Sekaria 14
14
Korowii Kora ba dii wa
1Tɔpere Korowii aa lea cheɡ dɛ́ bol nɛra waa dɛ́ pa bole la dɛ ba. He dɔma ɛɛ ba pa he Jerusalam tena laala kɛ laa ta kwa, dɛ́ bɔna he siwi ta.
2Korowii ɛɛ boa harɛre nɛra nyoa bá ba yo bwɛjen Jerusalam tena, dɛ́ lɛ bwɛjen la dɔɔh. Baa jo ba deene, dɛ́ pa ba laala, dɛ́ ɡuɡri ba haahna chɔ. Baa lawɛ bwɛjen la pera nɛraa kaa bojaŋ harɛfale ta, dɛ́ ɡel ba kar bwɛjen la ta.
3Korowii ɛɛ leo, dɛ́ ka yo a ɡɛ harɛre la nɛra ɡɛ waa dɛ yo saŋ la. 4Awola tɔpere la, wɛɛ ka che Ɔlevere Bwejen la taa, Jerusalam wee leebɔr. Ásɛ Bwejen la bini bɔne anɛ le wee leebɔr ba kaa wee cholibɔr, dɛ́ ɡel fɛlembɔjen chɔ baah ta, ásɛ Bwejen la pera do weekaŋle nyunduabɔr, o pera ɡe do weekaŋle harɛbɔr. 5Hɛɛ chwao kpɔ fɛlembɔjen waa bɔne Bwejen la binii kaa bwɛɛ bɛl baa dɛ yerɔ Asɛl ta. Hɛɛ chwao ɡɛ he naawa fa aa chwaa ɡɛ saŋ harɛ aa jiɡra dɛ Juda Kooro Ussia di kora la.#Emɔ 1:1 Korowii maa dɛ tomɔ la ɛɛ bao, o nyundua toroma bwa ja o nɛ.
6Awola tɔpere la, wee aa lɔ, waa aa ba, kwaa aa sɔɔh dɛ hel kɛŋɔ dombwea. 7Gɛ tɔpere la dɔŋ ta balɛ bwa, webaŋa toole, jwaana ɡe toole, Korowii ɡboo jemɛ a ɡɛ tɔpere la wa. Hale jwaana kwara dɛ bɔr ta chaahnɔ.
8Awola tɔpere la, nedɛɛɡe ɛɛ palɔɔ le Jerusalam, o pera kaa Yar Mpo ta, o pera berɛ kaa Mɛdetereenea Mpo ta bɔwɔb ne waa saŋ bwa.#Ɛse 47:1; Wep 22:1 9Korowiirii dɛ́ ɛ kooro awola tɔpere la harɛ nɔ bwa ta. Nomɛlbwa ɛɛ dɛɛ tomɔɔ, dɛ́ jemɔ dɛɛ yerɛ o ɡbo sɔn.
10Harɛ la bwa, dɛ le Geba kaa Remɔn waa lɔ Jerusalam weekaŋle harɛbɔr ɛɛ chɔɔ kaa Jɔɔdan Moo la ta. Ásɛ bela Jerusalam aa lole la dawɛ nyundua o buɡ ta, dɛ́ le Bɛnjamen Doonyoa dɛ́ kaa bela Doonyoa Waa Tɔ Sie la aa lole la, ne Loŋkora Doonyoa, dɛ́ teŋe kaa Hananɛl Dejaŋ, dɛ́ kaa bela baa dɛ harame kooro daa nɔna nee dɛ kpɔ dɛɛ ɛ sen la ta. 11Nɛra ɛɛ ba so Jerusalam deŋnesɔɔhna taa, nomɛlbwa aa wola won ba aah o nɛra dɛ́ chɔɡo kpa.
12Weechɔɡa Korowii aa dɛ ba kpɔe ba ta harɛre a nɛra aa ba yo Jerusalam tena laanee nɔ. Ba bwadabii ne ba sibie ne ba nyondoŋa ɛɛ pɔɔh, dɛ ba ta serewɛ. 13Awola tɔpere la, Korowii ɛɛ kpɔ ɔmee kohonaa ba ta ba nɛ, á ɡel ba lawɛ dɔŋa nɔɔra, dɛɛ yo dɔŋa. 14Juda tena ɡe ɛɛ ka cha Jerusalam tenaa yo. Baa pa harɛre aa baro la nɛra kondɔɔh, suuɡaswɛm ne suuɡapoŋa dɛ yale kohonaa. 15A ɡɛ weechɔɡa la siwi ɛɛ ba jaɡre ne keeɡore, ne nyoɡmare dɛ kondɛɛra aa lɔ bela ba dɔma aa soɡa la bwa nɛɛ.
16Harɛre ta nɛra baa ba yo Jerusalam tena ásɛ ba bini bane ka la, baa di Kukure Tɔpejen#Lew 23:34, 39-43 la Jerusalam benanyoa bɛlbwaa, dɛɛ tomɛ Kooro waa ɛ Koranar Bwa Kooro la. 17Dɛ harɛ la bɛlbwa nɛra ta Jerusalam laŋɛ ka tomɛ Kooro Waa Ɛ Koranar Bwa Kooro la aa, bwaala aa ban nɛ. 18Ijipt harɛ ta tena ta laŋɛ dɛ ɡe ka tomɛ aa, bwaala aa ban nɛ. Korowii ɛɛ kpɔ weechɔɡa waa kpɔ ta harɛre nɛra báa wola la ka di Kukure Tɔpejen la nɛɛ. 19Waa nɔɔ dɛɛ ba deŋnetɛra ɛɛ, dɛ́ tɛ Ijipt tena ne harɛre nɛra la bwa baa wola la ka di Kukure Tɔpejen la.
20Awola tɔpere la, dorɔŋre baa kpɔ do jaɡre baŋa la, baa chwerɛ a taa ŋɔ, ‘A Do Goroŋ Tɛ Korowii’, ásɛ viine baa kpɔa dɛɛ daa saraha kwaa Korowii Dea la, á berɛ do kɛŋɔ loɡa aa do ɡoroŋ dɛ che kon baa dɛ ɛ saraha o ta la sie. 21Vii bɛlbwa waa lɔ Jerusalam ne Juda ɛɛ do ɡoroŋee tɛ Koranar Bwa Kooro, ásɛ nɛra baa ba ɛ saraha la kpɔ viine la daa ba saraha kwa. Keenan tena bonadiire bɛlbwa aa Koranar Bwa Kooro Dea belaa do awola tɔpere.
Currently Selected:
Sekaria 14: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.