2 Makabi 14
14
Alkimus Ngelaban Judas (1 Mak7.1-21)
1Tiga taun udah nya, Judas enggau bala nembiak iya ninga rita Demetrius anak Seleukus udah belayar ari penyangkai di Tripolis enggau bala soldadu ngena kapal perang ti mayuh amat, 2lalu merintah menua nya udah sida munuh Raja Antiokus enggau penyaga iya benama Lisias.
3Bisi siku orang benama Alkimus ke kala nyadi Imam Besai suba, tang lebuh menua kacau, iya enggau ati gaga ngubah pengidup diri ngagai chara pengidup orang Gerika. Iya nemu pengidup diri enda likun agi, lalu enda ulih datai ngagai alta kudus. 4Nya alai dalam taun 151, iya mansang betemu enggau Raja Demetrius. Iya meri siti makuta mas enggau daun engkerema ngagai raja, sereta enggau sekeda dan daun kana, ti selalu diserahka nyadi pemeri di rumah sembiang petara bukai. Tang iya nadai nyebut sebarang utai ti dikedeka iya. 5Udah nya baru, iya bisi peluang bejalaika pengawa iya ti beli, lebuh iya dikangau Raja Demetrius baum enggau bala penyanding penemu iya, lalu maya nya raja nanya pasal pengawa ti deka dikereja orang Judah.
Ku Alkimus, 6“Judas Makabi bisi bala ke nitihka iya dikumbai Hasida. Sida nya ngumbai diri kering pengarap ke Allah Taala sereta rinduka bansa enggau menua. Sida selalu ngasut orang beperang lalu ngelaban perintah. Sida enggai meda perintah tu dalam pemaik. 7Nya meh kebuah aku ngelengkaka pengawa nyadi Imam Besai ti endang enggi aku laban nya sigi enggi peturun kami. Kebuah aku datai kitu, 8kesatu, laban aku irau amat berundingka utai ti dikedeka nuan raja aku. Kedua, aku mega berundingka bansa aku ketegal pengawa beli Judas enggau orang ke nitihka iya. Sida nya tau mai penusah ngagai bansa kami. 9Laban nuan udah nemu semua pekara tu, kereja meh utai ti beradat sereta manah dalam penemu nuan kena ngelepaska menua enggau bansa kami ari kena nyak. 10Sagi-agi Judas idup, menua tu sigi nadai pemaik.”
Raja Demetrius Ngirum Nikanor Nyerang Judas
11Udah Alkimus badu bejaku, bala penyanding penemu raja ngena peluang nya ngapi Raja Demetrius ngambi ringat ngagai Judas laban semua sida nya begedika Judas. 12Nikanor, tuai bala soldadu ke ngena gajah, terus dituduh raja nyadi gabenor Judea lalu dikirum ngagai menua nya. 13Iya diasuh munuh Judas, mambarka semua orang ke nitihka iya, lalu nuduhka Alkimus nyadi Imam Besai Rumah Sembiang ti pemadu tebilang di serata dunya. 14Semua orang bansa bukai di Judea ke udah ngerarika diri ari diserang Judas, diatu berebut setanah enggau Nikanor laban dalam runding sida pengerugi enggau penusah ti deka ninggang bansa Judah tau nguntungka sida.
15Orang Judah ninga pasal Nikanor setanah enggau orang bansa bukai benung mansang deka nyerang sida. Nya alai sida nabur diri enggau tanah, lalu besembiang ngagai Allah Taala ke udah milih bansa sida nyadi nembiak Iya ke selama-lama iya, lalu Iya meh ke nyengala nulung sida maya sida minta tulung. 16Ari jaku Judas ke nyadi tuai sida, sida berumban angkat deka betemu lalu beperang enggau munsuh semak siti genturung pendiau ti dikumbai Desau. 17Simon, menyadi Judas betempuh ngelaban Nikanor, tang iya nyurutka diri enda lama laban munsuh ngenyit nyerang. 18Ninga pemerani Judas enggau nembiak ngetanka menua diri, dia iya berunding deka ngaduka pekara nya enda ngena jalai perang. 19Nya alai, iya lalu ngirumka Posidonius, Teodotus enggau Matatias ngambika ngaga sempekat bebaik enggau orang Judah.
20Udah semua atur dalam sempekat nya disetujuka, tuai perang ari sepiak-sepiak madahka pekara nya ngagai semua raban soldadu diri empu, lalu semua sida nya bela setuju bebaik. 21Hari endur dua iku tuai perang nya betemu kediri lalu ditetapka. Seduai iya bela duduk ba kerusi kereta kuda kena bebasaka seduai. 22Tang Judas ngengkah sekeda orang bepegaika senyata bejaga lalu besedia belama ba sekeda endur ti manah nyangka munsuh ngenyit nipu lalu nyerang. Seduai dua iku nya, ke nyadi tuai, baum enggau mujur. 23Udah aum nya, Nikanor diau chukup lama di Jerusalem lalu nadai ditemu ngereja utai ti enda manah. Endah orang mayuh ke berebut deka setanah enggau iya diasuh iya pulai. 24Nikanor enggau Judas bebakih amat enggau pangan diri. 25Iya ngasuh Judas bebini lalu nirika rumah tangga. Judas nitihka jaku iya lalu ngasaika pengidup ti lantang senang.
