2 Macabeos 14
14
Nicanor Judaswan tratota ruwan
(1 Mac 7.1-38)
1Kinsa watanman, Judas, chantá soldadonkuna ima yacharqanku Seleucoj churin Demetrio Trípoli barco sayana cheqaman chayamusqanta ashkha soldadowan, barcokunawan ima. 2Chantá, Antiocota, payta yuyaychaj Lisiastapis wañuchiytawan, Demetrio tukuynin Siria suyuta jap'isqa.
3Chay tiempopi, uj runa Alcimo sutiyoj karqa. Pay ñawpajta kuraj kaj sacerdote kashaspapis, munasqanraykulla Diospa ñawpaqenpi ch'ichichakusqa, yachaspa mana ujtawan altarman qayllaykuyta atinanta. 4Jinataj 151 kaj wata kashajtin, Alcimo kuraj kamachej Demetriota watukoj rerqa. Chaypacha Alcimoqa Demetrioman uj qori pilluta, uj palmatawan jaywarqa, jinallataj olivo sach'amanta thansakunata ima, imaynatachus Templopi jaywaj kanku, ajinata. Chay kutipirí chay qosqanmanta ni imatapis mañakorqachu.
5Chantá, uj kuti Demetrio yuyaychajkunaj tantakuyninkuman Alcimota wajyarqa. Chaypitaj taporqa imatachus judiokuna yuyasqankuta, chantá imayna sonqochus kashasqankuta ima. Chaypacha Alcimoqa mana allin yuyasqanta sut'iman orqhospa, nerqa: 6Judiokuna ukhupi Diosninkoj kamachisqanman jina purej runakuna tiyan, paykunataj hasideo nisqa kanku. Kamachejninkutaj Judas Macabeo. Chay runakuna wajkunata tanqanku kamachejpa contranta oqharikuspa maqanakunankupaj, manataj maypipis allin kawsay kananta saqenkuchu. 7Paykuna kuraj kaj sacerdote ruwanaymanta wijch'uwarqanku, mayqentachus ñawpa tataykunamantapacha jap'erqani, chaymanta. Chaywanpis noqa mana chayraykullachu kayman jamorqani. 8Aswanpis kay iskay imakunamanta qanwan parlaj jamuni: Ñawpajta, qan kuraj kamachejniypa allinniykita mask'aspa jamuni. Chantá, noqaqa llajta masiykunata yanapayta munaspa jamuni. Pikunamantachus ñaqhetalla parlasharqayki, chay mana yuyayniyoj runakunarayku tukuy judiokuna may jatun llakiypi kashanku. 9Kuraj kamachejníy, chay tukuy imamanta allinta tapuriwaj. Tukuy imata sumajta yachaspataj, aylluypaj imachus astawan allin kananta ruwawaj, imaraykuchus aylluykuman tukuynejmanta llakiykuna chayamun. Qan k'acha kasqaykirayku llajta masiykunapaj allin kajta ruway ari. 10Chaywanpis sichus Judas kawsallanqapuni chayqa, tukuy kamachiyniykipi manapuni allin kawsay kanqachu, nispa.
11Alcimo chayta nisqantawan, kuraj kamachejpa yuyaychajninkunapis Judasta chejnikusqankurayku tukuy imamanta tumpallarqankutaj. Ajinamanta Demetrioj sonqonta astawan t'impuricherqanku. 12Chantá kuraj kamachej chay kikinpacha Nicanorta churarqa Judea jap'iyta kamachinanpaj. Payqa elefantepi rej soldadokunata kamachej karqa. 13Ajinaqa kuraj kamachej payta kacharqa Judasta wañuchinanpaj, chantá payta qhatejkunata ch'eqerachinanpaj ima. Jinallataj kamacherqa watej jatun templopi Alcimota kuraj kaj sacerdotepaj churanankuta. 14Jinallataj ñawpajta Judeamanta pikunachus Diosta mana manchachikojkuna Judasta manchachikuspa, ayqesqanku. Kunantajrí paykuna Nicanorman k'askarqanku, imaraykuchus yuyarqanku pay judiokunata atipajtin, paykunapaj allin kananta.
