1 Timoteo 5
5
Tɔá Abɔ́bwɛ Ha Ahogyipʋ
1Mákplʋn wa oyin dɛhɛn. Mboun tɔɩ bla mʋ asʋn fɛ fʋ sɩ. Kɩta nyasubi amʋ fɛ alɩá fɛ́kɩta fʋ apio yinhɛ. 2Kɩta atsɩ dɛhɛn amʋ fɛ fʋ yin, afʋkɩta mbitebi amʋ ɛ fɛ fʋ apio tsɩhɛ. Máwa amʋ́ mba.
3Ɔpasua amʋ bʋkɩ asʋrapʋá bʋhɩɛ bʋma ɔbʋapʋsʋ. 4Tamɛ nɩ ɔsʋrapʋ ɔkʋ bʋ abi ntɛ aná a, ha amʋ́ abʋbɩ tɔá ilehian ánɩ́ bégyankpa bwɛ ha amʋ́ akwɩɩpʋ ntɛ amʋ́ aná Bulusum ɔkpasʋ, pʋka amʋ́ akɔ. Mʋ́gyi amʋ́sʋ kɩ, tsufɛ mʋ́tegyi Bulu ansɩ nɩ. 5Ɔsʋrapʋá ɔhɩɛ ɔma ɔhaa tɔpʋ ansɩ dɩnka Bulusʋ, tsia bɔ mpaɩ ɔpa onye, kʋlɩ Bulu tɔá ɩdɛ mʋ hian. 6Ɔsʋrapʋá mʋ klɛ gyi nkpagyi kotoo mʋ́ lawu asa ɔna ɔyɩtɔ. 7Bla ɔpasua amʋ asʋn anfɩ, mɛnɩ ɔhaa mɛ́ɛblɩ ɔsʋrapʋ ɔkʋkʋ ɩwɩ asʋn lalahɛ. 8Nɩ ɔkʋ mɛkɩ mʋ abusuanfɔsʋ, titriu mʋ woyitɔ ahasʋ a, mʋmʋ aladamli ɔma ha hogyi amʋ. Ɩnɩ sʋ mʋ lakpan dʋn ɔha ánɩ́ ɔmɔhɔ Bulu gyi.
9Ɔsʋrapʋ oduá mʋ ɩda bétsia asʋrapʋ ada ɔwʋlʋtɔ gyi, ɔsʋrapʋá alahɔ tsu nfi aduesie pʋya, ɔlɔwa ɔnɔkwalɩ ha mʋ klu.#5:9 Ɔsʋrapʋá ɔmɔkʋkina oklu kɩ. 10Ɔbwɛ ɔha ánɩ́ aha bʋyin ánɩ́ ɔlɔbwɛ yile, fɛ abisʋkɩ, afɔɔhɔ, olosum Bulu aha,#5:10 olosum Bulu aha ntɛ ɔtɔfwɩ ahogyipʋ ayabiasɩ. ɔtɔbʋa aha ánɩ́ bʋdɛ ɩwɩɔsɩn wun, ɔlɔbwɛ agyʋma wanklaan kugyikʋ.
