Dadunu 5
5
'A Musa 'ai bobita ma soi ḏiḏi
Ma Jou'ongu Madutu 'ai parenta nyagi moi
5:1-22
(Sup. 20:1-17)
1Musa 'o lomu bangsa Israel mo-moini, re 'o kanau ra ananga ma betongo so'o ne: <<Hei ioronongoḏu mo-moini, ni 'isene wangere nange-ne ngoi to singadolo huku-hukumu re 'atoranga-'atoranga ra ngini. Ngini balasu ni madoto'o enanga gena-ge, re balasu na siḏagi tau-taunu.>>
2Toma Kie Sinai, Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'O 'a'a jaji rimoi ra ngene. 3Ma JOU 'o 'a'a jaji gena-ge pa'i tananga ete re dotumu ḇato ua, mada'a ra ngene mo-moini 'ane-ne ga'a wo 'ahu moju wangere nange-ne. 4Ma u'u toma kie ma tubu gena-ge Ma JOU masiretene mau 'o kanau ra ngini. 5Mada'a ma u'u gena-ge 'i si'a'a ngini ni dadi mojongo di'a pere toma kie gena-ge. Dadi, ngoi to made-de'oso ra Ma JOU re ananga manga sigolona di'a to singadolo Ma JOU 'ai 'Idini ra ananga. Re Ma JOU 'o kanau ma betongo so'o ne:
6<<Ngoi nena-ne Ma JOU, Ma Jou'ongu Madutu ga'a ngini ni silamo'o re siḏubuso, Ngoi ga'a sigasa ngini supu toma Mesir, ngi'i ga'a ngini ni dadi budaka.>>
7<< Awa ni silamo'o re siḏubuso jou'ongu ma somoara. Ngini balasu ni silamo'o re siḏubuso pa'i Ngoi ḇato.>>
8<< Awa ni 'a'a dulada di'a ninga diri masiretene ga'a ma duhu 'oru ḇato: bae toma diwanga re toma tana'a ma re'u bolo toma ngoloto ga'a lai ngido ma dara. 9Awa ni mapagara ninga biono toma tana'a toma dulada ma biono di'a na silamo'o re siḏubuso re awa ni siḏagi dulada gena-ge ma mau sababu Ngoi, Ma JOU Ma Jou'ongu Madutu ga'a ngini ni silamo'o re siḏubuso, Ngoi to oḏu'u site-tero reo 'oru ḇato. Ngowa-ngowa'a ga'a 'aḏi silamo'o re siḏubuso dulada, ananga gena-ge 'aḏi emono Ngoi. Dadi ananga ga'a ma rapu gena-ge Ngoi Ta'u sihukumu singadolo manga ju'uda ma soi ro'ange re soi rata. 10Mada'a Ngoi to sijumu 'Ari dadalara ga'a 'i ngali ua toma ju'uda rema cala-cala ga'a dadalara Ngoi re siḏagi 'Ari parenta.>>
11<< Awa ni sabaranga 'Ari lomanga, sababu Ngoi Ma JOU Ma Jou'ongu Madutu ga'a ngini silamo'o re siḏubuso, Ngoi, Ma JOU ḏuanga i'a to sihukumu 'a guna ḇato ga'a sabaranga 'Ari lomanga.>>
12<< Awa ni sidaioranga di'a siwola i'a Sabata ma wangere re silamo'o wangere gena-ge sa'olo wangere ma ngomasa di'a Unanga sababu Ma JOU Ma Jou'ongu Madutu ga'a ngini ni silamo'o re siḏubuso, Unanga 'a parenta ḏua gena-ge ra ngini. 13Ma di'ara wangere rarama, ngini nyengara ni siḏagi ninga munara mo-moini toma 'orasa gena-ge, 14mada'a toma wangere ma soi tumudingi, gena-ge Sabata, wangere ma ngomasa di'a Ma JOU Ma Jou'ongu Madutu ga'a ngini silamo'o re siḏubuso. Toma wangere gena-ge matengo i'a mai ua nyengara 'o munara: bae ngini, bae ninga ngowa'a nau'u re ngowa'a were'a, bae ninga budaka nau'u bolo budaka were'a, bae ninga sapi ma nau'u re keledai bolo haiwani 'oru ḇato, bae ngowa'a tagi-tagi ino ga'a tegoro taninga wala. Ninga budaka bae nau'u bolo were'a balasu 'aḏi mangomasa ma tero ngini ḏi'i. 15'Elingi, ngini ma siḏa ni dadi budaka toma Mesir, re Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'o gasa ngini sisupu Rai kuasa ma pari cua. Sababu gena-ge, Ma JOU, Ma Jou'ongu Madutu ga'a ngini ngini ni silamo'o re siḏubuso, Unanga ro parenta ngini di'a silamo'o Sabata ma wangere.>>
