Thuhilhna 2
2
Nopsaknate Amawknapi
1Ka lungsim sungah, "Hong pai dih in a hoih na muh khiat nadingin nopsakna tawh nang kong zia-et ding hi," ci-in ka ngaihsun hi. Ahi hangin tua zong a mawknapi mah ahi hi. 2 "Nuihna in haina ahi hi. Tua hileh nopsakna a khiatna bang ahi hiam?" ka ci hi. 3 Zu-a gualnopna le haina kawicip kawmin - ka lungsim pilna tawh a makaih dingin kei mahmah ka hanciam hi. Van kikhupsin nuai-ah mihingte tomvei a nuntak sungin bang sem leh manpha ding hiam, cih ka thei nuam hi.#Thk 9:13; Thn 7:4
4 Nasep lianpi ka sem hi: Kei ading innte lamin lengguite ka suan hi. 5 Huan le khawlmun nuamte ka bawl a, tuate sungah singgah kung namcin ka suan hi. 6 Tua singhalhte tui buah nadingin bualtuite ka bawl hi. 7 Sila numei le sila pasal ka lei-a, ka inn sunga suak adang sila zong ka nei hi. Kei ma-a Jerusalem a om khatpeuh sangin tuuhon le bawng hon tam ka nei zaw hi. 8 Kei mahmah in kumpite le gamte neihsa gou ngun le kham tampitak ka khol hi. Pasal lungsim nopna dingin mihing a lung nuamsak ding - lasa numei, lasa pasal le pasal lungsim nopna dingin zi tampi koihna a#2.8 Hebrew-in hih gual a khiatna kician lo hi. zong ka nei hi. 9 Kei ma-a Jerusalem a omsate sangin nakpi in ka lianzaw tham hi. Hihte khempeuh ah ka pil ngei-in ka pil hi.
10 Ka mit iplah khempeuh panin ka kidaam kei hi;
ka lungsim nopsakna ka nial kei hi.
Ka nasep khempeuh ah nuam ka sa a,
hih in ka gimna khempeuh hanga ka pahtakman ahi hi.
11 Tua hi napi ka khuta ka sepsa khempeuh
ka et phat kik ciangin
haksapi a ka sepnate khempeuh a mawknapi, huih nungdelh lel ahi hi;
sunni nuai-ah hamphatna bangmah a om kei hi.#Thn 1:3
Pilna le Hainate Amawknapi
12 Tua ciangin pilna,
haina le haitatna ka ngaihsun leuleu hi.
Kumpite zalaihte in a ma-a semte sepsa zah val
bang sem thei ahi hiam?#Thn 1:9
13 Khuamial sangin khuavak a hoihzawk bang tektekin#Thn 7:11-12
haitatna sangin pilna a hoih zawk lam ka mu hi.
14 Mihaipa in khuamial sunga a pai laitakin
mipilpa in a lutangah mit nei a,
ahi hangin a nih un a kibanga
a tuah ding uh ka thei hi.#Ph 49:10
15 Tuateh ka lungsim ka ngaihsun a,
"Mihaite tuah mah kei zong ka tuak ding hi.
Tua ciangin ka pil manin bang lawhtak ding ka hi hiam?" ka ci hi.#Thn 6:8
Ka lungsim sungah,
"Hih zong a mawknapi hi ei!" ka ci hi.
16 Ahang in, mihaite mah bangin mipilte sawt a kiphawk tuan kei ding hi;#Ph 112:6
mailam hunah a nihun kimangngilh ding hi.#Thn 1:11
Mihaite mah bangin mipilte zong a si pelmawh ding uh hi.#Ph 49:10
Haksapi-a Nasep Amawknapi
17 Tua hi-a sunni nuai-ah gimpi-a nasep in hong khasiasak lel ahi manin nuntakna ka mudah hi. Tuate khempeuh a mawknapi hi a, huih nungdelh lel ahi hi. 18 Kei nunga piang dingte adingin ka nusiat pelmawh ding ahi manin sunni nuai-a haksapi-a sepsa na khempeuh ka mudah hi. 19 Tua hi-a, kua in amah a pil ahikeh a hai ahih ding lam thei ahi hiam? Tua hi napi sunni nuai-a hanciamna le siamna tawh ka sep khempeuh tungah amah in uk ding hi. Hih zong a mawknapi mah ahi hi. 20 Tua ahi ciangin sunni nuai-ah haksapi a ka nasepte khempeuh hangin ka lungkiat ding kipan hi. 21 Ahang in, mi khat in a pilna a siamna le a theihna tawh na sem dinga, a sem lo mipa adingin ama neihsa khempeuh a nusiat ding hi. Hih zong a mawknapi mah hi-a, vangsiatna lianpi khat ahi hi. 22 Mihing in haksapi in sunni nuai-ah thatang sanin na a sep man bang ngah ahi hiam? 23 A nuntak sunga ama nasep, natna le dahna ahi hi; zan nangawnin a lungsim a tawlnga kei hi. Hih zong a mawknapi mah ahi hi.
24 Mi khatin, ne-in dawnin na a sepna ah a lungkimna zah val a hoihzaw bangmah a sem thei kei hi. Hih zong Pasian khutsuak hi, cih ka mu hi; 25 ahang in, amah loin kua in an ne-in nuamsa thei ahi hiam? 26 Pasian in amah a lung kimsakpa tungah pilna, theihna le lungnopna pia-a, mawhneipa ahileh Pasian a lungkimsakpa tungah a ap ding hauhnate kaikhawmsakin a kholsak hi. Hih zong a mawknapi mah hi-a, huih nungdelh lel mah ahi hi.#Ph 39:6
Currently Selected:
Thuhilhna 2: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission