MATTEW 24
24
Kapitlu 24
Ġesù jħabbar it-tiġrif tat-tempju
(Mk 13,1-2; Lq 21,5-7)
1Ġesù ħareġ mit-tempju. Huwa u sejjer, id-dixxipli tiegħu resqu lejh u wrewh il-bini tat-tempju. 2Iżda hu qalilhom: “Qegħdin tarawh dan kollu? Tassew, ngħidilkom, hawnhekk ma tibqax ġebla fuq oħra li ma tiġġarrafx!”
Il-bidu tat-tbatijiet
(Mk 13,3-13; Lq 21,7-19)
3Kif kien qiegħed fuq l-Għolja taż-Żebbuġ, id-dixxipli resqu jistaqsuh rasu u rashom: “Għidilna, dan meta għad jiġri? U x’se jkun is-sinjal tal-miġja tiegħek u ta’ tmiem id-dinja?”#Mt 24,37-39; 28,20. 4U Ġesù weġibhom: “Araw li ħadd ma jqarraq bikom. 5Għax għad jiġu ħafna f’ismi u jgħidu ‘Jien hu l-Messija,’ u jqarrqu b’ħafna nies.#Mt 24,23-24; Ġw 5,43; 1 Ġw 2,18. 6Għad tisimgħu min jitkellem fuq gwerer u xnigħat ta’ gwerer. Iftħu għajnejkom u titħawdu xejn, għax dan jeħtieġ li jiġri, imma għadu mhuwiex it-tmiem. 7Għax għad iqum ġens kontra ġens u saltna kontra saltna, ikun hawn ġuħ kbir, u l-art titheżheż f’ħafna bnadi.#2 Kron 15,6; Is 19,8. 8Dan kollu jkun il-bidu ta’ tbatija kbira. 9Imbagħad jagħtukom f’idejn min iħabbatkom u joqtolkom; u l-ġnus kollha jsiru jobogħdukom minħabba f’ismi.#Ġw 15,18; 16,2. 10U jkun hemm ħafna li jitfixklu, li jittradixxu lil xulxin u jinbagħdu bejniethom. 11Iqumu bosta profeti foloz u jqarrqu b’ħafna nies.#Mt 24,5-24. 12Joktor il-ħażen, u għalhekk l-imħabba tibred f’ħafna. 13Imma min jibqa’ jżomm sħiħ sal-aħħar, dan isalva.#Mt 10,22. 14Dan l-Evanġelju tas-Saltna jixxandar fid-dinja kollha, biex il-ġnus kollha jkollhom xhieda. Imbagħad jiġi t-tmiem.#Mt 10,18; 28,19.
15“Meta mbagħad taraw il-profanazzjoni u l-ħerba fit-tempju#24,15: Il-profanazzjoni u l-ħerba fit-tempju: letteralment l-għajb (qżież, stmerrija) tal-ħerba. Dan kien l-idolu ta’ Żews Olimpju jew Bagħal-xemajim, li Antijoku Epifani kien waqqaf fuq l-artal tas-sagrifiċċju fis-sena 168 QK. Hawn Ġesù għandu f’rasu l-eżerċtu Ruman li kellu jassedja lil Ġerusalemm, jidħol fiha u jeqridha bit-tempju b’kollox; ara 1 Mak 1,54. li fuqhom tkellem il-profeta Danjel - ħa jifhem min jaqra! -#Dan 9,27; 11,13; 12,11; 1 Mak 6,7. 16ħa jaħarbu mbagħad lejn l-għoljiet dawk li jkunu fil-Lhudija; 17u min ikun fuq il-bejt, ara li ma jinżilx jieħu xi ħaġa mid-dar,#Lq 17,31. 18anqas min ikun fir-raba’ ma għandu jerġa’ lura biex jieħu l-mantar tiegħu. 19Jaħasra għalihom in-nisa li f’dawk il-jiem ikunu tqal jew ireddgħu! 20Itolbu li l-ħarba tagħkom ma tiġrix fix-xitwa jew nhar ta’ Sibt. 21Għax imbagħad ikun hawn diqa kbira li mill-bidu tad-dinja sa issa għadu qatt ma kien hawn bħalha u anqas ikun hawn.#Dan 12,1; Apk 7,14. 22U kieku dawk il-jiem ma tqassrux, l-ebda bniedem ma kien isalva. Iżda minħabba l-maħturin dawk il-jiem tqassru. 23Imbagħad, jekk xi ħadd jgħidilkom, ‘Ara, hawn hu l-Messija,’ jew, ‘Hemm,’ la temmnuhx.#Mt 24,5-11; 1 Ġw 2,18. 24Għax għad iqumu ħafna messijiet foloz u profeti foloz, u jibdew jagħmlu sinjali kbar u għeġubijiet biex iqarrqu, jekk jista’ jkun, imqar bil-maħturin.#Dt 13,1-3; 2 Tess 2,9-10; Apk 13,13-14. 25Ara, għedtulkom minn qabel. 26Jekk mela jgħidulkom, ‘Ara, qiegħed barra fid-deżert,’ tmorrux; ‘Ara, qiegħed ġewwa fid-dar,’ temmnux.#Lq 17,23-24. 27Għax bħalma l-berqa tleħħ mil-Lvant u tixħet id-dija tagħha sal-Punent, hekk tkun il-miġja ta’ Bin il-bniedem.#Mt 24,37-39; 1 Kor 15,23; 1 Tess 2,19; 3,13; 4,15; 5,23; 2 Tess 2,1; Ġak 5,7-8; 2 Pt 3,4-12; 1 Ġw 2,28. 28Fejn hemm il-ġisem mejjet, hemm l-isqra jinġabru!
