca cachunmi,
quishpirinamanta yachachingui.
78Ñucanchic Diosca,
pai cuyashcamantami,
tutamanta inti achicyamucuc shina,
quishpirinata jahua pachamanta cachanga.
79Amsapi causaccunatapish,
purapi huañunalla causaccunatapish
achicyachishpami,
ñucanchicta sumac causai
ñanta pushangami» nirca.
80Chai huahuaca huiñashpami Diosmanta ashtahuan yachacushpa, israelcunaman huillana punzha pactangacaman shitashca pambapi causarca.
Currently Selected:
LUCAS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.