Yowann 9
9
Yaghhe Den Genys Dall
1Hag ev ow tremena, ev a welas den dall a'y enesigeth. 2Ha'y dhyskyblon a wovynnas orto ow leverel, ‘Mester, piw a beghas, an den ma, po y gerens, may feu genys dall?’ 3Yesu a worthybis, ‘Ny beghas naneyl an den ma na'y gerens, mes may fe diskwedhys ynno oberow Duw. 4Ni#9:4 Ni: War-lergh re a'n dornskrifow My. a res gul an oberow anodho ev neb a'm dannvonas hedre vo dydh; nos a dheu pan na yll denvyth oberi. 5Hedre viv y'n bys, golow an bys ov vy.’ 6Wosa leverel hemma, ev a drewas war an dor ha gul pri gans an trew, hag ura an pri war y dhewlagas#9:6 war y dhewlagas: War-lergh re a'n dornskrifow war dewlagas an den dall. 7ha leverel dhodho, ‘Ke, omwolgh yn poll Siloam’ (hemm yw dhe styrya, Dannvenys). Ytho ev eth hag omwolghi, hag ev a dhehwelis ow kweles. 8Y gentrevogyon ha'n re a'n gwelsa kyns ow peggya#9:8 ow peggya: War-lergh re a'n dornskrifow ow pos dall. a leveris, ‘A nyns yw hemma an den o esedhys ow peggya?’ 9Re a leveris, ‘Hemm yw ev’, mes re erell a leveris, ‘Haval#9:9 Haval: War-lergh re a'n dornskrifow Nag yw, mes haval yw dhodho’; mes ev y honan a leveris, ‘My yw.’ 10Ena i a leveris dhodho, ‘Ytho fatell veu dha dhewlagas igerys?’ 11Ev a worthybis, ‘An den#9:11 An den: War-lergh re a'n dornskrifow Den. henwys Yesu a wrug pri, hag ura ow dewlagas, ha leverel dhymm, “Ke dhe Siloam#9:11 Siloam: War-lergh re a'n dornskrifow an poll Siloam. hag omwolgh”; ha my eth hag omwolghi, ha gweles arta.’ 12Hag i a leveris dhodho, ‘Ple'ma ev?’ Yn-medh ev, ‘Ny wonn.’
An Fariseow a Hwither an Yaghheans
13I a dhros dhe'n Fariseow an den neb o dall kyns. 14Mes dydh sabot o pan wrug Yesu an pri hag igeri y dhewlagas. 15Ytho an Fariseow a wovynnas orto arta ynwedh fatell dhaskavas y wolok. Ev a leveris dhedha, ‘Ev a worras pri war ow dewlagas, ha my a omwolghas, ha my a wel.’ 16Ytho re a'n Fariseow a leveris, ‘Nyns yw an den ma a Dhuw, rag ny with an sabot.’ Yn-medh re erell, ‘Fatell yll den yw peghador gul toknys a'n par ma?’ Hag yth esa fols yntredha. 17Arta y lavarsons dhe'n den dall, ‘Pandr'a leverydh dha honan anodho, rag ev dhe igeri dha dhewlagas?’ Yn-medh ev, ‘Profoes yw.’
18Mes ny grysis an Yedhewon a-dro dhodho, y fia dall ha daskavoes y wolok, bys pan alwsons kerens an den a dhaskavas y wolok. 19Hag i a wovynnas orta ow leverel, ‘Yw hemma agas mab, neb dell leverowgh a veu genys dall? Fatell yll ev ytho gweles lemmyn?’ 20Y gerens a worthybis dhedha ha leverel, ‘Ni a woer hemma dhe vos agan mab, hag ev dhe vos genys dall; 21mes ny wodhon fatell wel lemmyn, na piw a igoras y dhewlagas; govynnewgh orto, tevesik yw; ev a yll gewsel anodho y honan.’ 22Y gerens a leveris hemma rag bos own dhedha a'n Yedhewon; rag an Yedhewon a wrussa ervira war-barth seulabrys, piwpynag a gonfessa ev dhe vos Krist dhe vos emskemunys a'n synaga. 23Rakhenna y gerens a leveris, ‘Ev yw tevesik, govynnewgh orto ev.’
24Ena i a elwis nessa gweyth an den o dall ha leverel dhodho, ‘Ro dhe Dhuw an gordhyans; ni a woer an den ma dhe vos peghador.’ 25Ev a worthybis, ‘Mars yw peghador ny wonn; unn dra a wonn: dall en, lemmyn my a wel.’ 26Ytho i a leveris dhodho arta, ‘Pandr'a wrug dhis? Fatell igoras dha dhewlagas?’ 27Ev a worthybis dhedha, ‘My re gewsis dhywgh seulabrys, ha ny woslewsowgh; prag y fynnowgh klewes arta? A vynnowgh hwi ynwedh bos y dhyskyblon?’ 28I a'n skornyas ha leverel, ‘Ty yw y dhyskybel, mes ni yw dyskyblon a Moyses. 29Ni a woer, Duw dhe gewsel dhe Moyses, mes an den ma, ny wodhon a-ble teuth.’ 30An den a worthybis ha leverel dhedha, ‘Yma tra varthys yn hemma, na wodhowgh a by le'ma; mes ev a igoras ow dewlagas. 31Ni a woer na glew Duw peghadoryon, mes mars yw den gordhyer a Dhuw, hag ow kul y volonjedh, ev a wra y glewes. 32A dhalleth an bys, ny veu klewys denvyth dhe igeri dewlagas den neb a veu genys dall. 33Mar ny ve an den ma a Dhuw, ny allsa gul travyth.’ 34I a worthybis ha leverel dhodho, ‘Ty a veu genys oll yn tien yn peghosow, ha ty a vynn dyski dhyn?’ Hag i a'n tewlis yn-mes.
Dellni Spyrysel
35Yesu a glewas i dh'y dewlel yn-mes, ha pan y'n kavas, yn-medh ev, ‘A grysydh yn Mab an den?’ 36Ev a worthybis ha leverel, ‘Ha piw yw ev, Arloedh, may kryssiv ynno?’ 37Yn-medh Yesu dhodho, ‘Ty re'n gwelas, hag ev yw neb a gews genes.’ 38Yn-medh ev, ‘Arloedh, my a grys.’ Hag ev a'n wordhyas. 39Ha Yesu a leveris, ‘Dhe vreus yth ov vy devedhys y'n bys ma, rag may hwello kemmys na yll gweles, ha may fo dall kemmys a yll gweles.’ 40Ha re a'n Fariseow neb esa ganso a glewas hemma, ha leverel dhodho, ‘On ni ynwedh dall?’ 41Yesu a leveris dhedha, ‘Mar pewgh dall, ny via dhywgh pegh; mes lemmyn hwi a lever, “Ni a wel”, ytho agas pegh a bes.’
Currently Selected:
Yowann 9: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023