15Judiokunarí Nicanor jamushasqanta yachaspa, umankuman jallp'ata qhalliykukorqanku, Diosmantataj mañakorqanku. Yuyarikorqanku Diosqa ayllunta wiñaypaj chay jallp'aman churasqanta, jinataj atiyninwan paykunata waqaychasqanta t'ukuna imakunata ruwaspa. 16Chantá Judas kamachejtinpacha tukuy soldadonkuna awqakunawan maqanakoj llojserqanku. Hadasá llajta chaynejpitaj Nicanorpa soldadonkunawan tinkorqanku. 17Judaspa wawqen Simón Nicanorpa contranta maqanakusharqa. Chaywanpis awqankuna ujllata chayamojtinku, Simonpa soldadonkuna mancharikorqanku. Chayrayku chay maqanakupi paykuna atipachikorqanku. 18Jina kajtinpis, Nicanor yacharqa Judaswan, soldadonkunawan ima maqanakupaj wapu kasqankuta. Jinallataj yacharqa suyunkuta munakusqankurayku sinch'itapuni maqanakusqankuta ima. Chayrayku paykunawan allinyakuyta munarqa mana maqanakuspalla. 19Chayrayku, Posidoniota, Teodotota, chantá Matatiasta ima kacharqa, Judaswan allinyakuy tratota ruwanankupaj.
20Judasqa chay tratoj nisqanta allintapuni qhawaspa, soldadonkunaman chay trato ruwanamanta willarqa. Soldadokunamantaj allinyakuna tratota ruwasqanku allin rijch'arqa. 21Chayrayku uj p'unchayta churarqanku iskaynin kamachejkunalla tantakunankupaj. Chay p'unchay chayamojtintaj, sapa ladomanta uj carreta llojserqa. Chaypachataj iskaynin kamachejkunapaj sumaj tiyanakunata churarqanku. 22Judastajrí wakinnejpi soldadokunata churarqa, paymanta qhawanankupaj, yuyaspa ichapis Nicanor payta q'otiyaspa wañuchiyta munananta. Chantá sapa uj carretanpi chayarqa, iskayninkutaj uj yuyaylla uj tratota ruwarqanku.
23Chaymanta Nicanorqa Jerusalenpi unayta qhepakorqa. Chaypi maychus kajta ruwaspataj, allillanta kakorqa. Jinapitaj, pikunachus payta qhatej kanku, chay soldadokunatapis kachapullarqataj. 24Nicanorqa Judas paywan khuskapuni kananta munarqa, imaraykuchus payqa Judasta mayta q'ayachakorqa. 25Jinataj Nicanor Judasta casarakunanta yuyaycharqa, wawayoj kananta ima. Judastaj casarakorqa, allintataj tiyakorqa.
Nicanor watejmanta Judaspa contranta oqharikun
26Alcimo rikorqa imaynatachus Nicanorwan Judaswan allinpi kashasqankuta. Chayrayku trato ruwasqankumanta qhelqata jap'ispa, kuraj kamachej Demetriota watukoj kachaykukorqa. Chantá payta nerqa Nicanor kuraj kamachejpa contranta oqharikuyta munashasqanta, imaraykuchus payqa Judasta churasqa paypa cuentanmanta Jerusalenpi kuraj kaj sacerdote kananpaj. Judastajrí kuraj kamachejpaj awqan kasqanta nillarqataj. 27Kuraj kamachej Demetrio chayta uyarispa, mayta phiñakorqa. Chantá, chay millay ruwaj runaj tumpasqanta uyarisqanrayku, uj cartata Nicanorman apacherqa. Chay cartapitaj nerqa mana allin ñawiwanchu qhawasqanta Judaswan trato ruwasqanta. Nillarqataj usqhayllata Judas Macabeota jap'inanta, chantá Antioquiaman pusachinanta ima.
28Nicanorqa kuraj kamachejpa cartanta ñawiriytawan, mana yacharqachu imatachus ruwananta. Pay yacharqa Judaswan trato ruwasqanta p'akina mana allinchu kasqanta, imaraykuchus Judas mana imatapis mana allinta ruwarqachu. 29Chaywanpis, kuraj kamachejpa kamachisqanta junt'anapuni kasqanrayku, pay umachakorqa imaynamantachus chay kamachisqata junt'ananpaj.
30Judasqa Nicanor mana allintañachu payta qhawasqanta repararqa. Sapa tinkojtinku, paywan parlaspa Nicanor mana k'acha sonqowanñachu parlapayarqa. Judas repararqa aswan jaqayman manapuni allinchu kananta. Chayrayku payman sayasqa kajkunamanta ashkhata tantaykuspa, Nicanormanta pakakunanpaj ayqerqa.
