MATTHAI 2
2
Mi varhaiin an hung sir
1Chun, lal Herod inlal laia, Juda rama Bethlehemah Isu a hung piengin, ngai ta, khawsak tienga inthawkin mi varhai Jerusalemah an hung a,
2“Judahai lal hung pieng chu khâwlai am a um a? A arasi khawsak tieng kan hmuh a, ama chibai bûk dingin kan hung a nih,” an ta.
3Lal Herod chun a hriet phingleh a lunginzîng tah a, Jerusalema mi po po khawm an lunginzîng ve a.
4Chuongchun, thiempu lalhai le mihai Dân inchûktirtu po po a ko khâwm a. Krista piengna ding chu ân dawn a.
5Anni chun a kuomah, “Juda rama Bethlehemah hieng ang hin zâwl- neiin a ziek kha,
6 #
Mik 5.2
‘Chun, nang Juda rama Bethlehem,
Juda khawpuihai laiah i chîn tak naw tawp;
I sûnga inthawkin awptu a hung suok ding a ni sih a,
Ka mi Israelhai vêngtu ding chu,’
ti hi,” an ta.
7Chu hnunga chun Herodin mi varhai chu arûkin a ko a, arasi inlang hun chu nguntakin anni ân dawn a.
8Anni chu Bethlehemah ân fetir tah a, “Fe unla, nautê thu chu nguntakin indawn suok ro; chun kei khawmin ama chu chibai ka hung bûk ve theina dingin, in hmu phingleh mi hung hril nâwk ro,” a ta.
9Chun, lal thu chu an hriet a, an fe tah a; chun, ngai ta, khawsak tienga arasi an hmu kha nautê umna chung zâwn a tlunga a ngîr hmakhat chu an hmaah a fe pei a.
10Chun, arasi chu an hmuin an hlim nasa bêk bêk a.
11In sûngah an va lût a, a nu Mari kuoma nautê chu an hmuh a, an bawkkhup a, chibai an bûk a. Chun, an ro bâwmhai an hawng a, a kuomah lâwmna — rângkachak dâm, beraw dâm, murra dâm an pêk a.
12Herod kuoma kîr nâwk lo dingin manga hrila an um leiin, lampui dangah an khuo tieng an kîr tah a.
Aiguptaah an zâm
13Chun, an fe hnungin, ngai ta, Lalpa vântirko Josef kuomah a mangah ân lâr a, “Tho la, nautê le a nu ṭhuoi la, Aigupta ramah tlân hmang rawh, ka hril nâwk hmakhat che chu chutaka chun um zing rawh; Herodin nautê sukbo dingin a zawng ding a nih,” a ta.
14Chuongchun, a tho a, azân azânin nautê le a nu a ṭhuoi a, Aiguptaah a fê tah a.
15 #
Hos 11.1 Herod thi hmakhat chu chutaka chun a um zing a; Lalpain zâwlnei baua, “Ka naupa chu Aiguptaa inthawkin ka ko dawk a,” tia a hril kha a hung tlung theina dingin.
Herodin nautehai ân thattir
16Chun, Herodin mi varhai hlêmin a um ti ân hriet phingin a lung a sen bêk bêk a, mi a tir a, a hun laitak thu mi varhai nguntaka ân dawn suo ang khan, Bethlehem le a vêl po poa pasal naupang kum hnia inthawka hnuoitieng po po chu an rêngin a that ta vawng a.
17Chuong lai chun zâwlnei Jeremiain hieng thu a hril hi a hung tlung tah a:
18 #
Jer 31.15
“Rama khuoah khêkri an hriet a,
Ṭap dâm, mithi ngaia khêk rawng rawng dâm;
Rakil chun a nauhai a ṭah a,
An um ta naw leiin thlamuong thei a ni nawh,”
ti hi.
Aiguptaa inthawka an hung kîr nâwk
(Lk 2.39-40)
19Nisienlakhawm, Herod chu a thi hnungin, ngai ta, Lalpa vântirko Aiguptaa chun Josef kuomah mangah ân lâr a,
20“Tho la, nautê le a nu ṭhuoi la, Israel ramah fe rawh; nautê that tumtuhai kha an thi tah,” a ta.
21Chuongchun, a tho a, nautê le a nu chu a ṭhuoi a, Israel ramah a lût tah a.
22Nisienlakhawm, Arkelaus a pa Herod aiawin ân lal ti a hrietin chutaka fe chu a ṭi tah a; chun, a manga hrila a um leiin Galili tieng a fe ta dai a.
23 #
Mk 1.24; Lk 2.39; Jn 1.45; Is 11.1 Khuo pakhat Nazareth an tia chun a va um tah a: “Ama chu Nazareth mi tîng an tih,” tia zâwlnei baua an hril kha a hung tlung theina dingin.
Currently Selected:
MATTHAI 2: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.