2 Macabeos 15
15
Nicanor wañun
(1 Mac 7.39-50)
1Nicanorman willarqanku Judas runankunawan khuska Samaria cheqapi kashasqanta. Chantá Nicanor chayman kachaykukorqa. Paykunata atipananpaj jina samarina p'unchaypi paykunata jap'ej rerqa.
2Paywan khuska karqanku, chay judiokunarí, pikunatachus mana munashajta paywan apasharqa, chaykuna Nicanorta nerqanku: Ama chay jinata mana khuyakuyniyoj jina paykunata samarina p'unchaypi wañuchiychu, imajtinchus tukuy imata rikoj Diosqa samarina p'unchayta paypaj ajllakorqa. Chayrayku chay p'unchayta jatun respetowan qhawana, nispa. 3Chaywanpis chay mana sonqoyoj runa#Ex 20.8-11. kuticherqa: Janaj pachapi Tukuyta Kamachej uj Dios kanmanchu, pichus kamacherqa samarina p'unchayta waqaychana kasqanta? nispa. 4Judiokunataj kuticherqanku: Tukuyta Kamachej Kawsaj Dios tiyan, pichus janaj pachapi kamachej, chantá may atiyniyojmin. Paymin kamachiwarqayku qanchis kaj p'unchaypi samarinaykuta, nispa. 5Nicanortajrí nerqa: Noqamin kay pachapi atiyniyoj kani, chayraykutaj kamachiykichej kuraj kamachejta kasuspa maqanakunaykichejta, nispa.
Jinapis, Nicanorqa chay millay yuyasqanta mana junt'ayta aterqachu. 6Nicanor may kasqanta yuyakuspa, wapuykachaspa ima, uj apachetata oqharichiyta munarqa, chaypi churachinanpaj Judaspa soldadonkunamanta qhechusqan armankuta. 7Macabeotajrí Tukuyta Kamachej Diospi tukuy sonqo atinikorqa, paykunata yanapananta suyakuspa. 8Chayrayku soldadonkunata kallpacharqa, Diosta mana manchachikojkunamanta ama manchachikunankuta. Manachayqa Dios imaynatachus ñawpajta paykunata yanapasqanmanta yuyarikuspa, kunanpis suyananku karqa Tukuy Atiyniyoj Tukuyta Kamachej Dios paykunata yanapananta. 9Ajinata Judas Macabeo soldadonkunata sonqocharqa Moisespa kamachisqanmanta qhelqamanta, Diosmanta sut'inchajkunaj nisqankumanta ima parlaspa. Paykunata yuyarichillarqataj imaynatachus unay maqanakupi atipasqankumanta ima. Ajinamanta Judaspa soldadonkuna may kallpachasqa, sonqochasqataj karqanku. 10Chay jinata runankunata sonqochasqanmantataj, Judas imatachus ruwanankuta allinta yachacherqa. Chantá paykunata yuyarichillarqataj Diosta mana manchachikojkuna puraj uya kasqankumanta, jinallataj imaynatachus paykuna trato ruwasqankuta p'akisqankumanta ima.
11Ajinamanta, Judas Macabeo paykunata kallpachaykorqa. Chay nisqanqa aswan karqa espadamanta, escudomantawan nisqaqa. Chaymantataj, paykunaman willarqa imatachus mosqoyninpi rikusqanta. Chaypis paykunata anchatapuni kusichillarqataj.
12Judas Macabeo mosqoyninpi kayta rikorqa: Onías ñawpa kuraj kaj sacerdote karqa. Payqa k'acha sonqoyoj runa karqa, cheqan runa, llamp'u sonqoyoj ima, munakunapajpuni karqa. Wawa kasqanmantapacha llimphu kawsayniyoj karqa. Judasqa chay runata rikusqa makin oqharisqata, paytaj Diosmanta tukuy judiokunapaj mañakushasqa. 13Chaypachallapi waj runañataj rikhurimusqa, yuraj chujchayoj, respetanapaj jinataj. Paypa rijch'aynenqa uj kuraj kamachej jina karqa, atiynintaj kamachinanpaj jina karqa. 14Jinapi Onías nisqa: Kaymin Diosmanta sut'inchaj Jeremías.#2 Cr 36.12; Jer 1.1. Payqa llajta masinkunata manchayta munakuspa, tuta p'unchay judiokunapaj Diosmanta mañakun, chantá ajllasqan llajtapaj ima, nispa. 15Jeremiastaj paña makinta oqharispa, Judasman uj qori espadata jaywasqa, chantataj nisqa: 16Diospa qosqan kay espadata jap'iy, mayqentachus Dios t'inkata jina jaywashasunki, chayta. Kay espadawanqa awqaykikunata wañuchispa, kantumanta chinkachinki, nispa. Ajinata Judas mosqokusqanta willarqa.
17Judaspa k'acha parlasqan astawan waynakunata kallpacharqa. Chayrayku judiokuna wapuchakuspa, nerqanku manaña jarankupi qhepakunankuta, manachayqa awqankukunawan maqanakoj llojsinankuta. Jinapi paykuna chay tukuy ima ujkama tukukunanta munarqanku, imaraykuchus Jerusalén llajtaman, jinataj Diosta yupaychanaman, chantá Temploman ima jatun llakiy jamushasqanta repararqanku. 18Jinapis warminkumanta, wawqenkukunamanta, tukuy ayllunkukunamanta ima llakikorqanku chaypis, astawanpuni Templomanta llakikusharqanku, imaraykuchus Temploqa chaypachallaraj llimphuchasqa kasqa. 19Llajtapi qhepakojkunapis may llakisqallataj kasharqanku, paykunataj phutikorqanku awqankukunawan maqanakupi imachus kananta yuyaspa.
