Sawal la giled’a 59
59
David mi tchen Alona ala mi prud’um mbeyo
1Ni sawal la gile d’a David mi hlat mi hat mi ma ngolâ hi suma hle sawalina. Mi hlat ni kid’a Saul mi sunï azigarâ avo hatam á tchumba.
2Alo mana, ang prud’un ndei
abo suma a nga halan huneîd’ina,
ang ngomon abo man suma djangûna mi.
3Ang prud’un ndei abo suma bei d’ingêrâ,
ang sud’un ndei abo suma tchi suma mi.
4Ma didina, gola! Azi ngei nga tazi kä gumun kanu,
suma ad’engâ a ndjak nga vunazi kan
á tchan ndei bei an tchila
bei an le vama tcho ba mi.
5An le nga vama tcho d’i,
wani azi nga ringâ, a nga min tazi kanu.
Ang tchol akulo, ang mbeï d’ugulonu, ang gola!
6Ma didina, Alo ma ad’engêng kal petna,
Alona hi Israel-lîna,
ang tchol akulo, ang mbeï dur andjaf sum ndazina pet,
ang we hohowa suma asa’at suma mbut ir ndazina d’i.
Tchol ndjö
7Azi hulongî fladege,
a nga siwel d’igi adureina na,
a nga ngui huyok azì ma ngolâ.
8Gola! Zla d’a tchod’a nga d’i buzuk kei avunaziya,
vunazi ni d’igi mbigeu d’a fiyak ka te heîd’a na,
a nga dala: Ni nge ba, mba mi hum ge?
9Wani ang Ma didina, ang nga san ad’uziya,
ang nga las andjaf suma pet.
10Alona, ang nad’eng manda,
an tin iran ni kang angû,
kayam angî yi man ma ngeid’a.
11Alo man ma od’a nga mi djï avoronu,
mi tagan suma a nga kud’uguna.
12Ang tchazi tala sum mana a mar
yam kus sa ang kus kazid’a d’a d’i,
ang ndjoyôzi woi kad’eng manga,
ang hulongôzi yazi kä.
Salad’a, angî mbarei mamid’a.
13Zla d’a ndavunazid’a ni tchod’a;
ar azi puk kä yam yam mba ad’eng mazid’a,
yam vun ma ge ma azi nga gum
mi suma ki zla mazi d’a kad’ina mi.
14Ang dabazi woi kayî mangâ,
ang dabazi woyo, ang ar sa tu d’i;
ar azi wala angî Alo ma nga mi te yam Israel-lâ
gak dabid’a handagad’ina na mi.
Tchol ndjö
15Azi hulongî fladege,
a nga siwel d’igi adureina na,
a nga ngui huyok azì ma ngolâ.
16Azi nga tcha tata á hal tena.
Le a hop nga d’uo ni, azi fo yina ni ki oîd’a.
17Wani an mba ni hle sawala yam ad’eng manga;
gagazi, yorogo an mba ni de woi yam o mang nga didinda,
kayam angî gulumun man ma ngeid’a,
angî yi man ma ngeid’a kur bur ma ndaka mi.
18Ang Alona nad’eng manda, an nga ni gilengû,
kayam angî gulumun man ma ngeid’a,
angî ma djivina mi.
Zur Zeit ausgewählt:
Sawal la giled’a 59: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.