Sailm 90
90
1’S tu b’ionad còmhnaidh dhuinn gach linn,
a Thighearna na glòir’;
2Cian mun do ghineadh fòs na cnuic,
’s na slèibhtean beag’ no mòr’.
Cian mun do dhealbh thu ’n talamh trom,
no ’n cruinne-cè led neart;
O bhith-bhuantachd gu bith-bhuantachd,
is tusa Dia gu beachd.
3Gu neoni tillear leatsa rìs
an duine truagh ga sgrios;
Is their thu fòs, O chlann nan daoin’,
grad-thillibh air ur n-ais.
4Oir mìle bliadhn’ ad shealladh fhèin,
mar an là-’n-dè a ta,
’N tràth thèid e seach: is amhlaidh fòs
mar fhorair oidhch’ ad làth’r.
5Dh’fhuadaich thu sìos iad mar le sruth,
mar chadal iad no suain:
Sa mhadainn bidh iad mar am feur
gu moch a dh’èireas suas.
6Air madainn brisidh e fo bhlàth,
is fàsaidh e gu h-àrd:
Ri àm an fheasgair gearrar e,
is seargaidh air an làr.
7Oir chaitheadh sinn led chorraich ghèir;
chlaoidh d’fhearg-sa sinn gu tur.
8Ar peacaidh dhiamhair, is ar lochd,
an sealladh d’aodainn chuir.
9Oir ann ad fheirg ar n-uile làith’
tha teireachdainn fa seach:
Is chaithear leinn ar bliadhnaidh fòs,
mar sgeul a dh’innseadh neach.
10’S iad làith’ ar bliadhna mar an ceudn’
trì-fichead bliadhn’ ’s a deich,
No, faodaidh bith, le tuilleadh neirt
ceithir-fichead bliadhn’ do neach:
Gidheadh chan eil nan spionnadh siud
ach cràdh is cùradh geur:
Oir sgathar sìos gu h-ealamh e,
is siùbhlaidh sinn gu lèir.
11Cò aig a bheil deagh thuigs’ is fios
air neart do chorraich fhèin?
Is amhlaidh fòs mar d’eagal mòr,
tha lasair d’fheirg’ da rèir.
12O teagaisg dhuinn, a Dhè nam feart,
mar àirmhear leinn ar làith’;
A-chum ar cridh’ a shocrachadh
air gliocas ceart gach tràth.
13O Thighearna Iehòbhah mhòir,
till fhèin a-rìs: cia fhad?
Mu thimcheall staid do sheirbhiseach
gabh aithreachas gu grad.
14O dèan ar sàsachadh gu moch
led thròcair chaoimh, a Dhè,
A-chum gum bi sinn aoibhneach ait,
ri fad ar là ’s ar rè.
15Dèan subhach sinn a rèir nan là
a chràidh thu sinn gu goirt:
A rèir nam bliadhna ud faraon
am faca sinn an t-olc.
16Taisbein dod sheirbhisich do ghnìomh,
faiceadh an clann do ghlòir.
17Is bitheadh mais’ ar Tighearn Dia
a’ dealradh oirnn gu mòr.
Na gnìomharan a rinn ar làmh,
socraich iad dhuinn, a Dhè:
Na gnìomharan a rinneadh leinn,
dèan daingeann iad gu lèir.
Currently Selected:
Sailm 90: SD1826
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Sailm Dhaibhidh 1826 (le litreachadh ùr 2000)
© Comann Bhìoball na h-Alba (Scottish Bible Society) 2000