11Máwanlɩn asʋrapʋá bʋmɔkʋdan ada wa ɔwʋlʋ amʋtɔ, tsufɛ nɩ amʋ́ ɔwɔlɩ ɩha amʋ́ bɔbwɛ agywɩɩn ánɩ́ bɛlatsia aklu a, bʋmɛ́ɛtra talɩ sum Kristo ɔnɔkwalɩsʋ. 12Ɩnɩ ɩbɛ́ha bégyi pɔn, tsufɛ batʋn amʋ́ ntam ánɩ́ bɛka ha Bulu. 13Ɔma a, bʋtɛbɩ ɔwʋlɩyɔ wa, yinta brɛ natɩ ki aha woyitɔ. Megyi ɔwʋlɩyɔ wʋlɛ, bʋtemli aha ɩwɩ asʋn ablɩpʋ, natɩ wa ɔnɔ aha asʋntɔ, blɩ asʋn ánɩ́ imehian ánɩ́ bɛ́blɩ. 14Ɩnɩ sʋ ndekleá asʋrapʋ amʋʋ bʋmɔkʋdan amʋ bʋwuna tsia aklu kwɩɩ abi, abʋkɩ amʋ́ woyisʋ, mɛnɩ bʋmɛ́ɛha anɩ alupʋ#5:14 Ntɛ olupʋ ɔkpa abʋblɩ anɩ ɩwɩ asʋn lalahɛ kʋkʋ. 15Ndɛ asʋn anfɩ blɩ, tsufɛ asʋrapʋ akʋ badamli yɔ bʋbuo Ɔbʋnsam dodo. 16Nɩ Okristoyintse ɔkʋ bʋ asʋrapʋ mʋ abusuantɔ a, ɔkɩ amʋ́sʋ. Ɔmási amʋ́ tswɩ ɔpasua amʋsʋ, mɛnɩ ɔpasua amʋ bénya ɔkpa kɩ amʋ́á bʋma ɔhaasʋ.
17Ilehian ánɩ́ ɔpasua amʋ bɛ́ka ɔpasua ahandɛá bʋdɛ amʋ́ kpa akɔ wanklaan, wa amʋ́ numnyam. Titriu amʋ́á bʋtɔbɔ mbɔdɩ Bulu asʋn amʋ ɔkanda pʋ́ mʋ́ suna ɩwɩ. 18Tsufɛ Bulu asʋn wanlɩnhɛ amʋ ɩlɛblɩ ɔbɛɛ, “Bʋtamawa ɔnantswieá ɔdɛ ayo da ɔnɔ ɩkan.”#5:18 Deut. 25:4. Mʋ́ asɩ gyi, “Bʋtamalɛ ɔkwɛn, pʋ ɩbɩ tsitsi ɔsʋlʋtɔ.” Ɩlɛtra blɩ ɔbɛɛ, “Agyʋma ɔyɔpʋ bʋtɛka ɩkɔ.” 19Nɩ ɔkʋ ɔda ɔpasua ɔhandɛ asʋn suna fʋ a, máhɔ mʋ́, nkɛtɩ fanu mʋ́ tsu aha abanyɔ-abasa ɔnɔ asa. 20Wa ɩyɩn wa ɔhandɛ amʋʋ ɔdɛ lalahɛ bwɛ amʋ ɔpasua amʋ ansɩtɔ, mɛnɩ atrahɛ bénya ifu.
21Nlɩɩ Bulu mʋa Kristo Yesu pʋ́ Bulu-abɔpʋá alalɛ ansɩtɔ, ndɛ fʋ hɩɛ mbɛɛ, fʋgyi asʋn anfɩsʋ wanklaan. Mákɩ ɔhaa ansɩtɔ ntɛ futi fɩtatɔ kɩ. 22Mákɔsɩ tsia yaɩ ɔha ɔpasua ɔhandɛ. Máwa ɩbɩ ɔha bamba lalahɛbwɛtɔ. Ha fʋ ɩwɩ ɩtɩn bregyibrɛ.
23Fʋ ɔmɛtɔ ɩlɔ amʋ sʋ mátsia nun ntsu wʋlɛ, tsia nun nta kpalobi-kpalobi.
24Akʋ lakpan meŋain. Mʋ́ sʋ bʋtɔkɔsɩ wun mʋ́ bɩtɩ amʋ́ ɩsʋ. Akʋ klɛ ɛ leŋain, ɔma asa ɩtɛlɩn ɔwan. 25Alɩ kɛn yilebwɛ tamaŋain nɩ. Nɩ ɩmɔkɔsɩ lɩn ɔwan kʋraa a, ɩtɛbɛlɩn ɔwan ɔma.
Currently Selected:
1 Timoteo 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation