1 Timoteo 6
6
1Ilehian ánɩ́ nkpábiá bʋbʋ ɔpasua amʋtɔ bɛ́hɩɛ bu amʋ́ awie, mɛnɩ ɔhaa mɔ́ɔkpɔɩ Bulu mʋa anɩ atosunahɛ amʋ. 2Ilehian ánɩ́ amʋ́á amʋ́ awie bʋbʋ ɔpasua amʋtɔ bóbu amʋ́ awie amʋ dʋn. Sei kʋraa ilehian ánɩ́ bóbu amʋ́ dʋn nɩ. Tsufɛ ahogyipʋ bʋgyi, bʋtɔdwɛ amʋ́ ɛ.
Afunu Atosunahɛ Pʋ́ Atonyahɛ Onuto
Ɩnɩ aná gyi tɔá fʋsuna amʋ́, afʋwa amʋ́ atɛtɔ-ɔnlɩn abʋbwɛ nɩ. 3Nɩ ɔkʋ losuna atɔ lalahɛ kʋ, mʋ́a anɩ Wie Yesu Kristo asʋn blɩhɛ pʋ́ Bulusum atosunahɛ amʋ ɩmɛna a, 4idesuna ánɩ́ ɔha amʋ dɛ ɩwɩ tsu. Omeyin tɔtɔ, nwɛnkpangyi labʋla mʋtɔ. Mʋ́á ɩtɛdalɩ tsu mʋ́tɔ gyi ɔnsɩpɛ, ɩtrɛ, isia pʋ́ agywɩɩn lalahɛ. 5Asʋn ánɩ́ imedehian ɩwɩ nwɛn aha anfɩ odu bʋtɛnatɩ gyi. Amʋ́ agywɩɩn lawu, bʋtamablɩ ɔnɔkwalɩ. Amʋ́ odu bʋtosusuá Bulusum igyi ɔkpa kʋá fɔ́tsʋn mʋ́sʋ nya ɩwɩ.
6Labi kpɔnkpɔntɩ bʋ Bulusumtɔ nɩ tɔá anɩbʋ yaɩ legyi anɩ ansɩ. 7Tsufɛ anɩmɔpʋ tɔtɔ ba ɔyɩtɔ, anɩmɛ́ɛtalɩ pʋ tɔtɔɔtɔ ɛ natɩ. 8Mʋ́ sʋ nɩ anɩbʋ atogyihɛ pʋ́ atɔ dɩdahɛ a, mlɩha mʋ́ kpan igyi anɩ ansɩ. 9Aha ánɩ́ bʋtekleá bʋnya atɔ a, ɩbwɛbwɛbwɛ bʋtɛkpa wie ɩsɔkɩ pʋ́ ayibitɔ. Amʋ́ mimlala tɛkpa amʋ́ yowie ɩwɩɔsɩn mʋ́a lalahɛtɔ, hɩ amʋ́. 10Tsufɛ kɔbadwɛ tɔpʋ lalahɛ kugyikʋ ba. Mʋ́ ɔma akʋ bagya alɩɩ, bafwɩ dalɩ hogyi amʋtɔ, ɩlaha amʋ́ bʋdɛ awɩrɛhɔ tsɔtsɔɔtsɔ gyi nɩ.
Paulo Asʋn Trahɛ
11Timoteo, fʋ mʋ́ a, Bulu ɔha fʋgyi. Mʋ́ sʋ ha ɩnɩ aná ɩwa ɩfɔ fʋ wa. Hɩɛ fʋ ɩwɩ, afʋbwɛ tɔá ɩda ɔkpa. Bɔ mbɔdɩ afʋha yilebwɛ, Bulusum, hogyi, ɔdwɛ, klʋnya pʋ́ ɩwɩasɩba itsia fʋtɔ. 12Kɔ hogyi ɩkɔ wanklaan amʋ. Fʋ ɩbɩ bɛ́da nkpa amʋʋ ɩtamata, Bulu obékie anɩ mʋ́ ɔma amʋ. Nkpa anfɩ sʋ Bulu lɛtɩ fʋ nɩ. Mʋ́ sʋ fobwii ɔnɔ aha tsɔtsɔɔtsɔ ansɩtɔ, gyi fʋ hogyi ɩwɩ adansɩɛ nɩ. 13Nlɩɩ Bulu, ogyi togyitɔ nkpa Ɔhapʋ mʋa Kristo Yesuá olegyi ɩwɩ adansɩɛ wanklaan Pontio Pilato ansɩtɔ. Ndɛ fʋ hɩɛ 14mbɛɛ, fʋkɩta mbla anfɩ fɛ́ɛ́tɔ wanklaan. Mási mʋ́tɔ kpɛfʋn ɛkɛá anɩ Wie Yesu Kristo ɔbɛ́lɛ ɩwɩ ɔwan. 15Bulu ɔkʋkʋnʋ ɔkʋlɛ amʋ ilehian ánɩ́ abɛ́kanfʋ. Mʋ nkʋlɛ pɛ gyi Otumipʋ, awie fɛ́ɛ́tɔ Owie. Mʋ ɔbɛ́lɛ Kristo suna brɛ wanklaan amʋʋ mʋ onuto ɔlɛhɩɛ yaɩ amʋtɔ. 16Mʋ nkʋlɛ pɛ tamawu, otsie ɔwankɩkpa ánɩ́ ɔhaa tamatalɩ kpʋkpɛ manta mʋ. Ɔhaa mɔkʋwun mʋ kɩ, ɔhaa móowun mʋ ɛ ɛkɛkɛɛkɛ. Mʋ klɛ gyi obu mʋ́a tumi brɛ fɛ́ɛ́! Amen!
17Bla ɔyɩ anfɩtɔ ɩwɩ anyapʋ fɛɛ, bʋmátsu ɩwɩ. Bʋmápʋ ansɩ dɩnka kɔba anfɩ iméetsia yɔ anfɩsʋ. Mboun bʋpʋ ansɩ dɩnka Bulusʋ. Mʋtɛha anɩ togyitɔá abɔ́pʋnya ansigyi ɔyɩ anfɩtɔ. 18Bla amʋ́ fɛɛ, bʋpʋ amʋ́ kɔba bwɛ yile, amʋ́ yilebwɛ imoni. Bʋsankɩ ɩbɩtɔ abʋkie atɔ. 19Nɩ bʋdɛ ɩnɩ bwɛ a, bʋdɛ atonyahɛ yaɩ ha brɛ amʋʋ ɩba amʋ. Amʋ́ ɩbɩ bɛ́da nkpa onuto amʋ.
20Timoteo, kɩta ɩtɔ amʋʋ Bulu laha fʋ amʋ wanklaan. Asʋn ánɩ́ ɩma asɩ, imosuna Bulusum mádalɩ fʋ ɔnɔ. Máwa ɩwɩ mimla nwɛngyiá ɩtamasuna Bulusumtɔ. Akʋ bʋtɔwa afunu bɛɛ, asʋnbɩ igyi. 21Tsufɛ akʋ batsʋn mʋ́sʋ si Kristo hogyi.
Bulu ogyi mlɩ bʋalɛ.
Currently Selected:
1 Timoteo 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation