2 Makabi 15
15
Runding Jai Nikanor
1Nikanor ninga berita pasal Judas enggau bala nembiak iya bisi di pelilih menua Samaria. Nya alai iya mutuska runding deka nyerang sida kena Hari Sabat, hari orang Judah ngetu gawa, laban enti iya nyerang maya nya, iya ulih ngelaban, lalu nadai penusah tau ninggang iya. 2Orang Judah ke dipejal masuk raban soldadu Nikanor, enda ngasuh iya munuh ngena jalai ti kelalu jai sereta enda beradat, tang bebasaka Hari Sabat ti udah ditetapka Allah Taala ke meda semua utai. 3Lalu Nikanor, orang ke pemadu jai di dunya tu nanya, “Kati di serega amat bisi Iya ke bekuasa netapka Hari Sabat mesti dintu?” 4Ku orang Judah nyaut, “Bisi! Tuhan ke idup lalu bekuasa di serega ngasuh kami ngintu Hari Sabat.”
5Tang ku Nikanor bejaku, “Au, tang aku ke bekuasa di dunya, lalu aku minta kita angkat mai senyata sereta nitihka jaku raja.” Tang iya enda mujur bejalaika penyai ti diatur iya.
Judas Nyediaka Raban Sodadu Iya Beperang
6Enggau sumbung Nikanor bejaku madahka diri deka nirika siti tugu pengingat kena ngingatka diri menang ngelaban Judas enggau bala nembiak iya. 7Tang Judas tetap arap enggau penuh pengandal ke Tuhan tetap deka nulung iya. 8Ketegal nya, Judas ngelalau bala nembiak iya ngambi sida enda takutka serang munsuh. Iya mai sida ingatka Allah Taala Ke Pemadu Bekuasa ke udah nulung ngelamatu, lalu sekali tu mega sida tetap andalka Iya deka ngasuh sida menang baru. 9Judas meri sida peransang lebuh iya macha ari bup Adat enggau bup bala Nabi, lalu mai sida ingatka semua pemenang perang sida ti udah. 10Udah Judas meransang sida, iya nangkan sida, pasal orang bansa bukai ke enda tau dikarap laban selalu ngelaban sumpah diri empu. 11Baka nya meh Judas nyikap semua sida enggau senyata, ukai semina enggau terabai enggau sangkuh ti ngasuh sida ngasaika pengelikun, tang ngena semua jaku ti meri peransang. Iya mega ngelantangka ati sida ngena jerita mimpi iya, siti genera ti patut dikarap. 12Genera nya baka tu: Judas meda Imam Besai ke dulu suba, iya nya, Onias. Siku orang ke manah, baruh ati sereta nelap, pandai bejaku, lalu ari mit diajar manah enggau orang. Enggau jari ti ditelentangka iya, Onias besembiangka semua bansa Judah. 13Judas lalu meda siku orang buban buk, besai amat kuasa sereta dipebasa. 14Ku Onias, “Tu Jeremiah, nabi Allah Taala, pangan kita. Iya suah besembiangka bansa kitai enggau Jerusalem nengeri kudus.”
15Jeremiah lalu ngulurka jari kanan iya nyuaka siti pedang mas ngagai Judas lalu bejaku, 16“Terima meh pedang tu, siti pemeri ari Allah Taala. Ngena pedang tu nuan deka ngalahka semua munsuh nuan.”
17Jaku Judas ti negu ati sida meransang tiap iku sida, lalu ngasuh ati orang ke biak berani. Nengeri, pengarap enggau Rumah Sembiang sida deka dituntung penusah. Ketegal nya orang Judah mutus ati enggai terunda-runda, tang nyerang munsuh enggau ati gagah berani. Sida mega mutus ati berani betempuh siku sama siku. 18Sida enda kelalu irauka ruang bilik enggau kaban belayan sida, tang iya ke lebih dikirauka sida, iya nya, Rumah Sembiang ti kudus. 19Orang ke tinggal di dalam nengeri berasai irau berundingka perang ba endur ti lapang.
Nikanor Alah lalu Dibunuh
20Semua orang nganti pemutus perang nya. Raban soldadu munsuh benung mansang betusun-tusun enggau raban soldadu ke nepan kuda di kiba enggau di kanan sertai enggau bala gajah sida ba semua endur ti manah. 21Judas Makabi meda raban soldadu munsuh mayuh amat, senyata sida chukup magang, enggau bala gajah sida ti mangah. Iya nelentangka jari iya ke serega, lalu besembiang ngagai Tuhan ke nemu ngaga kereja ajih, lalu iya nemu Tuhan deka meri pemenang ngagai orang ke patut menang, ukai ngagai orang ke bisi raban soldadu ti besai. 22Tu meh sembiang ti disebut Judas, “O Tuhan, rambau Hiskiah raja Judah, Nuan ngirumka melikat Nuan ngambi ngalahka 185,000 iku orang ari raban soldadu Sanherib. 23Diatu, O Tuhan ke bekuasa di serega, kirumka baru melikat Nuan ke manah ngambika munsuh kami gegetar takut. 24Ngena kuasa Nuan ti besai, rusak meh orang nya ke bejai Nuan sereta nyerang nembiak Nuan ke kudus.” Baka nya meh Judas ngujungka sembiang iya.
25Nikanor enggau raban soldadu iya mansang diring bunyi terumpit enggau mayuh lagu perang, 26tang Judas enggau bala nembiak iya minta tulung ari Allah Taala nyatup munsuh. 27Laban sida betempuh ngena jari, lalu ati besembiang ngagai Allah Taala, sida munuh enda kurang ari 35,000 iku orang ari raban soldadu munsuh. Sida gaga amat ati laban ditulung Allah Taala. 28Udah badu betempuh, sida pulai enggau ati lantang. Sida meda Nikanor garing-garing parai enggau senyata iya be endur orang beperang. 29Sida lalu sertai manjung muji Tuhan ngena jaku sida empu.
30Judas Makabi ke selalu berantuka nyawa ngetanka bansa diri endang kenyau ari mit enda kala badu rinduka bansa diri, ngasuh orang mumpung pala Nikanor sereta netak lengan kanan iya. Iya ngasuh orang mai pala enggau lengan nya ke Jerusalem. 31Datai sida di nengeri, Judas ngasuh rayat begempuru. Sida imam diasuh iya nunga alta. Iya mega ngasuh orang ngangauka orang ke diau di kuta. 32Iya lalu mantaika pala Nikanor orang ke jai nya. Iya mega mantaika jari Nikanor ti ngamahka Rumah Sembiang Allah Taala Ke Pemadu Bekuasa. 33Iya nyayat dilah orang jai nya, lalu bejaku madahka diri deka meri dilah nya mimit-mimit kena meri burung makai. Jari Nikanor digantung iya ba seberai Rumah Sembiang kena nunjukka pemeli orang nya. 34Udah nya semua orang ke bisi dia nengkadah ke serega lalu muji Tuhan ke udah ngayanka kuasa Iya, lalu nyaga pengudus Rumah Sembiang Iya. 35Udah nya Judas ngantung pala Nikanor ba kuta ngambika ulih dipeda semua orang tanda Tuhan amat nulung sida. 36Semua bela setuju hari nya dintu belama tiap taun kena ngingatka iya. Hari nya dintu sehari sebedau Hari Mordekhai, iya nya, kena hari ketiga belas dalam ba bulan kedua belas ti dikumbai bulan Adar dalam jaku Aram.
Jaku Penutup
37Baka nya meh pengidup Nikanor. Kenyau ari nya nengeri Jerusalem tetap enggi orang Hebrew. Enggau nya aku ngujungka cherita aku ditu. 38Enti gaya cherita tu manah sereta betul, nyadi meh utai ti dikedeka aku. Tang enti enda berapa manah, lalu nadai reti, sigi naka nya aja meh penemu aku.
39Kitai nemu ngirup wain aja tauka ai aja, enda manah. Wain patut digulai enggau ai, nya baru nyamai dirup. Baka nya mega siti jerita enti ditusi enggau manah tentu nyamai orang macha iya. Enggau nya naka tu meh jerita aku.
Currently Selected:
2 Makabi 15: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia