LUCAS 2
2
Jesús huacharishcamanta
(Mt 1.18-25)
1Chai punzhacunapica Roma llactata jatun mandac Augustomi, tucui llactapi causaccuna shuticunata quillcachichun mandarca. 2Chai quillcachinaca, Cirenio runa Siria llactata mandacucpimi callarirca. 3Tucui gentecunami paicuna huacharishca llactapi quillcaringapac rina carca.
4Joseca Davidpac huahua huahuapura cashcamantami, Galilea llacta Nazaret pueblomanta ñaupa mandac Davidca huacharishca Judea llacta Belén puebloman rirca. 5Chaimanca paihuan cazarangapac ari nishca Mariahuanmi, shutita quillcachingapac rirca. Mariaca huicsa jundami carca. 6Paicuna Belenman chayacpimi, María sajuarinaca pactarca. 7Pozana huasi mana pactashcamantami, paipac punta cari huahuataca huagracuna shayana ucupi sajuarirca. Chai huahuataca maitushpami, ucsha jahuallapi sirichirca.
Angelcuna michiccunaman huillashcamanta
8 Chai Belén pueblo lado pambapica, michiccunami ovejacunata tuta cuidacurca. 9Chaipimi Dios cachashca angelca Diospac sumaimana achic nicuc-huan ñapish cungailla paicunapac muyundita achicyachirca. Chaimantami michiccunaca yallita mancharirca. 10Chaimantami angelca:
—Ama mancharichicchu. Cancunaman alli huillaita huillangapacmi shamuni. Caita uyashpaca, tucuimi yallita cushicunga. 11Cunanmi David huacharishca Belén pueblopi Quishpichic huacharishca. Paica tucuita Mandac, Quishpichic Cristomi. 12Cancuna rishpaca, huagracuna shayana ucupi maitushca huahua ucsha jahuapi siricuctami ricunguichic— nirca.
13Chashna huillacucllapitacmi, cungailla jahua pacha angelcuna, chai angelhuan Diosta alli nishpaca:
14«¡Jahua pacha Diosca,
alli nishca cachun!
¡Dios cuyashcacunaman
cushi tiyachun!» nirca.
15Jahua pachaman angelcuna rishca quipa, michiccunaca:
—Dios huillashca ima cashcata ricungapac, Belenman jacuchic— ninacurca.
16Chashna utca rishpaca, huagracuna shayana ucupi Josetapish, Mariatapish, ucsha jahuapi huahua siricuctapishmi ricurca. 17Chaita ricushpaca, ángel chai huahuamanta paicunaman imata nishcatami parlarca. 18Michiccuna parlacpica, tucui uyaccunami mancharishca saquirirca. 19María tucui chaicunata uyashpaca paipac shungupimi yuyarishpa causacurcalla. 20Michiccunaca paicunaman huillashca shinallatac ricushpa uyashpaca, Diosta “allimari cangui, sumacmari cangui” nishpami cutirca.
Diosta mañana huasiman Jesusta apashcamanta
21Huahua pusac punzha tucucpica, circuncisionta ruhuachishpami, María manarac huicsayuc cacpi, ángel huillashca shina, JESUSTA shutichirca.
22Moisés mandashca shina sajuarishca quipa chuyayana punzhacuna pactacpica, huahua Jesusta Diosman ricuchingapacmi Josehuan Mariahuan Jerusalenman rirca. 23Mandac Dios mandashcapica: «Tucui punta huacharishca cari huahuacunaca, Diospaclla chicanyachishcami canga» nishcamanta, 24shinallatac: «Ishcai urpita, mana cashpaca ishcai huahua palomata cungui» nishcamantami chashnaca ruhuarca.
25Simeón shuti runami Jerusalenpi causarca. Paica Diosta cazucpish, cashcata ruhuacpishmi carca. Paica israelcunata Dios quishpichingapac shamuctami shuyacurca. Diospac Espiritumi paihuan carca. 26Diospac Espiritumi: “Dios cachashca Cristota ricungacaman, canca mana huañunguichu” nishca carca. 27Simeonca Diospac Espíritu pushacpimi, Diosta mañana huasiman rirca. Chaimanmi mandashcapi nishca shina ruhuangapac, taita mamaca huahua Jesusta apamurca.
