Sekaria 13
13
Wechɔɡa ne doŋa sɔe dɛ ta wa
1Nemenɛ Korowii ŋɔ, “Tɔpere bɛl ɛɛ bao, ásɛ nee bule dɛɛ le harɛ bini tɛ Kooro Devid ne o naanar, ne bwɛjen Jerusalam tena. Belaa baa ba laŋa, dɛ́ ka sɔ ba wechɔɡa baa ɛa, ne doŋa baa kaah bwa ta.
2Mɛɛ le voɡa aa lɔ harɛ la ta la nee awola, baa wola a sɔnaa lii kpa. Mɛɛ le keame nyosonteŋna la nee, ásɛ dɛ ɡel ba pɛla le voɡa toma ta. 3Dɛ nomɛl dɛ teŋe nyosone ŋɔ waane ɛɛ chiɡuu kerekere aa, naate nya ne o mɛɛ ŋɔ o be ŋɔ, ‘A chɛ kɛŋɔ hé sewɛ, dɛkalkɛ he teŋe nyosone Korowii sɔn ta.’ O ta teŋɔ dɛɛ bol aa, o nya ne o mɛɛ ɡbaɡba tɔɡɔ kere kpo.
4Awola tɔpere la, sihiih ɛɛ kpo keame bɛlbwa waa ŋɔa o dɛ na chaahnaa. Waa keamere batakaaree do dɛ́ neɡre nɛra kpa. 5Wɛɛ ŋɔɔ, ‘N ta keame ɛɛ, paaree men, n bonɔɔne saŋ bwaa n le dɛɛ parɛ.’ 6Dɛ nomɛl bɔɔ bɛlbwa kon la aa ɡela pɛl dawɛ o bwara ta naa, wɛɛ chaŋoo ŋɔ, bolii ba doo o damanar dem.”
Ba kpo peteɡre la asɛ peera la lɔ peɡre
7Koranar Bwa Kooro ŋɔ,
“Mɛɛ ir n keree dɛ́ kpo n
peteɡre waa dɛ tom mɛ la.
Kpo peteɡre la
ásɛ peera la lɔ peɡre
ń dɔ bɔr kpoo a bii la.”#Mat 26:31
8Korowii ŋɔ, “Harɛ la ta bwa
ba bɔne ba bini bɔre atoro
naa, baa kpɔ kerii kpoo
bɔre anɛ nɛra
á ba ka bɔrbeŋkpoŋ nɛra.
9Bɔrbeŋkpoŋ nɛra nɔɔ mɛɛ
ba kpɔe kpɔ nii ta
kɛŋɔ baa kpɔ suuɡapoŋ ne
suuɡaswɛm do nii ta dɛ
laa a doŋa dɛɛ kpɔ a ta la.
Baa yerɛ n sɔnee,
ásɛ n ɡe sɛh ba be.
Mɛɛ ŋɔɔ, ‘N nɛraa ban,’
ásɛ ba ŋɔ, ‘Korowii
yaa dɛ tomɔɔ laanee la.’ ”
Currently Selected:
Sekaria 13: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.