Dadunu 6
6
Parenta ma lamo'o i'a
1'A Musa dadunu 'o kanau moju toma ngowa'a Israel ma betongo so'o ne:<<Nena-ne parenta rimoi: gena-ge huku-hukumu re 'atoranga-'atoranga, Ma JOU 'o soma'a ngoi ta sidoto'o ra ngini. Unanga gena-ge, Ma Jou'ongu Madutu ga'a ngini ni silamo'o re siḏubuso. Ngini balasu ni siḏagi parenta gena-ge toma daeraha ga'a ti'ara riwara ngini na osama re ḏegoro. 2Na'o taninga 'ahu ma giḏanga ma dara, ngini re ninga ju'uda tala gena-ge 'aḏi mete'e huku-hukumu re 'atoranga-'atoranga mo-moini gena-ge ga'a ngoi ta singadolo, ḏua ngini ni sijumu mode-mode'e ni silamo'o re mojongo Ma JOU Ma Jou'ongu Madutu ga'a ngini silamo'o re siḏubuso re ngini ḏuanga ni tegoro ti'ara toma nagara gena-ge. 3Sababu gena-ge, ngowa'a Israel na 'isene la-la, re ni siḏagi gena-ge tau-taunu, la ngini ni 'ahu la-la re dadi bangsa lamo'o madutu toma tana'a lai rousu ga'a ri romanga reo haiwani piara re tana'a ma hasili lai repe. Daeraha gena-ge ga'a Ma JOU Ma Jou'ongu Madutu ga'a ninga ngimo-ngimono 'aḏi silamo'o re siḏubuso, Unanga Ro 'a'a jaji ra ananga.>>
4<<Hei ngowa'a Israel na 'isene la-la! Ma JOU, pa'i Ma JOU ḇato Ma Jou'ongu Madutu ga'a ngene wo silamo'o re siḏubuso.#6:4 1) Ma JOU, Ma Jou'ongu Madutu ga'a ngene wo silamo'o re siḏubuso, Ma JOU gena-ge pa'i matengo ḇato, bolo 2) Ma JOU, Ma Jou'ongu Madutu ga'a ngene wo silamo'o re siḏubuso 5Ma JOU Ma Jou'ongu Madutu, ga'a ngini ni silamo'o re siḏubuso, Unanga gena-ge ngini Nu dadalara reninga 'akala re sinyingara mo-moini, reninga fikirana mo-moini, reninga de-de'e mo-moini.#Mat. 22:37; Mrk. 12:30; Luk. 10:27 6Re ngini ni 'elingi demo-demo gena-ge taninga 'akala re sinyingara ma dara ga'a Ngoi ta singadolo ra ngini wangere nange-ne. 7Sidoto'o demo-demo gena-ge taninga ngowa-ngowa'a tau-taunu. Ngini balasu na sijarita ra ananga gena-ge wakutu tegoro toma wala ma dara bolo ni sisoi'i tala wala re ni tagi rou, toma 'orasa mau otu bolo wakutu ni momi'i ḏua. 8Sipiri'u huku-hukumu gena-ge taninga giama re sipiri'u ḏi'i taninga memese#6:8 Hukumu gena-ge 'i silefo re siosama toma ngi'i ceka'a 'i si'a'a toma haiwani ma eno'o kara sipiri'u toma giama ma bete'olo re sipiri'u ḏi'i toma memese. sa'olo nana'o la na 'elingi tau-taunu. 9Silefo huku-hukumu re singosama toma ngi'i ma ceka'a kara enanga gena-ge sipata toma wala ma ngalana ma ngasu'u ma kuwiḏa re toma ngalana lamo'o taninga limau.>>
Si'elingi toma ga'a ma rapu
10<<Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'O jaji ḏua rema sasi taninga ngimo-ngimono: Abraham, Ishak re Yakub mangale Unanga ḏuanga i'a 'O pula'a nagara gena-ge di'a ngini. Re toma nagara gena-ge 'age limau-limau lamo'o re kama kuranga 'oru ua, ga'a ngini na side'oso ua; 11wala-wala 'i romanga reo 'ori i'a rana ma la-la, ga'a ngini na singosama ua, re sumu-sumu ga'a ngini na paiti ua, re guḏa-guḏa 'anggur re ate zaitun, ga'a ngini ni soana ua. Re wakutu ngini ni oromo ngini ḏuanga i'a ni basono ḏugala, 12totoho la-la ino la awa ni sidaioranga Ma JOU ga'a Ro sigasa ngini supu toma Mesir, ngi'i gena-ge ngini ni dadi budaka. 