28Simeón chai huahuata marcashpa, Diosta pagui nishpaca:
29«Dioslla,
can mandashpa nishca shina,
canta servic runataca
cushicuihuan huañuchun saquilla.
30Can cachashca Quishpichictaca,
ñuca ñahuihuantacmi ña ricuni.
31Paitaca tucui llactacuna
ricuchunmi cachashcangui.
32Mana israelcunamanca,
achicyachic luz shinami canga.
Pai acllashca israelcunapacca
mandacmi canga» nirca.
33Josepish, paipac mamapish huahua Jesusmanta Simeón imata nishcata uyashpaca mancharishpami saquirirca. 34Simeonca paicunata Dios bendiciachun nishca quipa, Mariataca:
—Riqui, cai huahuataca achcacuna quishpirichun, cutin maijancunaca chingarichunmi Diosca Israelpi churashca. Pai Diospac munaita ricuchicpimi, yallita piñanga. 35Shinallatac achcacuna yuyacushcapish yacharingami. Llaquica shuc espada shunguta chaupishpa pasac shinami llaquichinga— nirca.
36Shinallatac Dios ima nishcata huillac, yuyac Ana huarmipish chaipimi carca. Paica ñaupa taita Aserpac aillupuramanta Fanuelpac ushimi carca. Paica huambrarac cazarashpapish canchis huatallatami cusahuan causarca. 37Paica pusac chunga chuscu huatatami viuda carca. Chai yuyac huarmica Diosta mañana huasimanta mana llucshishpami, punzhanta Diosta servishpa, mañashpa ayunashpa, causac carca. 38Chai huarmi, chai horasllatac shamushpami, chai huahuamanta Jerusalén llactata Quishpichicta shuyaccunaman parlai callarirca.
Nazaret puebloman cutishcamanta
39Dios mandashcacunata tucui pactachishpaca, Joseca Mariandimi paicuna causana Galilea llacta Nazaret puebloman cutirca. 40Huahuaca huiñashpa, sinchiyashpa, ashtahuan yachac tucushpami catirca. Diosca yallitami paita cuyarca.
Jesús Diosta mañana huasipi cashcamanta
41Jesuspac taita mamaca huatantami Pascua fiestapica Jerusalenman ric carca. 42Chashna ric cashca shinallatacmi, Jesús chunga ishcai huatayuc cacpi, Jerusalenman rirca. 43Fiesta tucuricpi, taita mama huasiman cuticpica, Jesusca Jerusalenpimi saquirishca carca. Chaitaca Josepish, Mariapish mana yacharcachu. 44Paicunaca “shuctac gentecunahuanmi ricunga” yuyashpami, tucui punzha rircalla. Chaimanta familiacunapurapi, ricsishcacunapurapi Jesusta mashcashpa, 45mana tarishpaca, Jerusalenllapitac mashcangapac cutircacuna.
46Ña quimsa punzhapimi, Diosta mañana huasipi mandashcacunata yachachiccunahuan, paicunata uyashpa, tapushpa tiyacucta tarircacuna. 47Jesús yachac cashcamanta, tucui tapushcata cutichicpimi, paita uyaccunaca mancharircacuna. 48Taita mama Jesusta ricushpaca, mancharircami. Chaimantami paipac mamaca:
—Huahua, ñucanchicca yallita mancharishpami mashcacurcanchic. ¿Imamantatac caita ruhuangui?— nirca.
49Chaimantami Jesusca:
—¿Imapactac mashcacurcanguichic? ¿Manachu Taitapac huasipi ñuca cana cashcataca yacharcanguichic?— nirca.
50Taita mamaca chai nishcata mana entendircachu.
51Jesusca taita mamahuanmi Nazaret puebloman cutimushpa, paicunata alli cazushpa causarca. Paipac mamaca tucui chaicunacata shungupi huacaichishpami causacurca. 52Jesusca huiñashpa, ashtahuan yachac tucushpami catirca. Diospacpish, gentecunapacpish cuyashcami carca.
Currently Selected:
LUCAS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.