20Tukuyninku manchachikuywan suyasharqanku imapichus tukuy ima tukukunanta. Awqakunaqa wakichisqaña karqanku maqanakoj yaykunankupaj. Elefantekunapis kanankupi churasqaña karqanku. Puraj ladopitaj caballopi rej soldadokuna kallarqankutaj. 21Jinapi Judas Macabeo may chhika soldadokunata qayllamushajta rikorqa. Rikullarqataj tukuy imaymana armakunayoj kasqankuta, phiña elefantekunatapis. Pay allinta yacharqa mana pipis armakunallawan atipayta atisqanta, manachayqa Tukuyta Kamachej Dios munayninman jina pitapis atipachisqanta. Chayrayku, Macabeo makinta janajman oqharispa, t'ukunata ruwaj Tukuyta Kamachej Dios yanapananta mañakorqa 22Pay nerqa: Qan, Tukuyta Kamachej Dios, maypachachus Ezequías Judapi kuraj kamachej karqa chaypacha, angelniykita kachamorqanki. Jinataj payqa Senaqueribpa#2 R 19.35; Is 37.36; 1 Mac 7.41; 2 Mac 8.19. soldadonkunamanta yaqha 185.000 runakunata wañucherqa. 23Kunanpis, qan, janaj pachapi Tukuyta Kamachej Dios, ñawpaqeykuta k'acha angelniykita kachamuy, awqaykukunata manchachinanpaj, kharkatitichinanpaj ima. 24Jatun atiyniykiwan k'iriykuy qanta mana manchachikoj runakunata, pikunachus qanpaj millayta rimanku, ajllakusqayki aylluykitapis maqanku, chaykunata, nispa.
25Chaykama Nicanorpa soldadonkunaqa trompetakunata waqarichispa, takispa ima maqanakoj jamusharqanku. 26Judaspa soldadonkunataj Diosmanta mañakuspa, maqanakuman rishallarqankutaj. 27Chantá makinkuwan maqanakuspa, sonqonkupitaj Diosmanta mañarikuspa, paykuna 35.000 jina soldadokunata wañucherqanku. Chay jinata Dios paykunata yanapasqanmantataj may kusisqa qhepakorqanku. 28Maqanakuyta tukusqankumanta kusisqa ripushaspa, paykuna Nicanorta pampapi wañusqata rikorqanku, tukuy maqanakuna armanwan khuskata. 29Chantá, parlayninkupi sinch'ita qhaparispa, Tukuyta Kamachej Diosta yupaycharqanku. 30Macabeoqa wayna kasqanmantapacha ayllunta munakusqa, tukuy sonqowantaj ayllunpa allin kayninta mask'asqa. Paytaj Nicanorpa umanta qholurparinankuta kamacherqa, jinallataj paña makintapis khuchunankuta. Chantaqa chaykunata Jerusalenman apanankuta nerqa.
31Chaymantataj Judas Jerusalenman rerqa. Chaypitaj llajta masinkunata, sacerdotekunatapis tantacherqa. Jinaspataj, altarpa ñawpaqenpi sayaspa, pikunachus pukarapi kasharqanku, chaykunatapis wajyachillarqataj. 32Tukuyninku chaypiña kashajtinkutaj, paykunaman rikucherqa millayta ruwaj Nicanorpa qholusqa umanta, makinta ima. Nicanorqa manchayta wapuykachaspa, chay makinta oqharisqa Templo cheqaman, may kasqanta yuyakuspataj, Tukuy Atiyniyoj Diospa contranta rimasqa. 33Chaymantataj Judasqa millayta ruwaj Nicanorpa qalluntapis chhikan chhikanta khuchuspa, suwintukunaman qaranankuta kamacherqa. Jinallataj Nicanorpa makinta Temploj ñawpaqenpi churanankuta nerqa ajinamanta Nicanor loco jina millay ruwasqanmanta pagananpaj. 34Chaymantataj tukuyninku janajman qhawaspa, Tukuyta Kamachej Diosta kay jinata yupaycharqanku: Jatunchasqa kachun Tukuyta Kamachej Diosninchej, imaraykuchus payqa Templonta waqaycharqa ama ch'ichichasqa kananpaj, nispa. 35Jinallataj Judasqa Nicanorpa umanta pukara perqapi warkhuchillarqataj. Ajinamanta chayta rikuspa, tukuy yuyarikunankupaj Tukuyta Kamachej Dios imaynatachus paykunata yanapasqanmanta. 36Chaymanta, tukuyninku uj sonqolla nerqanku sapa wata chay p'unchaypi raymita ruwanankuta. Ajinamanta chaymantapacha raymita ruwanankuta nerqanku sapa chunka iskayniyoj kaj killapi, chunka kinsayoj kaj p'unchaypi. Chay killaqa arameo simipi nikun Adar. Chay killa tukukuytataj Purim nisqa raymi qallarin.
Tukukuynin
37Nicanorpa tiemponpi imachus kasqan ajinata tukukorqa. Chaymantapachataj Jerusalén llajta hebreokunaj makinkupi karqa. Noqapis kaypi kaymanta willasqayta tukuchini. 38Sumaj qhelqasqa, sumaj ruwasqataj kajtin, noqa sonqo junt'asqa kasaj. Mana allinchu, maychus chaylla kajtinrí yachanaykichejta munani chayllata ruwayta atisqayta. 39Yachankichej jina vinollata, chayrí yakullata ujyanaqa mana misk'ichu. Aswan misk'i vinoqa yakuwan chajrusqa llaminaqa. Ajinallatataj, uj p'anqapi tukuy imaymanamanta qhelqasqa kajtin, pikunachus ñawirejkuna ñawirispa misk'irichikunku. Kaypi imamantachus qhelqasqayta tukuni.
Currently Selected:
2 Macabeos 15: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.