JOB 16
16
Job Elifaz rimashcata cutichishcamanta
1Jobca:
2«Cashna nishcataca
achca cutinmi uyashcani.
Cancunaca cushichinapac randica
llaquichicunguichicmi.
3Yuyai illac shina rimashcacunaca
¿manachu tucurin?
Cutichishpa catingapacca
¿pitac cantaca rimachicun?
4Ñuca shina cancuna cacpica,
ñucapish cancuna shina
imatapish nimanllami.
Ñucapish umata cuyuchishpa,
cancunata piñachishpa rimaimanllami.
5Ashtahuanpish ñuca
rimashpaca cushichimanmi.
Ñuca rimashca cushichishpami
cancunapac nanaita samachiman.
6Ñuca rimacpica,
ñuca nanaica mana tucuringachu.
Upalla cacpipish mana anchuringachu.
7Diosmi ñucataca yallita shaicuchishca.
Tucui ñuca ricsishcacunatami
caruyachishca.
8Ñuca cuerpotami muruyachishca.
Ñuca irquiyashcataca
ñuca ñahuillatacmi ricuchicun.
Chaimantami ñuca cuerpoca
tullulla saquirishca.
9Pai yallita piñarishpami
ñucataca pitinacuc shina ruhuashca.
Quirucunapish canirishpami
ñucataca piñarca.
Ñucata piñac runaca nanachic
shinami ricucurca.
10Ñucata piñashpami rimarircacuna.
Ñucata rimashpa llaquichishpami
chulla lado ñahuipi huactashpa
chugrichircacuna.
Ñucata piñashpami tucui
mashna tandanacurca.
11Diosca llullac runacunapac
maquipimi churashca.
Paita mana manchaccunapac
maquipi urmachunmi saquishca.
12Ñuca sumacta causacucpimi,
ñutuchic shina saquirca.
Cungamanta japishpami
pitinacuc shina ruhuarca.
Lanzahuan shitangapac ricuchic
shinatami ruhuarca.
13Paipac flechata shitac runacunami
ñucataca muyushpa shayarircacuna.
Mana llaquishpami
ñuca riñoncunatapish pasachinacushca.
Chashna ruhuacpimi
ñuca hielpish pambapi tallirirca.
14Ñucataca catipi catipimi
llaquichirca.
Sinchita macanacuc runa catic
shinami llaquichirca.
15Sharpa churanataca llutac shinami
ñuca cuerpopi churarircani.
Ñuca umataca ñuto allpapimi pambarcani.
16Ñuca yallita huacacpimi
ñahuica punguillishca.
Ñuca ñahuipish amsayashpa
ña mana ricunchu.
17Chashnami ñuca maquihuan,
ima mana allita
ruhuashca cashpapish,
alli shunguhuan paita
mañac cashpapish,
cashna llaquihuan causacuni.
18¡Allpalla, ñuca yahuartaca
ama tapaichu!
¡Can tapacpica,
ñuca caparinapish illangami!
19Ñucamanta huillacpish,
ñucamanta rimacpish
jahua pachapimi can.
20Ñucamanta rimaccunaca
ñuca ricsishcacunallatacmi.
Ashtahuanpish Diospac ñaupapimi
huiquita urmachishpa mañasha.
21¡Runa paipac ricsishcahuan
rimaric shina Dios-huan
rimari pudishpachari alli canman!
22Ñuca mana ashtahuan cutina ñanta
japishpa ringapacca
asha huatacunallami tiyan.
Currently Selected:
JOB 16: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.