13Ngini balasu ni silamo'o re mojongo Ma JOU, Ma Jou'ongu Madutu ga'a ngini ni silamo'o re siḏubuso. Unanga gena-ge ngini nu siḏagi 'Ai mau, re na'o ngini ni 'a'a jaji pa'i ni masisasi reo Ma JOU 'ai lomanga ḇato.#Dad. 10:20 14Awa ni silamo'o re siḏubuso jou'ongu ma somoara ga'a bangsa-bangsa ga'a tegoro se-sebanga ngini, ananga gena-ge 'aḏi silamo'o re siḏubuso. 15Sababu Ma Jou'ongu Madutu ga'a ngini silamo'o re siḏubuso 'age taninga sigolona, Unanga gena-ge 'O oḏu'u site-tero Unanga reo 'oru ḇato. Na'o ngini ni silamo'o re siḏubuso jou'ongu ma somoara, Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'Ai duruta ga'a ma tero sa'olo u'u, enanga ḏuanga i'a 'i leja-lejanga ra ngini singadolo Unanga 'o singi-ngiranga ngini mo-moini.>>
16<<Awa ni tai'i Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, di'a golo'o Unanga gena-ge 'o 'a'a 'ori i'a hera-heranga sa'olo bukti Unanga 'o kalesanga ngini ma tero ga'a ngini ni si'a'a toma Masa.#Sup. 17:1-7 17Ngini balasu ni mete'e tau-taunu parenta-parenta, re 'Ai 'atoranga-'atoranga re huku-hukumu mo-moini ga'a Ma JOU Ma Jou'ongu Madutu ga'a ngini silamo'o re siḏubuso ga'a Unanga gena-ge 'a pula'a ra ngini. 18Re ngini ni si'a'a 'ori ga'a banari re la-la ra Ma JOU 'ai momina, la ngini ḏuanga i'a ni 'ahu la-la kama kuranga ua re ni osama re ḏegoro toma tana'a ma rousu ga'a Ma JOU Ro 'a'a jaji rema sasi taninga ngimo-ngimono mangale Unanga 'o pula'a gena-ge ra ngini. 19So'o gena-ge 'i dadi sababu Ma JOU ḏuanga i'a 'O dusu'u ninga lawana mo-moini ma tero sa'olo Unanga 'o jaji ḏua.>>
20<<Ḏuanga i'a toma 'orasa ma biono, na'o ninga ngowa-ngowa'a nau'u 'aḏi sano ra ngini, <I'a sa'olo Ma JOU Ma Jou'ongu Madutu ga'a ngene silamo'o re siḏubuso, Unanga gena-ge 'o soma'a ngene wo mete'e parenta-parenta, re 'Ai huku-hukumu parenta re 'atoranga-'atoranga mo-moini gena-ge?> 21Ngini ḏuanga i'a balasu ni sangoro so'o ne: <Ma siḏa ngene wo dadi 'olana Mesir 'ai budaka toma Mesir. Ḏua Ma JOU 'o gasa ngene sisupu Rai kuasa lamo'o. 22Ngene nanga ngimo-ngimono, ananga masiretene 'aḏi oḏi'i Ma JOU 'O 'a'a didina'o heranga re ga'a 'i hera-heranga ga'a si'a'a toma ngowa'a Mesir, manga 'olana re 'ai ngowa'a la-lamo'o ga'a munara tai kadato, ananga mo-moini 'aḏi dadi mojongo singadolo terewete. 23Re Unanga 'o gasa ngimo-ngimono gena-ge sisupu toma Mesir di'a sigasa ngene toma nagara nena-ne ga'a Unanga 'A pula'a ra ngene ma tero ga'a 'O jaji rema sasi pasala ḏua tananga ngimo-ngimono gena-ge. 24Re Ma JOU Ma Jou'ongu Madutu ga'a ngene silamo'o re siḏubuso, Unanga gena-ge 'O soma'a ngene wo si'a'a huku-hukumu mo-moini gena-ge la ngene wo sijumu wo silamo'o re mojongo Ma JOU. Na'o so'o gena-ge, ngini ḏuanga i'a ni 'ahu la-la tau-taunu re Unanga ḏuanga i'a 'o saolo ngini ma tero Unanga Ro si'a'a singadolo nange-ne. 25Re ngene ḏuanga i'a wo dadi loasa re banari ra Ma JOU, #6:25 Bolo <<Re ngene ḏuanga i'a wo sisanangi Unanga.>> Ma Jou'ongu Madutu ga'a ngene wo silamo'o re siḏubuso, na'o ngene wo siḏagi tau-taunu huku-hukumu re 'atoranga-'atoranga mo-moini toma parenta rimoi gena-ge ma dara ga'a Unanga gena-ge Ra soma'a ra ngene. > >>
Zur Zeit ausgewählt:
Dadunu 6: SAJ
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
2025 Indonesian Bible Society (LAI)