Nikanor Bemunsuh Baru Enggau Judas
26Alkimus meda Nikanor bebakih amat enggau Judas. Nya alai, iya ngambi siti salin sempekat nya, lalu mansang betemu enggau Raja Demetrius. Iya bejaku enggau raja madahka Nikanor enda nitihka atur perintah laban nuduhka Judas ke munsuh perintah nganti iya nyadi gabenor. 27Semua utai ti bula ditusi Alkimus ngasuh raja ringat. Enggau ati ringat raja nulis ngagai Nikanor madahka diri enda puas ati enggau sempekat nya. Nikanor diasuh raja nangkap Judas Makabi lalu ngirum iya ke Antiokia enggau jampat.
28Pesan nya ngasuh Nikanor bingung. Iya enda sampai ati nginsil sempekat nya laban Judas nadai ngereja penyalah mimit. 29Ketegal Nikanor enda ulih ngelaban jaku raja, iya lalu ngiga peluang nangkap Judas ngena jalai tipu. 30Tang Judas meda Nikanor nyau belabuh enda manah enggau iya, lalu mega kasar ari selama enggau iya. Judas nemu nya tanda ti enda manah. Nya alai iya ngempuruka mayuh bala orang ke nitihka iya, lalu belalai ari Nikanor.
31Lebuh Nikanor nemu diri alah akal laban Judas, iya mansang ke Rumah Sembiang ti tebilang sereta kudus, benung bala imam nyuaka piring. Iya minta bala imam nyerahka Judas ngagai iya. 32Tang bala imam dia besumpah madahka diri enda nemu dini endur Judas. 33Nikanor ngangkatka jari kanan iya tunga ngagai Rumah Sembiang lalu bersumpah, “Enti kita enda nyerahka Judas baka siku orang ke ditangkap ngagai aku, Rumah Sembiang Allah Taala tu deka dirata aku bela enggau tanah, alta tu deka aku rubuh, lalu ba endur tu aku deka nirika siti rumah sembiang ti besai sereta manah ke petara Dionisius!” 34Udah nyebut nya, iya lalu pansutt. Bala imam lalu ngangkatka jari sida ke serega lalu besembiang ngagai Allah Taala ke selalu nyaga bansa kami. Baka tu sembiang sida, 35“O Tuhan, Nuan enda begunaka sebarang utai. Tang taja pia Nuan rindu meda Rumah Nuan diengkah ditu tanda nuan deka diau entang kami. 36Semina Nuan aja ke kudus, pun semua pengudus. Jaga meh Rumah Nuan ti udah dikuduska baru ngambika kudus selama-lama iya.”
Razis Parai Ketegal Menua Iya
37Nikanor dipadahka pasal siku orang ti tebilang di Jerusalem benama Razis ngambika Nikanor nawa iya. Razis nya orang ke sayauka bansa diri, lalu dipebasaka amat sampaika diberi juluk “Apai orang Judah.” 38Lebuh menua belabuh charut, iya enggau ati liat merantuka nyawa diri ketegal ngetanka pengarap Judah, lalu dichara ketegal penaluk iya. 39Nikanor deka mandangka ati iya ti begedika orang Judah. Nya alai, iya ngasuh lebih ari 500 iku soldadu nangkap Razis, 40laban iya ngira pengawa iya nya tau ngerugika orang Judah. 41Bala soldadu besedia deka ngerebut menara ti endur Razis maya nya. Sida mechahka pintu besai penama ngagai tengah laman, lalu diasuh nunu semua pintu menara nya. Lebuh Razis ensepi diri nadai jalai rari, iya mantap diri enggau pedang. 42Iya deka agi parai enggau basa ari ti parai dibunuh munsuh ti ngasuh malu. 43Tang laban iya kelalu berumban, dia telih nya enda tebunuhka iya.
Lebuh bala soldadu tama nengah pintu, Razis enggau ati berani niki ke atas dinding, lalu baka orang ke kering, iya terejun ngagai tugung orang mayuh dibaruh. 44Sida nyurutka diri enggau jampat, lalu iya terengkah ba endur ti nadai orang. 45Tang Razis agi idup, lalu enggau ati ti ransing iya angkat. Taja darah iya bepanchur ari abi telih iya ti balat amat, iya rari nengah tugung orang mayuh, lalu bediri atas batu ti renjan. 46Lebuh Razis nyau abis darah, iya mansutka isi perut diri enggau jari dua iti, lalu nikauka nya ngagai orang mayuh. Benung ngereja nya, iya besembiang ngambika Tuhan ke bekuasa atas semua utai idup, meri pengidup nya pulai baru ngagai iya jemah ila. Baka nya meh pemarai Razis.
Currently Selected:
2 Makabi 14: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia