JOB 6
6
Job paipac ricsishcacunata rimarishcamanta
1Shina nicpimi Jobca:
2«Ñuca llaquicunata,
ñuca nanaicunata tandachishpa,
balanzapi churaipac cacpica,
3mama cuchapi tiyac tiyutapish
yallimi llashanman.
Chaimantami ñucaca
jatun tucushpa rimarishcani.
4Tucuita ruhuac Diospac
flechacunami ñucapi yaicushca.
Chai flecha venenotami
ñuca almaca ubiashca.
Diospac jatun manchaimi
ñucahuan macanacucun.
5¿Sacha burro quihuapi
cashpaca huacangachu?
¿Huagrapish quihuapi
cashpaca huacangachu?
6¿Cachi illac micunaca
micuringachu?
¿Ruru claraca mishquichu canga?
7Ñuca mana munashcacunatami
cunanca micucuni.
8¡Dios, ñuca mañashcata
pactachishpachari alli canman!
¡Dios, ñuca munashcata
cushpami alli canman!
9Dios ñucata,
ñutuchishpachari alli canman.
¡Paipac maquita chutashpa,
ñucata tucuchishpachari alli canman!
10Jucha illac Dios rimashcatami
cazushpa causarcani.
Chaimanta ñuca jatun llaquicuna
chaupipi cashpapish cushicuiman.
11¿Ima fuerzahuantac ashtahuan
sinchiyashayari?
¿Imapactac causashpa caticushayari?
12¿Ñuca fuerzaca rumi shinachu?
¿Ñuca cuerpoca bronce shinachu?
13Ñucallaca mana fuerzata charinichu
Ñucata pi ayudacpish mana tiyanchu.
14Llaquihuan causac runaca
tucuita ruhuac Diosta
mana manchac cashpapish
paihuan apanacuc runata charinmi can.
15Ashtahuanpish ñucataca
ñuca huauquicunallatacmi,
yacu jundashpa
shamuc shina llaquichin.
Manchana jatun yacu shamuc shinami
llaquichincuna.
16Paicunaca casa tapashca,
rasu tapashca yacu shinami.
17Casaca tutamanta rupai shamucpica
yacuyanllami.
Punzha rupaipica maipi cashcamanta
chingarinllami.
18Paicuna tandanacushpa ricushpapish,
caita chaita rincunallami.
Shina rishpami ashancaman ashancaman
shitashca pambapi chingarin.
19Chai yacutaca Temán llactamanta
shamuc gentecunami mashcan.
Sabá llactamanta puric runacunami
chai yacutaca shuyancuna.
20Ashtahuanpish paicuna shuyacushca
mana ricuricpimi llaquirincuna.
Chai yacu tiyac pushtuman chayashpapish,
yacuta mana tarishpami
ubiana munaillahuan saquirincuna.
21Cunanca cancunapish,
chashnallatacmi canguichic.
Jatun llaquihuan cacta ricushpaca,
mancharinguichicmi.
22¿Ñucaca: “Cancunapac
haciendamanta imata apamui”
nircanichu?
Mana cashpaca, ¿ñucata
quishpichingapac imallatapish
cuchun nircanichu?
23Mana cashpaca: “¿Ñucata
piñaccunapac maquimanta
cacharichi” nircanichu?
Mana cashpaca:
“¿Millai gentecunapac maquimanta
quishpichichicyari” nircanichu?
24Ñuca upalla cachunca
yachachichicyari.
Ñuca pandarishca cacpica
ricuchichicyari.
25¡Allita rimashca
shimicunaca cushichinmi!
Ashtahuanpish cancuna rimashcaca
imatapish mana ruhuanchu.
26¿Imata mana ruhuanata pudic
rimashcatachu huaira shina
cashcata yuyashpa
jarcashpa rimaringuichic?
27Cancunaca taita
mama illac huahuatapish,
randinguichicmanmi.
Cancunapac alli ricsishcacunatapish
imahuan cambianguichicmanmi.
28Cunanca ñuca ñahuita ricungapac
shamushca cashpaca ricuichiclla.
Cancunapac ñaupapi imata
llullashca cacpica chapaichiclla.
29Cunanca, alli yuyaita
cutin japishpa, ama millaita
rimaichicchu.
Ñucataca imatapish cashcata ruhuac
cashcata cutin yuyaringuichic.
30¿Ñuca callutaca llullac
cashcatachu yuyanguichic?
Ñuca mana alli shimicunata
rimacushcataca
¿Manachu ñucallatac yachai pudini?
Currently Selected:
JOB 6: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.