Énkjínkón 5
5
Ni xi májín niꞌán kjo̱a̱a̱ ngo chjo̱on xí tsꞌéntꞌaa̱kjo̱a̱ xi̱ꞌii̱n
1Ji ndí xi̱ꞌin, nda má tasínijìi̱n kjo̱a̱kjínkónna,
ko̱jo nda má ndaꞌyé ji kjo̱a̱kjíntakón xi tsꞌéntsjaa,
2tsi̱ꞌe̱ nga, ngatsjéni̱xtjin nga nda si̱ꞌinkjé ni xi ko̱ndókjo̱e̱ ji,
kó ée̱n boá xi ko̱kó nga tjiín kjo̱a̱kjíntakón.
3Ngatꞌa̱ kui chjo̱on xí tsꞌéntꞌaa̱kjo̱a̱ xi̱ꞌii̱n,
ixi má eén xikó maá ntsjieén,
kó achichí tsjatsó én xí chji̱a̱joo̱ nga tsꞌénꞌíndatakín,
4ta̱nga ngafetꞌaa̱kjo̱a̱,
eén sa ngase ma ta̱bo̱a̱jiín saa̱,
kó yojó ngase ma ta̱bo̱a̱jiín ngo ki̱cha̱ xi yojó ngajó ngoboaá.
5Kui xi ki̱a̱ nijan sa̱ꞌínkamajo̱ kui chjo̱ón,
¡jè xikoó tsi je katsꞌénkꞌién yojoo̱!
6Ngatꞌa̱ kui chjo̱on jmí ndasénjiín
ndi̱yà xí ndaa̱ kjo̱a̱mindyioo̱n,
ti̱nde bejín nga ndi̱yà xí ndajiín je tsoꞌbá.
7Ji ndí nda̱chií, nda má tasínijìnní:
¡kó ngata̱ niꞌínchꞌíjín ji kjo̱a̱bokoyá xi tsꞌéntsjaa!
8Xín ti̱ꞌinkjeꞌée̱ yojòo̱ kui chjo̱on,
kó ngata̱ ki̱a̱jín ꞌmí ji ndiꞌaa̱,
9tsi̱ꞌe̱ nga kje̱ꞌejín xi si̱ꞌinkꞌasꞌíi̱n ngaꞌniú xí tjiín,
ko̱jo tsi nó xi nda ngasee̱ kjo̱a̱mindyiòo̱n
si̱ꞌinkꞌasꞌíi̱n xota̱ xi ndajín,
10ko̱jo tsi tsi̱ꞌe̱ nga xota̱ xi nde yejín ji xi sa̱ko̱ó ni xi tjiín,
ti̱nde kje̱ꞌejín ndiꞌa kjo̱chó kjo̱a̱ni̱ma̱ xi kiniꞌín ji.
11Tsi̱ꞌe̱ nga ngije ma kjietꞌa ni̱xtjíi̱n,
ko̱jo ngije chiꞌii̱n kjifee̱ yojòo̱, xchieꞌéjín ji
12nga bi̱ sé jí: ¡Míkjo̱a̱a̱ nga katsꞌenchꞌó an kjo̱a̱botíxomaa̱!
¡Míkjo̱a̱a̱ nga ini̱ma̱na katsꞌénchꞌó kjo̱a̱niꞌánchji̱ni̱e̱e̱!
13Jmíni̱xtjin katsꞌensée̱n mostro̱na,
ti̱nde tsintꞌieꞌénjáa̱n xota̱ xi akóyána.
14¡Ngotꞌe̱ ꞌne̱, jè ngiti̱ ndajín tikón an,
ngindyi̱ko̱n ngayeje xota̱ na̱xi̱ńdaá!
Ngata̱ niꞌíntꞌejíi̱nkjo̱a̱ chjóo̱n
15Tsi mejeén nga tsjatsꞌèn si̱ꞌintsjeje̱ ji yojòo̱,
bo̱a̱ ti̱ꞌin ji, ta̱nga chjóo̱n boá xi ti̱ꞌintsjeje̱ ji.
16¡Kjo̱a̱tjóo̱ ta̱kuítsí chjóo̱n xi te̱ꞌée̱!
¡Ngata̱ kje̱ꞌejín xi boeꞌée̱!
17Ngata̱ kje̱ꞌejín xi nijan niꞌíntsjeje̱ ji
kui kjo̱a̱tsja xi tjiín ji ko̱jo chjóo̱n.
18¡Ngatamachikonñé chjóo̱n,
kó ti̱ꞌintsjeje̱ ji kui na̱ xi kiniꞌínmején ji ndeskande koó nga kjindí jí!
19Kuí boá xi xikoó ngo ndi̱kꞌijñá chjo̱on,
te̱ꞌéndiè ji nga kjo̱a̱tjoó ko̱jo kjo̱a̱niꞌándajoo̱n kui,
ngatsjaá kjo̱a̱tsja ngatsjéni̱xtjin.
Néná tsꞌénkotsijee̱n ni xi niꞌín ji
20Ji xi̱ꞌin, ngata̱ boeꞌéndièjín ji nga kje̱ꞌe chjo̱on sa̱ꞌínmejeén,
ti̱nde nga mindyiséjín ji nga ngo chjo̱on xí je ixán
sa̱ꞌíndajon sa̱ꞌíndatꞌaa̱.
21Ngatꞌa̱ Néná achichí nda kotsijee̱n
ndi̱yà xí tjimá xotaa̱,
kó kuí boá xi kotꞌa ngayeje ndi̱ya̱à.
22Jeé ko̱jo ni xi ndajín niꞌaán,
kuí boá xi chja̱ya̱ maa̱ xota̱ xi ꞌniú ndajiín,
kó kuí nii̱ xi ꞌbíndoꞌniú.
23Bo̱a̱ tsꞌén fesón kuí xotaa̱,
kui xi mejénjiín nga sa̱ꞌínchji̱ni̱e̱ yojoo̱,
¡kó kjo̱a̱a̱ nga makjínjiín nii̱, fochó ni̱xtjin nga fe ngijee̱!
Currently Selected:
Énkjínkón 5: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014