Énkjínkón 6
6
Ti̱ꞌinkjé jí ngindiee̱ nga tjín ni xi si̱ꞌin ji
1Ji ndí, tsi ngo amingo̱ xi ku̱i̱ꞌaa̱
nga ji xi ko̱nángí yojòo̱ kjo̱a̱a̱ ngo ni,
ko̱jo nga ko̱e̱ꞌé ji ndso̱ꞌbe
nga ji kꞌuíchjí jí ni xi ntsjieén ngo xota̱ xi nde yejín ji.
2Tsi je katseꞌé ji ndso̱ꞌbe,
ja̱ ti̱kuíní ée̱n xi chja̱ya̱a̱ ka̱ma
ngatꞌa̱ chjiéngá si̱ꞌinkjatjosén ji kui nii̱.
3Ji ndí, tsi̱ꞌe̱ nga kjo̱tjongii̱ yojòo̱ kjo̱a̱a̱ kui nii̱,
chjiéngá bi̱ si̱ꞌin ji:
tꞌenchíi̱n amingoo̱,
kó ꞌniú chjiéꞌée̱ nga jijín sa̱ngínjiin kui nii̱.
4Ngata̱ tsjaféjín ji, ti̱nde nga ꞌbíchjéjín ndyikin,
5ta̱sá ꞌna̱xiéꞌé ji yojòo̱,
xikótsꞌèn ni̱siee̱ ko̱jo ndi̱kꞌijñaá
kjiꞌanga be já xí tsꞌenkꞌién kui cho̱o̱.
Ngata̱ tsiꞌéjín má ji
6¡Ji chí tsiꞌé,
tsitsíjìi̱n ndi̱ꞌyoo̱!
¡Tsitsíjìi̱n kótsꞌèn tsꞌénxá,
kó kjínkón ngatama ji xikoó kui cho̱o̱!
7Ndi̱ꞌyoo̱, jmíjiín ngito̱ko̱,
ti̱nde jmíjiín xi botixómaá,
8ta̱nga nga ma cho̱ndoboaá foaꞌátikó nichiniee̱,
kó nga fochó cha̱a̱n ni xi kamáxchaá, foaꞌátjó ni xi skji̱ni̱e̱.
9Ji chí tsiꞌé,
ngaskande kjiꞌání nga to̱kó tsjáfé ji.
Ngaskande kjiꞌání nga kjo̱a̱ꞌaá.
10Tsi ngotjón tsjáfé ji, ngotjón niꞌínkjaꞌyé ji,
kósꞌe̱ tsjaníkjé má ji yojòo̱. 11¡Tsi bo̱a̱ si̱ꞌin ji, ni̱ma̱ tsꞌén ku̱i̱ndyin ji,
kó kjo̱a̱ni̱ma̱a̱ kji̱ndi̱bánieé xikó maá tsi ngo xota̱ xi tsoꞌbásón skjánjoo̱!
Ngata̱ ꞌbíndisejín ji
12Tjín xota̱ xi ndajín ko̱jo xi jmí kjo̱a̱soboájiín
xi ngongá ni ndiso ndyi̱ꞌbini̱jmì,
13tsi̱ꞌe̱ nga ku̱i̱ꞌíndisojo̱ kje̱ꞌe xota̱,
ꞌbíchjaá ndyi̱ko̱n, tsja bokóní,
ko̱jo se tsꞌéntíyaà.
14Kui xotaa̱ ta̱ngongá ni xi ndajiín xi tjíjin ini̱ma̱a̱,
kó ngatsjéni̱xtjin nga tsꞌénkjó ni xi ndajín,
kó ngongá nga kjo̱a̱xti ndyi̱ꞌboxié.
15Kuíni nga ni xi ndajiín
ta̱niján má kji̱ndi̱bánié,
kjiꞌanga nde tsꞌénkoyàjiín boá nga bo̱a̱ ka̱maa̱
kjiꞌá boá nga si̱ꞌankjie.
Ngata̱ bixkénjín ji
16Néná, jun ko̱jo tsi ngaskande yito to̱ko̱ya ma
xota̱ xi achichí chꞌoó ini̱ma̱a̱, kó kuí bí xi̱ꞌbi̱:
17Xota̱ xi nkꞌakoo̱n,
xota̱ xi ꞌbindísoó,
xota̱ xi tsꞌenkꞌién xota̱ xi jmí jéjiín,
18xota̱ xi tsꞌénkjó ni xi ꞌniú ndajín,
xota̱ xi achichí ni xi kjimaa̱ nga tsá tsꞌén ni xi ndajín,
19xota̱ xi chistiko̱ ndiso ma,
ko̱jo xota̱ xi kjo̱a̱xti ꞌboxié ngi̱jii̱n xota̱ xkjín.
