2 KORINTIËRS 4
4
Die Goeie Nuus in kleipotte
1Daarom dan, terwyl ons deur God se genade#4:1, 15 Of onverdiende goedheid. hierdie bediening ontvang het, gooi ons nooit die handdoek in nie. 2Maar ons het afstand gedoen van die geheime dinge wat ’n mens skaam maak. Ons leefstyl is nie dié van misleiding of om die woord van God te verdraai nie. Inteendeel, met die bekendmaking van die waarheid, beveel ons onsself aan by elkeen wat ’n eerlike gewete voor God het. 3As ons Goeie Nuus#4:3, 4 Of evangelie. nog versluier is, is dit net bedek vir dié wat verlore gaan. 4Dit is die god van hierdie bedeling wat die gedagtes van die ongelowiges verblind sodat hulle die lig van die Goeie Nuus#4:3, 4 Of evangelie. nie kan sien nie. Dit is die Goeie Nuus van die heerlikheid van Christus, Hy wat die ewebeeld van God is.
5Ons verkondig nie onsself nie, maar Jesus Christus as die Here, en onsself as julle diensknegte ter wille van Jesus. 6God het gesê: “Laat daar lig skyn uit die duisternis.”#4:6 Vgl Gen 1:3; Ps 112:4. So het Hy ook in ons harte ’n lig laat skyn om ons te verlig met die kennis van die heerlikheid van God wat uit die gesig van Jesus Christus straal.
7Ons het hierdie skat egter maar net in breekbare kleipotte#4:7 Grondteks in kleipotte; dit is moontlik dat Paulus hier nie op die breekbaarheid van kleipotte sinspeel nie, maar juis op die duursaamheid van die Korintiese kruike. – die allesoortreffende krag kom van God en nie van ons nie.
8Op elke manier word ons
onder druk geplaas,
maar ons is nie verpletter nie;
ons is verward,
maar nie wanhopig nie;
9ons word vervolg,
maar nie in die steek gelaat nie;
platgeslaan,
maar nie vernietig nie.
10Ons dra altyd die sterwe van Jesus in ons liggaam saam sodat ook die lewe van Jesus sigbaar kan word in ons liggaam.
11Gedurig word ons wat nog lewe, ter wille van Jesus aan die dood uitgelewer sodat die lewe van Jesus ook in ons sterflike liggaam sigbaar kan word. 12Gevolglik is die dood in ons aan die werk, maar in julle die lewe.
13Omdat ons dieselfde geloofsgesindheid het as waarvan daar geskryf staan: “Ek het geglo; daarom het ek gepraat,”#4:13 Ps 116:10. glo ons steeds en daarom hou ons ook aan met preek.
14Ons weet dat Hy wat die Here Jesus opgewek het, ons ook saam met Jesus sal opwek om ons saam met julle voor Hom te stel.
15Ons doen dit alles ter wille van julle sodat die genade#4:1, 15 Of onverdiende goedheid. van God, soos dit oor meer en meer mense spoel, ook die dankbetuiging al hoe meer kan laat word, en God se heerlikheid so erken kan word.
16Om hierdie rede gee ons nie moed op nie. Al is ons uiterlike mens besig om te vergaan, innerlik word ons van dag tot dag vernuwe.
17Ons swaarkry op die oomblik is gering en tydelik, maar dit bewerk vir ons ’n heerlikheid wat alles verreweg oortref en vir altyd vas sal staan.
18Ons oog is nie op die sigbare dinge gerig nie, maar op die onsigbare, want die sigbare dinge is tydelik, maar die onsigbare vir altyd.
Currently Selected:
2 KORINTIËRS 4: NLV
Highlight
Share
Copy
Want to have your highlights saved across all your devices? Sign up or sign in
2006 Christlike Uitgewersmaatskappy, Posbus 1599, Vereeniging, 1930, Eerste uitgawe 2006, Tweede uitgawe 2011