JOB 17
17
1Ñuca samaica tucuricunmi.
Ñuca causai punzhacunapish
tucurimunmi.
Ñucata enterrarina jutcupish
shuyacunmi.
2Ñucata asiccunallami
muyushpa shayacuncuna.
Ñuca ñahuica paicuna
llaquichishcallatacmi ricucun.
3Sumac Dioslla,
ñucapac randi shayariyari.
¿Can ñucamanta mana shayaricpica,
pitac shayaringayari?
4Canmi paicuna ama entendichun
yuyaicunatapish anchuchishcangui.
Chashnami paicunataca
yangallata ruhuashcangui.
5Maijanpish imata japishpa
paicunapac ricsishcacunata
llaquichichun huillacca
paicunapac huahuacuna
huañuctami ricunga.
6Paimi ñucataca yuyaita japina
rimaicunahuan tucuipac
rimanata ruhuashca.
Ñucataca tucuimi ñahuipi tucancuna.
7Ñuca ñahuicunaca
yallita llaquihuan
cashpami amsayashca.
Tucui ñuca cuerpoca
llandu shinallami.
8Chaita ricushpami
allita ruhuaccunaca mancharinga.
Mana juchayuc runaca
Diosta mana manchac runatami
llaquichingapac jataringa.
9Ashtahuanpish cashcata
ruhuac runaca,
cashcata ruhuashpa caticungallami.
Ima mana allita ruhuac
chuya maqui runaca
ashtahuanmi sinchi tucunga.
10Ashtahuanpish cunanca
tucui cancuna cutimuichiclla.
Cancunapurapi yuyaisapa runataca
mana tarishachu.
11Ñuca causai punzhacunapish
tucurishcami.
Ñuca imata yuyacushcapish
chingarishcami.
¡Ñuca shungupi imata munashcapish
anchurishcami!
12Paicunami tutataca
punzhata ruhuarca.
Chairac tuta cacpiracmi
achicca ñami chayamun nincuna.
13Ñucaca Seoltami
ñuca huasita shina shuyacuni.
Amsa purapimi ñuca camata ruhuasha.
14Ñuca ismushpa tucurinataca:
“Canca ñuca taitami cangui” nini.
Curucunataca: “Ñuca mama,
ñuca panicunami canguichic” nini.
15Cunanca ñuca shuyanaca,
¿maipitacyari?
Ñuca shuyacushcataca,
¿pitac ricungayari?
16Seol ucumanmi ñucahuan ringa.
Ñuto allpapimi tandanacushpa
samarishun» nirca.
Currently Selected:
JOB 17: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.