Yowann 10
10
Parabolenn an Gorlann
1‘Yn hwir, yn hwir y lavarav dhywgh, neb na dheu a-ji dhe gorlann an deves der an daras mes neb a yskynn war neb fordh arall, henn yw lader ha robbyer. 2Mes neb a dheu a-ji der an daras yw bugel an deves. 3Dhodho an porther a iger, ha'n deves a glew y lev, hag ev a elow y dheves y honan orth hanow ha'ga ledya yn-mes. 4Ha pan worr ev y dheves y honan yn-mes, ev a gerdh a-dheragdha, ha'n deves a'n siw, rag i dhe aswonn y lev. 5Ny vynnons siwya estren, mes fia a wrons dhiworto, rag ny aswonnons lev estrenyon.’ 6Yesu a gewsis dhedha an barabolenn ma, mes ny gonvedhsons an pyth a leveri dhedha.
Yesu an Bugel Da
7Ena Yesu a leveris arta,#10:7 arta: War-lergh re a'n dornskrifow dhedha arta. ‘Yn hwir, yn hwir y lavarav dhywgh, my yw daras an deves. 8An re oll a dheuth kyns yw ladron ha robbyoryon, mes ny wrug an deves goslowes orta. 9My yw an daras; piwpynag a dheffo a-ji dredhov vy, ev a vydh selwys, ha dos a-ji ha mos yn-mes a wra, ha kavoes peurva. 10Ny dheu lader saw dhe ladra, ha ladha, ha distrui; my yw devedhys rag may fo dhedha bewnans, ha may fo dhedha palster anodho.
11‘My yw an bugel da. An bugel da a dhaskorr y vewnans rag y dheves. 12Mes an goberwas, neb nag yw an bugel, ha ma nag yw an deves dhodho y honan, ev a wel an bleydh ow tos hag ev a as an deves ha fia, ha'n bleydh a wra aga hachya ha'ga skattra. 13Henn yw rag ev dhe vos goberwas,#10:13 Henn yw rag ev dhe vos goberwas: War-lergh re a'n dornskrifow Mes fia a wra an goberwas, rag ev dhe vos goberwas. ha ny vern dhodho travyth a-dro dhe'n deves. 14My yw an bugel da, ha my a aswonn ow deves ow honan, ha'm re ow honan a'm aswonn vy.#10:14 ha'm re ow honan a'm aswonn vy: War-lergh re a'n dornskrifow hag aswonnys ov gans ow re ow honan. 15Kepar dell wra an Tas ow aswonn, my ynwedh a aswonn an Tas, ha my a dhaskorr ow bewnans rag an deves. 16Hag yma dhymm deves erell, nag yns a'n gorlann ma; res yw dhymm aga dri ynwedh, hag i a glew ow lev; hag y fydh unn flokk, unn bugel. 17Rag hemma, an Tas a'm kar, rag my a dhaskorr ow bewnans, rag may hwrylliv y gemmeres arta. 18Denvyth ny wra y gemmeres dhiworthiv, mes my a'n daskorr a'm bodh ow honan. Yma dhymm galloes dh'y dhaskorr, hag yma dhymm galloes dh'y gemmeres arta; my re dhegemmeras an arghadow ma dhiworth ow Thas.’
19Ena yth esa fols arta yn mysk an Yedhewon drefenn an geryow ma. 20Lies a leveris, ‘Yma dyowl dhodho, ha varyes yw; prag y hwoslewowgh orto?’ 21Yn-medh re erell, ‘Nyns yw an re ma an geryow a dhen ha dhodho dyowl. A yll dyowl igeri dewlagas an dhellyon?’
Yesu Skonys gans an Yedhewon
22Ena y feu goel an Sakrans yn Yerusalem; gwav o hi. 23Hag yth esa Yesu ow kerdhes y'n tempel, yn portal Solomon. 24Ena an Yedhewon a dheuth a-dro dhodho ha leverel dhodho, ‘Pes termyn y'gan synsydh yn fienasow? Mars osta an Krist, lavar dhyn yn apert.’ 25Yesu a worthybis dhedha, ‘My a leveris dhywgh, ha ny wrussowgh hwi krysi. An oberow a wrav yn hanow ow Thas, i a dheg dustuni ahanav; 26mes ny grysowgh hwi, rag nyns owgh hwi a'm deves vy.#10:26 a'm deves vy: War-lergh re a'n dornskrifow a'm deves vy, dell leveris dhywgh. 27Ow deves a glew ow lev, ha my a's aswonn, hag i a'm siw. 28Ha my a re dhedha bewnans heb diwedh, ha ny wrons i mos dhe goll bynitha, ha denvyth ny wra aga hemmeres yn-mes a'm dorn. 29Brassa ages pup-tra yw ow Thas, neb a's ros dhymm, ha ny yll denvyth aga hemmeres yn-mes a leuv an Tas.#10:29 an Tas: War-lergh re a'n dornskrifow ow Thas vy. 30My ha'm Tas yw onan.’
31Ytho an Yedhewon a gemmeras meyn yn-bann arta, rag may hwrellens y labydha. 32Yesu a worthybis dhedha, ‘My re dhiskwedhas dhywgh lies ober da dhiworth an Tas; rag py ober anedha y fynnowgh ow labydha?’ 33An Yedhewon a worthybis dhodho, ‘Ny wren dha labydha rag ober da, mes rag blasfemi, ha rag ty, ow pos den, dhe omwul Duw.’ 34Yesu a worthybis dhedha, ‘A nyns yw skrifys yn agas lagha, My a leveris, Hwi yw duwow? 35Mar kwrug ev aga henwel duwow may teuth ger Duw dhedha (ha ny yll an skryptor bos terrys), 36a yllowgh leverel anodho ev neb a wrug an Tas y sakra ha'y dhannvon y'n bys, “Ty a lever blasfemi”, rag my dhe leverel, “Mab Duw ov vy”? 37Mar ny wrav oberow ow Thas, na grysewgh ynnov. 38Mes mar kwrav, kyn na wrewgh krysi dhymm, krysewgh an oberow, rag may hwryllowgh godhvos ha krysi an Tas dhe vos ynnov vy, ha my y'n Tas.’ 39Ytho i a hwilas arta y dhalghenna, mes ev a skapyas a'ga dorn.
40Hag ev eth dhe-ves arta dhe'n tu arall dhe'n Yordan, dhe'n tyller mayth esa Yowann ow pesydhya y'n dalleth, hag a wortas ena. 41Ha lies a dheuth dhodho, hag i a leveris, ‘Ny wrug Yowann tokyn vyth, mes pup-tra a leveris Yowann a-dro dhe'n den ma o gwir.’ 42Ha lies a grysis ynno y'n tyller na.
Currently Selected:
Yowann 10: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023