JOB 18
18
Bildad cutinllatac rimashcamanta
1Suhitapuramanta Bildadca:
2«¿Ima horascamantac
rimarinata saquigringui?
Yuyaita alli japi.
Chai quipaca parlanacushunllami.
3¿Ima nishpatac ñucanchictaca
animal shina cashcata yuyangui?
¿Ima nishpatac ñucanchictaca
yuyai illac cashcata yuyangui?
4¡Yallita piñarishpa
tucuricuc runalla!
¿Canllamantachu llactaca
shitashca saquiringa?
¿Rumi quingraicunapish
tiyacushca pushtumantaca
cuyuchishcachu canga?
5Diosta mana manchaccunapac
achicyachic lamparaca
huañuchishcami canga.
Chai ninapish ashtahuan llamataca
mana cungachu.
6Achicyachicpish paicunapac huasipica
amsayangami.
Paicunapi cac lamparapish huañungami.
7Sinchita puric cashpapish
allimantami puringa.
Paitaca, pai imata
yuyacushcallatacmi urmachinga.
8Paipac chaquillatacmi
tucllapi urmachinga.
Chai tucllapimi churarishpa saquiringa.
9Shuc huascami paipac chaquipi
churarishpa urmachinga.
Paita japingapacca
tucllatami churanga.
10Paita urmachingapacmi huascaca
pambapi pacalla tiyacun.
Paita japina tucllapish
pai purina pushtupimi tiyacun.
11Tucui ladomantami llaquicuna
shamushpa manchachinga.
Chaqui talonpi saruc shinami
yallita manchachishpa catinga.
12Yarcaihuanmi paipac
fuerzata tucuchinga.
Paipac ladollapitacmi
llaquicunaca allichishca tiyacun.
13Ungüica huañuipac cuchullapimi.
Jahualla carata ismuchishpami,
paipac cuerpotaca micushpa
tucuchinga.
14Paipac huasipi mana manchashpa
sumacta causacucpipish,
chaimanta llucshishpami,
yallita manchachic jatun
mandaccunapacman apashca canga.
15Paipac huasipica,
mana paipac huasipi shinami causanga.
Paipac huasi jahuapica
azufremi shic-huashca canga.
16Allpa ucupi sapicuna
chaquic shinami, jahuamanca
ramacuna pitic shinami canga.
17Paica cai pachapica
chingarishcami canga.
Paipac shutipish cai llactapica
cungarishcami canga.
18Achicyachicmanta llucchishpa,
amsapi shitashcami canga.
Cai pachamantapish llucchishpa,
cachashcami canga.
19Paipac aillupurapica,
churicunatapish, nietocunatapish
mana charingachu.
Pipish paipac huasipica
mana causangachu.
20Inti tigrana ladomanta
shamuccunaca pai ima tucushcata
yachashpami mancharinga.
Inti llucshina ladomanta
shamuccunapish
yallita manchaihuanmi saquiringa.
21Diosta mana manchaccunapac
causana huasica chashnami canga.
Diosta mana ricsic runapish
shinallatacmi tucunga» nirca.
Currently Selected:
JOB 18: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.