Sawal la giled’a 58
58
Alo ma ka sariyad’a yam sumina nga
1Ni sawal la gile d’a David mi hlat mi hat mi ma ngolâ hi suma hle sawalina.
2Na ni gagazid’a yat ngei kä zu?
Agi suma nglona, agi nga dagi gagazid’a woi zu?
Agi nga kagi sariyad’a yam suma ata yat tchu?
3Hawa yak! Ni kur min magid’a ba, agi nga lagi tchod’a,
agi nga lagi tcho d’a tchi matna kur ambasa mi.
4Suma asa’atna a wal lei ki gagazid’a
ni kur vut mazid’a dei;
suma ka zlad’a a d’es sei kur lovot ta djivid’a
nata yima a buzugï woi kur asuyozina dei.
5Ayî mazina ni d’igi ayî mageid’a na,
ayî mazina ni d’igi ayî gugui ma nga mi duk humam
6á hum vun salam ma mbut ma nga mi lü ki sed’ema d’uo na na mi.
Le ni sama mbut ma kal ndromina pî, nga mi humum mbuo mi.
7Alo mana, ang kuzuzi siyazi woi avunaziya.
Ma didina, ang kus aging azlo máma woyo.
8Ar azi vit tei d’igi mbina mi sid’am kä na,
ar ahle mazi suma sïna a silagat tei mi.
9Ar azi lau woi d’igi dubangâ na,
ar azi wafata d’uo d’igi hur ma nded’a na mi.
10Avok ka azi bei wala ang mba gad’aziya d’a,
ang fozi woi d’igi sana mi fo butna woi na.
11Wani sama d’ingêrâ mba mi hel sanda
kur bur ma ang mba hlatchugulina,
mba mi tit aduk buzuna hi suma asa’atnina.
12Suma pet a mba dala: Gagazi, wuraka nga yam sama d’ingêrâ!
Gagazi, Alo ma ka sariyad’a yam suma yam andagad’ina, mi nga!
Zur Zeit ausgewählt:
Sawal la giled’a 58: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.