MARCOS 16
16
Jesús causarishcamanta
(Mt 28.1-10; Lc 24.1-12; Jn 20.1-10)
1Samana punzha tucuricpimi, Magdala pueblomanta Mariapish, Jacobopac mama Mariapish, Salomepish mishquilla ashnacucta Jesuspac cuerpopi churangapac randirca. 2Chaita apashpami, semana callari punzha, cunan inti llucshimucucta Jesusta enterrashcata ricungapac rirca. 3Paicuna ricushpaca:
—Enterrashca jutcuta tapashca rumitaca, ¿pitac anchuchingayari?— ninacushpami ricurca.
4Paicuna chayashpaca, rumica ña anchuchishcami cashca carca. Chai rumica jatun rumimi carca. 5Chai ucuman yaicushpaca, alli ladoman shuc moso suni yurac churanata churashca tiyacuctami ricurca. Paita ricushpaca, yallitami mancharirca. 6Ashtahuanpish chai mosoca:
—Ama mancharichicchu. Cancunaca Nazaret pueblomanta cruzpi chacatashca Jesustami mashcacunguichic. Paica ña causarircami, mana caipichu. Maipi paita churashcapi ricuichic. 7Cunanca Pedromanpish, caishuc yachacuccunamanpish: “Jesusca Galilea llactamanmi cancunapac ñaupata rin. Chaipimi pai nishca shina, ricunguichic” nishpa, utca huillagrichic— nirca.
8Chai huarmicunaca manchaihuan chucchushpami, jutcumanta utca llucshirca. Chaimantami pimanpish imata mana huillashpa upalla rircacana.
Magdala pueblomanta Mariaman Jesús ricurishcamanta
(Jn 20.11-18)
9[Jesús semana callari punzha, tutamanta causarishpaca, Magdala pueblomanta Mariamanmi punta ricurirca. Chai Mariamantami Jesusca canchis supaicunata llucchishca carca. 10Paimi Jesuspac yachacuccunapacman rishpa huillarca. Paicunaca llaquillami huacacushca carca. 11Paicunaca Jesús causarishcatapish, María ricushcatapish mana crircacunachu.
Jesús ishcai yachacuccunaman ricurishcamanta
(Lc 24.13-35)
12Chai quipaca, Jesusca paipac ishcai yachacuccunamanmi shuctaclaya ricurirca. Paicunaca pueblomanta llucshishpami ricurca. 13Paicunaca caishuc yachacuccunamanmi huillagrirca. Paicunapish mana crircachu.
Jesús huillagrichun mandashcamanta
(Mt 28.16-20; Lc 24.36-49; Jn 20.19-23)
14Chai quipaca, Jesusca paipac chunga shuc yachacuccuna micucucpimi ricurirca. Causarishcata mana crishcamanta, rumi shungu cashcamanta, causarishcata ricushcata mana crishcamantami rimarca.
15Shinallatac paicunataca:
—Tucui pachata rishpa, alli huillaita tucui gentecunaman huillagrichic. 16Maijanpish crishpa, bautizaricca quishpiringami. Ashtahuanpish mana cricca, juchanchishcami canga. 17Ñucata criccunaca milagrocunatami ruhuanga: Ñuca shutipimi supaicunata llucchishpa cachanga, mushuc rimaicunatami rimanga. 18Culebracunata maquihuan japirishpapish, ima venenocunata ubiashpapish, mana ima tucungachu. Shinallatac ungushcacunapac uma jahuapi maquita churacpica, alliyangallami— nirca.
Jahua pachaman Jesús rishcamanta
(Lc 24.50-53)
19Apunchic Jesús paipac yachacuccunata mandashca quipaca, Diosmi jahua pachaman pusharca. Chaipimi paipac alli lado maquiman tiyarirca. 20Yachacuccuna rishpaca, tucui gentecunamanmi huillarca. Chashna huillacucpica, Apunchic Jesusmi paicunataca ayudac carca. Milagrocunata ruhuachishpami, Jesusca paicunahuan cashcataca ricuchicurca.]
Currently Selected:
MARCOS 16: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.