JOB 5
5
1«Cunanca sinchita capariyari.
Maijan uyanchu imami.
¿Maijan jucha illactatac mañagringui?
2Yuyai illac runataca
piñarina yuyai,
shuccuna charishcata
munana yuyaimi huañuchicun.
3Sinchi shungu runataca
sapiyashca shina ñaupaman
rictami ricurcani.
Shina cacpipish paipac huasitaca
chai punzhallatacmi maldiciarcani.
4Paicunapac huahuacunataca
pi mana quishpichingachu.
Puebloman yaicuna pungullapitacmi
llaquichingacuna.
Paicunataca pipish mana ayudangachu.
5Paipac granocunataca,
yarcaihuan caccunami micunga.
Casha chaupipi cacpipish,
llucchishpami apangacuna.
Paicuna charishcataca
yacunayaihuan shinami tucuchinga.
6Millaica mana ñuto
allpamantachu llucshin.
Llaquipish mana allpamanta llucshin.
7Shina cacpipish, rupacuc nina
saltashpa huañuc shinami runapish
llaqui tucungapac huacharin.
8Ñucaca Diostami mashcaiman.
Paimanmi ñuca llaquitaca mingaiman.
9Paica pipish mana ruhuaipac
mancharinacunata, shinallatac
mana yupaipac sumaimanacunatami ruhuan.
10Cai pachamanpish,
tarpushca pambacunamanpish
tamyatami cachan.
11Yangalla runacunataca
jatun alli nishcatami ruhuan.
Manchailla causaccunamanca
cushilla causaitami cun.
12Millaita ruhuangapac
yuyaita chariccunataca
paicunapac maquihuan
ama imata ruhuachunmi pandachin.
13Jatun yachaccunataca
paicunapac yachashcallapitacmi
urmachin.
Millaita ruhuaccunataca
paicuna yuyarishcatami pandachin.
14Paicunaca punzha pachami
purapi shina huactarincuna.
Chaupi punzhapimi tutapi shina
mitcarishpa purincuna.
15Millai runacuna rimashpa
llaquichiccunapac maquimantapish,
espadahuan huañuchinamantapish
imata mana chariccunataca
quishpichinmi.
16Imata mana charicca
Diosllapimi shunguta churan.
Ashtahuanpish mana allita
ruhuashcaca shimitami huichcan.
17¡Dios llaquichishca runaca
alli nishcami can!
Tucuita ruhuac Dios llaquichicpica,
ama yangapi charinguichu.
18Pai chugrichishpapish
paillatacmi jambin.
Pai nanachishpapish
paillatacmi allichin.
19Sucta cutin llaquicuna
japicpipish, cacharichingami.
Canchis llaquica ña mana japingachu.
20Yarcaihuan huañugricucpipish
quishpichingami.
Jatun macanacuipi espadahuan
huañunamantapish quishpichingami.
21Millaita rimac callumantapish
miticunguimi.
Chingachic llaquicuna shamucpipish,
mana manchanguichu.
22Chingachic llaquicuna japicpipish,
yarcai japicpipish asinguimi.
Sacha animalcunatapish
mana manchanguichu.
23Pambapi tiyac rumicunahuanmi
ari ningui.
Sachapi causac animalcunahuanpish,
sumactami causangui.
24Cambac huasipi sumac cushilla
cashcatapish yachanguimi.
Cambac causana huasipi
ricungapac yaicucpica,
imapish mana illangachu.
25Canca achca huahuacunatami
charingui.
Cambac huahua huahuacunaca
pambapi quihua tiyac shinami canga.
26Cosechanalla trigota
sinchirac cacpi tandashca shinami,
sinchirac cacpi enterrana jutcuman
apashca cangui.
27Caitami taripashpa yachashcanchic.
Chaica chashnatacmi can.
Canca caita uyashpaca
cambac allipacllata
allita yachacui» nirca.
Currently Selected:
JOB 5: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.