31Maypachachus Nicanor yacharqa imatachus ruwayta yuyashasqanmanta ñawpakuspa Judas ayqesqanta chaypacha, pay Diospa t'aqasqa may llimphupaj qhawasqa Temploman rerqa. Sacerdotekuna uywa ñak'asqata q'olachispa jaywashajtinku, Nicanor Temploman chayaspa, paykunata kamacherqa Judasta payman jaywanankuta. 32Sacerdotekunatajrí tiluspa nerqanku manapuni yachasqankuta maypichus chay runa kashasqanta. 33Chantá, Nicanor paña makinta Temploman oqharispa, ajinata tilorqa: Manachus Judasta watasqata pusamuwankichej chayqa, noqa kay Templota thuñirparisaj, altartapis phirirparichisaj. Chantá kay cheqapi uj k'acha templota dios Bacopaj oqharichisaj, nispa. 34Chayta niytawantaj riporqa.
Chantá sacerdotekuna makinkuta pataman oqharispa, pichus ayllunta qhawarej Diosmanta kay jinata yanapananta mañakorqanku: 35Tukuyta Kamachej Dios, qan mana ni imatapis necesitankichu. Chaywanpis qan kay Templota tiyakunaykipaj ajllakorqanki, noqaykuwan khuska kayta munasqaykirayku.#1 R 8.27-30; Hch 17.25. 36Kunanqa, May Llimphu Kaj Tukuyta Kamachej Dios, kay qanpaj t'aqasqa Templota waqaychaypuni, amataj ch'ichichasqa kananta saqeychu imaraykuchus qanimpalla llimphuchasqa karqa,#2 Mac 10.1-8. nispa.
Razís wañun
37Jerusalenpi uj runa Razís sutiyoj karqa, kurajkunamanta ujnin kaj. Chay runaqa llajta masinkunamanta maytapuni qhawaj. Payqa may rejsisqa, munasqataj karqa. Tukuy judiokunataj tatankuta jina payta qhawaj kanku, k'acha kasqanraykutaj “Judiokunaj tatan”, nispa nej kanku. Chay runamantamin Nicanorman mana allintachu parlarqanku. 38Ñawpajta, judiokuna oqharikuyta qallarishajtinku, Razís judío masinkunaman sumaj k'askasqa karqa. Chaywanpis, pay mana manchachikorqachu Diosta tukuy sonqo qhatisqanrayku payta wañuchinankuta. 39Jinapi Nicanorqa, judiokunata chejnikusqanta rikuchiyta munaspa, 500 soldadokunata jina kacharqa Razista jap'inankupaj. 40Nicanor yuyarqa chay runata jap'ichejtin, judiokunapaj may jatun llakiy kananta.
41Ajinaqa chay soldadokuna chayarqanku, maypichus Razís kasharqa, chay torreman, jinaspataj, payta jap'inankupaj jinaña karqanku. Paykuna torrej punkunta mana urmachiyta atishajtinkutaj, soldadota kamachejkuna kamacherqanku punkuta ruphaykuchinankuta. Razistajrí, mana ni mayman ayqeyta atispa, espadanwan pay kikin t'ojsikorqa. 42Razisqa mana p'enqachisqachu wañuyta munarqa. Nitaj runa wañuchejkunaj makinkuman urmayta munarqachu, nillataj p'enqayta ñak'arichinankuta. 43Chaywanpis maqanaku sinch'i kasqanrayku, t'ojsikuspapis, Razís mana wañorqachu. Jinaqa, soldadokuna punkunejta yaykumushajta rikuspa, Razís mana manchachikuspa torre pataman wicharerqa. Chay patamantataj soldadokunaj patankuman wijch'uykukorqa. 44Soldadokunatajrí ithirikorqanku, Razistaj q'ara pampaman urmaykorqa. 45Chaywanpis manaraj wañushaspa, sayarerqa, sinch'i nanasqa kashaspapis, yawar sut'ushaj soldadokunaj chawpinkuta rerqa. Uj jatun qaqamantaj chayarqa. 46Chaypi, manaña kallpan kashajtin, ch'unchulanta makinwan orqhokuspa, soldadokunaman qhalliykorqa. Chantaqa, kawsayta qoj Tukuyta Kamachej Diosmanta mañakorqa, jayk'ajllapis watejmanta kawsayninta kutichipunanta. Ajinata Razís wañorqa.
Currently Selected:
2 Macabeos 14: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.