Sekaria 12
12
Jerusalam tena kerekere lɛɛ wa
1Israel waa aa le Korowii bee nɔ. Korowii waa ta nyundua ne harɛ, dɛ ta nɛwɛnyini la ŋɔ, 2“N dɛ ba ɡela Jerusalam do kɛ numol sen aa lɔ o bini tɛ harɛre aa baro la nɛra, ásɛ ba kpɔ nyɔ dɛ́ dɛɛ, dɛɛ yɛɛɡe. Dɛ ba tɔ Jerusalam do aa, bá tɔ Juda ɡe do ja. 3Awola tɔpere la, mɛɛ ɡeloo Jerusalam do kɛŋɔ bwe, waa yiiɡi. Harɛ nɔ nɛra bwa aa pɛ nyoa dɛ́ ba yoo ba la, bɛlbwa waa ŋɔ wɛɛ ɡɔɔ bwe laanee la, wɛɛ doo bolii. 4Awola tɔpere la, mɛɛ ɡeloo ba dɔma jaɡre ɔmɛ, dɛ́ ɡel nɛra baa dɛ so a ta la we choɡla. Mɛɛ nyiŋi Juda dea tena nɛɛ kɛrɛdɛ, dɛ́ ɡel ba dɔma jaɡre nyoŋe. 5Ásɛ Juda nomonome bol dɔŋa be ŋɔ, ‘Jerusalam tena kpeɡri, dɛkalkɛ Koranar Bwa Kooroo baa tomɛ.’
6Awola tɔpere la, mɛɛ ɡeloo Juda nomonome do kɛŋɔ koropɔɔto ninhɔla aa suu dɛ́ do dahola baah dɛɛ hɔ, kɛɛ kapɛle aa lɔ mea baah ta dɛɛ lawɛ nii. Baa chɔɡ harɛre aa bar ba la nɛra bwaa, kɛ Jerusalam tena te ɛɛ so ba buɡ taa deŋnesɔɔhna ne.
7Korowii ɛɛ tɔ sie lɛ Juda dea tena mɔɔ, ɡɛ aa ɛ Kooro Devid naanar ne nɛra baa soɡe Jerusalam la jirima bɛ Juda tena ɡwaa. 8Awola tɔpere la, Korowii ɛɛ tɔ nɛra baa soɡe Jerusalam ɡbemɡbee, hale ɡwɛɡre kwaraa waa lɔ ba bini kpeɡri do kɛŋɔ ɡɛ Kooro Devid fa aa doa la. Ásɛ Kooro Devid naanar tɔ ba sie kɛŋɔ Korowii nyundua torome kɛɛ Korowii ɡbaɡba. 9Awola tɔpere la, mɛɛ chɔɡ harɛre aa dɛ yo Jerusalam tena laanee.
Nɛn baa yaɡɔ kere ne wiile
10Mɛɛ ɡeloo sum nae ne Korowii soŋa Doma ba so Kooro Devid naanar, ne Jerusalam tena bane nɛ. Baa dɛɛ nyiŋi naate baa yaɡɔ lampea ne o sewɛ laanee, dɛɛ wiu kɛŋɔ nɛra aa dɛ wi ba bibeŋkpoŋ waa sewa, kɛɛ baa dɛ wi ba bibanloɡle waa sewa la ken.#Jɔn 19:37 11Awola tɔpere la, wii waa do Jerusalam la ɛɛ do kanee, kɛŋɔ Hadad Remɔn#12:11 Hadad Remɔn ken ɛ voɡ Baal sɔn. Nɛra dɛ lii kɛŋɔ konduula bwa sewaa, dɛ o ɡe sewɔ. tena wii baa wi Meɡido deŋɡare doa harɛ waa chɔa kaa ta la. 12Harɛ la tena bwa ɛɛ wiu, dea bɛlbwa nɛra ne ba haahna ɛɛ wiu. Kooro Devid dea, ne Netan dea, 13ne Lewi dea, ne Simee dea 14dɛ deene la kar nɛra bwa ɛɛ wiu. Dem te bɛlbwa, baaloo, haahnoo, ba bwaa dɛɛ ba wii.”
Currently Selected:
Sekaria 12: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.