संत.जोहन 15

ईसु सचे अंगुर लरंग

1“सचे अंगुर लरंग दुबा ईङ हेके, आउर बाबातिङ किसान हेके। 2जे लरंग ईङ रे एदनाआ आउर का जोयोआ, होना के हुनी मागेआय, आउर जे जोयोआ होना के हुनी बगरा जोयोअ लःअय कलामेआय जेकर से आउर जोयोअ। 3ईङ आपे के सिकछा एमा तदपेईंग हिना चलते पहिल गी सुध एदान पेआ। 4आपे ईङ रे बनाल ताहिनपे आउर ईङ आपे रे, जे लकान लरंग जदि अंगुर दुबा रे का बनाल ताहिनोआ, दो अपन-हारते एरे जोयोआ, हिना लकान जदि आपे होः ईङ रे बनाल एरपे ताहिनोआ रेदो एरपे जो-दड़ीआ। 5ईङ अंगुर दुबा हेके, आउर आपे लरंग हेके, जे ईङ रे बनाल ताहिनोआय, आउर ईङ जे रे ताहिनुईंग होना ढेर जोयोआ, एतान लःअय ची ईङ लोः आलगे केते, आपे एतान होः ए-एतान एरपे दड़ीआ। 6जदि जाहें ईङ रे बनाल काय ताहीनोआँ दो, होना के रोहोड़ लरंग लकान गिड़ी-गुल तअकु। आउर रोहोड़ जुनोआ हिमीन रे होड़कु नोकान लरंग के जवारेआकु आउर सेंगेल रे लो गुलताअकु। 7जदि आपे ईङ रे बनाल ताहिनोआपे, आउर ईङ आला बचन आपे रे बनाल ताहिनोअ रेदो, जे चाही कोयपे आउर होना आपे लःअय हुयाव कोआ। 8बाबातिङ आला महिमा आपे ढेर जोअ आगुयपे, निआँ रे हुयाव कोआ, तब आपे ईङ आलकु चेला पाड़ी कोआपे। 9जे लकान आपा ईङ के दुलार लिङाय हिना लकान ईङ होः आपे के दुलार लेपेईंग। आपे ईङ आला दुलार रे बनाल ताहिनपे। 10जदि आपे ईङ आला हुकूम के मनाआपे दो, ईङ आला दुलार रे बनाल ताहिकोआपे, जे लकान ची ईङ अपन आपा आला हुकूम के मनाव निनिंग, आउर हुनी आला दुलार रे बनाल ताही नुईंग। 11नोःआँ बात आपे के नोःआँ लःअय कंहड़ी लाईङ, ची ईङ आला खुसी आपे रे बनाल ताहिनोअ, आउर आपे आला खुसी पुराव जुनोः।

12 # सं.जोह 13:34; 15:17; 1 जोह 3:23; 2 जोह 1:5 “ईङ आला हुकूम नोःआँ हेके ची, जे लकान ईङ आपे के दुलार लेपेईंग, हिना लकान आपे होः दुलार उपड़ीङोःपे। 13नोःआँ तरअः बड़े पेरेम ओके आला होः कनोआँ, ची जाहें अपन गाती लःअय अपन जीव एमा गुल ताय। 14जदि आपे ईङ आला हुकूम के मनाआपे दो, आपे ईङ आलकु गाती हेके। 15नहाअः तरअः ईङ आपे के बंधाउवा एरिङ कंहड़ीआ, एता लःअय ची हुनी आली गोमके ए-एतान वाला एदानिया सेके बंधाउवा काय पाड़ीआ, ईङ आपे के गाती बेता ताडपेईङ, एता लःअय ची ईङ जे बात बाबा तरअः आयुम तदिङ होना जामा उदूः ताडपेईङ। 16आपे ईङ के कापे निबाड़ तदिङा, बकिर ईङ आपे के नोःआँ लःअय निबाड़ ताडपेईङ आउर दोहो ताडपेईङ, ची आपे सेन केते ढेर जोअ आगुयपे, आउर आपे आला जोअ बनाल ताहिनोअ, ची आपे ईङ आला नुमू रे बाबा तरअः जहान होः कोयापे, होना बाबा आपे के हिना एमा केपेआय। 17नोःआँ बात रेनअः हुकूम ईङ आपे के नोःआँ लःअय एमाअ दिपीईङ, ची आपे हुनी-नुई कु तरअः दुलार दोहोयपे।

दुनिया रअः बैर

18“जदि दुनिया आपे लोः बैर दोहोयाकु, दो उयहारेपे ची आपे तरअः पहिल हुंकू ईङ तरअः बैर लअकु। 19जदि आपे दुनिया रेनपे ताहिकोआपे रेदो, दुनिया आपे के अपन समझाव केते दुलार ताकेपेआकु, बकिर आपे दुनिया रेनपे नलागे एता लःअय ची ईङ आपे के दुनिया तरअः निबाड़ तदपेईङ। हिना लःअय दुनिया आपे लोः बैरेआकु। 20#सं.मत्‍ती 10:24; सं.लुका 6:40; सं.जोह 13:16ईङ जे सिकछा आपे के एमा तदपेईङ होना के लुतूर रे दोहो तापे। बंधाउवा अपन गोमके तरअः काकु बड़ेयोआ, जदि हुंकू ईङ के सताव लिङाकु दो आपे के होः सताव केपेआकु। जदि हुंकू ईङ आला बात के मनाव नेनाकु दो आपे आला के होः मनाव कोआकु। 21हुंकू नोःआँ जामा ईङ आला नुमू रअः चलते आपे लोः ईया केआकु, एता लःअय ची जे ईङ के कुलगोःड तदिङाय हुनी के हुंकू काकु पड़ीआ। 22जदि ईङ आलुईंग हीःग ताहिकोआ, आउर हुंकू लोः एरिङ बात ताकेआ, दो हुंकू पापी एरकु ठहराव ताहिकोआ, नहाअः हुंकू के हुंकू आला पाप लःअय एतान बहना होः एरे चलाआ। 23जे ईङ लोः बैर दोहोयाय, हुनी बाबातिङ लोः होः बैर दोहोयाय। 24जदि हुंकू रे होना काम एरिङ ताकेआ जे आउर जाहें काकु लअः, दो हुंकू पापी एरकु ठहराव ताहिकोआ, बकिर नहाअः दो ईङ आला काम के नेल लअकु सेरे होः आलिंग लोः बैर लअकु। 25#सिरिंग 35:19; 69:4नोःआँ निआँ लःअय हुयाव नेना ची होना वचन पुरायोअ जे हुंकू आला कनहुन रे लिखा लअः एदनाआ हुंकू ईङ लोः झुठो रेनअः बैर दोहो लअकु। 26जब हुनी मा-मदाईती हिजोआय जेके आपे दुबाःड़े बाबा पखा तरअः कुलगोःडियीङ, माने कि सचाई रेनअः आतमा जे बाबा पखा तरअः हीःग कोआ दो हुनी ईङ रअः बारे रे गोवाही एम केआय। 27आउर आपे होः ईङ आला गोवाह एदान पेआ, एता लःअय ची आपे सुरू तरअः ईङ लोः ताही तनापे।

Zur Zeit ausgewählt:

संत.जोहन 15: ASR

Markierung

Kopieren

Vergleichen