Il-miġja ta’ Bin il-bniedem
(Mk 13,24-27; Lq 21,25-28)
29“Minnufih, wara d-diqa ta’ dawk il-jiem,
ix-xemx tiddallam,
il-qamar jitlef id-dija tiegħu,
il-kwiekeb jaqgħu mis-sema,
u l-qawwiet tas-sema jitheżżu. #
Is 13,10; 34,4; Eżek 32,7; Ġoel 2,10; 4,15; Ħag 2,6-21.
30Imbagħad jidher fis-sema s-sinjal ta’ Bin il-bniedem, il-popli kollha tal-art jibdew jagħtu fuq sidirhom, u jaraw lil Bin il-bniedem ġej fuq is-sħab tas-sema b’qawwa u glorja kbira.#Dan 7,13-14; Żak 12,10; Mt 16,27; 26,64; Apk 1,7. 31U hu jibgħat l-anġli tiegħu, li b’leħen qawwi ta’ tromba jiġbru l-maħturin tiegħu mill-erbat irjieħ, minn tarf sa tarf tas-sema.#Dt 30,4; Is 27,13; Żak 2,6; Mt 13,41; 1 Kor 15,52; 1 Tess 4,16.
Tagħlima mis-siġra tat-tin
(Mk 13,28-32; Lq 21,29-33)
32“Tgħallmu din il-parabbola mis-siġra tat-tin. Meta l-fergħa tirtab u tarmi l-weraq, intom tintebħu li s-sajf fil-qrib. 33Hekk ukoll meta taraw dan kollu, kunu afu li hu fil-qrib, fil-bieb. 34Tassew, ngħidilkom, li ma jgħaddix dan in-nisel sa ma jiġri dan kollu.#Mt 16,28. 35Is-sema u l-art jgħaddu, imma kliemi ma jgħaddix.#Mt 5,18; Lq 16,17.
Ħadd ma jaf il-jum u s-siegħa
(Mk 13,32-37; Lq 17,26-30.34-35)
36“Dwar dak il-jum u s-siegħa ħadd ma jaf xejn meta se jaslu, la l-anġli tas-sema u lanqas l-Iben; ħadd ħlief il-Missier waħdu.#Atti 1,7. 37Bħal fi żmien Noè, hekk tkun il-miġja ta’ Bin il-bniedem.#Ġen 6,9-12; Mt 24,27-39; 1 Kor 15,23; 1 Tess 2,19; 3,13; 4,15; 5,23; 2 Tess 2,1; Ġak 5,7-8; 2 Pt 3,4-12; 1 Ġw 2,28. 38Għax kif fiż-żmien ta’ qabel id-dilluvju kienu jieklu u jixorbu, jiżżewġu u jżewġu sa dak inhar li Noè daħal fl-arka,#Ġen 6,13—7,24; 2 Pt 3,6. 39u b’xejn ma ntebħu sa ma wasal id-dilluvju u ġarr lil kulħadd, hekk tkun il-miġja ta’ Bin il-bniedem.#Mt 24,27-37; 1 Kor 15,23; 1 Tess 2,19; 3,13; 4,15; 5,23; 2 Tess 2,1; Ġak 5,7.8; 2 Pt 3,4.12; 1 Ġw 2,28. 40Imbagħad tnejn ikunu fl-għalqa: wieħed jittieħed u l-ieħor jitħalla; 41żewġ nisa jkunu jitħnu flimkien: waħda tittieħed u l-oħra titħalla. 42Ishru, mela, għax ma tafuhx il-jum li fih jiġi Sidkom.#Mt 25,13. 43Kunu afu dan, li kieku sid id-dar kellu jkun jaf f’liema sahra tal-lejl#24,43: Sahra tal-lejl: il-lejl, bħall-jum, kien ta’ tnax-il siegħa mqassma f’erba’ sahriet ta’ tliet sigħat il-waħda; ara nota 20,3. se jiġi l-ħalliel, kien jishar u ma jħallix min jinfidlu l-ħitan ta’ daru#24,43: Jinfidlu l-ħitan ta’ daru: ara nota 6,19..#1 Tess 5,2; 2 Pt 3,10; Apk 3,3; 16,15. #Lq 12,39-40. 44Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.
Il-qaddej il-fidil u l-qaddej il-ħażin
(Lq 12,41-46)
45“Intom min tgħidu li hu l-qaddej fidil u għaqli? Min hu dak li s-sid iqiegħdu fuq niesu biex jagħtihom jieklu fil-ħin? 46Hieni dak il-qaddej li sidu jiġi u jsibu jaqdi dmiru. 47Tassew, ngħidilkom, li jafdalu ġidu kollu f’idejh.#Mt 25,21-23. 48Iżda jekk dak il-qaddej ħażin jibda jgħid f’qalbu, ‘Sidi jiddawwar ma jiġi,’ 49u jaqbad isawwat lil sħabu l-oħra, u jiekol u jixrob mas-sakranazzi, 50sid dak il-qaddej jasal f’jum li hu ma jkunx jistennieh, f’siegħa li fiha jieħdu għal għarrieda, 51u jagħmlu bċejjeċ u jagħtih li ħaqqhom in-nies ta’ wiċċ b’ieħor: hemmhekk ikun hemm il-biki u t-tgħażżiż tas-snien.#Mt 8,12; 13,42-50; 22,13; 25,30; Lq 13,28.
Currently Selected:
MATTEW 24: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.