Chíi̱n kui chjo̱on xí tsꞌéntꞌaa̱kjo̱a̱ xi̱ꞌii̱n
20Ji xi̱ꞌin, nda nda má ti̱ꞌinkjatjosén ji
kjo̱a̱botíxomaa̱ na̱ꞌmíi̱,
kó nga ꞌbíjñímasínjín ji kjo̱a̱bokoyaá na̱áa̱n.
21Ngatsjéni̱xtjin tꞌíjin ji ngi̱jin ini̱màa̱,
kó xikoó tsi ngo ni xi jmeyé kjásen ti̱ꞌin ji.
22Kui boá kui nii̱ xi ko̱ko̱ó ndi̱yà nínga kꞌuin jí,
kuí boá xi skoón kjiꞌanga tsjáfé ji,
kó kuí boá xi ku̱i̱chji̱a̱joo kjiꞌanga kjo̱a̱ꞌaá.
23Kjo̱a̱botíxomaa̱ ko̱jo kjo̱a̱bokoyaá,
kuí boá xi xikoó ngo ndiꞌíxò xi tjítí ka̱maa̱,
kó kjo̱a̱niꞌánchji̱ni̱e̱e̱,
kuí boá xi ko̱ko̱ó kótsꞌèn nga nda ku̱i̱ndyin ji,
24kuí boá kui nii̱ xi skoón kjo̱a̱a̱ kui chjo̱on xí tsꞌéntꞌaa̱kjo̱a̱ xi̱ꞌii̱n,
kui xi ta̱ngatꞌanii̱ én ixii̱ nga jo̱ꞌo se ji.
25Ngata̱ tsꞌénmejénjín ini̱màa̱ kjo̱a̱tsjakjiꞌii̱ kui chjo̱on,
ti̱nde ngata̱ boeꞌéndièjín ji nga ta̱ngatꞌanii̱ xikótsꞌèn kotsijee̱n, nga tsja ka̱maa̱ kui.
26Ngatꞌa̱ ta̱ngatꞌanii̱ ngo na̱masien,
nga xotaa̱ ka̱ma skji̱ni̱e̱jín ngo ndso̱ꞌba nichinie,
kó ta̱ngatꞌanii̱ chjo̱ón kje̱ꞌe nda̱, nga ka̱ma si̱ꞌankꞌienni ngo ini̱ma̱.
27Tsi ngo nda̱ skjitjónjón xꞌué ni̱se̱e̱n,
a ku̱i̱ti̱jín ńjñóo̱ tsobo̱a̱.
28Tsi ngo nda̱ ko̱e̱je̱jin xꞌué,
a chja̱njínrií se tsobo̱a̱.
29Ja̱ ti̱ bo̱a̱ ti̱ tsꞌén kui nda̱ xi kjojñájo̱ chjo̱on kje̱ꞌe nda̱,
chjiéngá sa̱tíjeé.
30Jmíjín xi sa̱ꞌínchꞌó ngo nda̱ xi chejé
tsi ta̱ngatꞌanii̱ nga bojoó nga sa̱ꞌínchejé,
31ta̱nga tsi tjín xí sku̱i̱e̱,
chjiéngá yito bo̱a̱ kjiꞌi ngase
tsja nginí xikó kjiꞌi katsꞌénchejé,
ndatsi ngaskande ngayeje ni xi tjiín xi sa̱ꞌínkꞌasꞌien.
32Ta̱nga kui nda̱ xi tsꞌénkámajo̱ chjo̱on xí tjítsꞌéntꞌaa̱kjo̱a̱ xi̱ꞌii̱n,
achichí nga ndajínkjiꞌi ni xi tjítsꞌeén ini̱ma̱a̱,
33kó tsꞌénmongase nga si̱ꞌanꞌoo̱n,
ko̱jo nga kjo̱a̱soboá sa̱ko̱ó,
¡kó jmíni̱xtjin kju̱i̱e̱ kui nii̱!
34Ngatꞌa̱ nga ka̱machi̱ni̱ xi̱ꞌii̱n kui xota̱chjo̱on,
achichí sa̱ꞌínxchán,
kó sa̱ꞌínjetakónjín nga ka̱mamejeén sa̱ꞌíngojo.
35Nde ngojín ni skjíbéngí
kjo̱a̱a̱ ni xi kamátaꞌin
ti̱nde sa̱ꞌínjetakónjín,
ndatsi kjín ni xi ta̱ko̱e̱ꞌérií.
Currently Selected:
Énkjínkón 6: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014