16<< Silamo'o ninga ḇaḇa re ngina sa'olo Ma JOU ro parenta ngini. Unanga gena-ge, Ma Jou'ongu Madutu ga'a ngini ni silamo'o re siḏubuso. Na'o ngini ni 'a'a so'o gena-ge, ngini ḏuanga i'a ni 'ahu la-la re tegoro ti'ara toma daeraha ga'a ti'ara ua Ma JOU 'A pula'a ra ngini. Unanga gena-ge, Ma Jou'ongu Madutu ga'a ngini ni silamo'o re siḏubuso.>>
17<<Awa ni sisengene ngowa'a.>>
18<< Awa ni tinikai toma ngowa'a ma lelegu manga were'a bolo nau'u.>>
19<<Awa ni to-tori'i.>>
20<<Awa ni kanau sa-sakala toma ngowa'a lelegu toma juruhakimi ma biono.>>
21<<Awa ni nyafusu ngowa'a lelegu manga were'a. Re Awa ni nyafusu ngowa'a manga wala, manga guḏa, manga budaka na-nau'u bolo manga budaka we-were'a, manga sapi ma nau'u bolo keledai, bolo 'oru ḇato ga'a ngowa'a lelegu manga 'ori i'a.>>
22<<Demo-demo gena-ge Ma JOU 'ai parenta ga'a 'O pula'a ra ngini toma 'orasa ngini gena-ge mo-moini ni malomu toma kie ma cimi. Toma 'orasa gena-ge, Unanga 'o kanau Rai iḏingi 'a siduga-duga toma u'u re kakamo ga'a kapiringi re Unanga 'o pula'a pa'i parenta-parenta gena-ge ḇato, parenta ma lelegu ua. Ḏua Unanga 'a lefo toma maḏi bela ḏiḏi re 'O pula'a ra ngoi.>>
Ngowa'a Israel 'aḏi mojongo
(Sup. 20:18-21)
5:23-33
23<< 'Orasa ma u'u 'i leja-lejanga lai lamo'o toma kie, ngini ni 'isene iḏingi toma hafu-hafu ma dara ino, dadi suku ma sae'e re bangsa ma bi-biri'i mo-moini, jau-jau ananga gena-ge 'aḏi sapolo ra ngoi, 'a Musa. 24Ananga 'aḏi kanau, <Ma JOU Ma Jou'ongu Madutu ga'a ngene wo silamo'o re siḏubuso, mode-mode'e Unanga Ro sijumu Unanga 'Ai kabasarana re mulia re ngomi mi 'isene Unanga 'o kanau toma u'u ma dara ino. Wangere nange-ne, kalaha Ma Jou'ongu Madutu Ro kanau toma manusia, ngomi rema sakisi mangale manusia nyengara 'aḏi 'ahu moju! 25Mada'a nange-ne, ngomi mi mojongo ḏuanga i'a mi dadi sengene. Sababu na'o Ma JOU, Ma Jou'ongu Madutu ga'a ngomi mi silamo'o re siḏubuso, Unanga gena-ge 'o kanau moju ra ngomi. Tantu ḏua, u'u ma hera-heranga ga'a toma kie gena-ge ḏuanga i'a 'i sirou'u ngomi singadolo mi sengene. 26Sababu matengo i'a mai ua, re soi rimoi mai nyangu, unanga 'o 'ahu moju na'o ro 'isene Ma Jou'ongu Madutu ga'a 'O 'ahu-'ahu Unanga 'o kanau toma u'u ma dara ino; ḏuga-ḏuga ngomi! 27Sababu gena-ge, 'a Musa, ngana no pere sie toma kie gena-ge re no 'isene mo-moini ga'a Ma JOU, Ma Jou'ongu Madutu ga'a ngene silamo'o re siḏubuso, Unanga gena-ge 'O siajele. Gena ḏua, ngana no singadolo mo-moini gena-ge ra ngomi ga'a Unanga 'O siajele ra ngana. Ḏua, ngomi ma 'isene re ma si'a'a.> >>
28<<Wakutu Ma JOU 'o 'isene mo-moini gena-ge, ga'a ngini ni kanau ra ngoi, Unanga gena-ge 'o kanau ra ngoi toma kie gena-ge ma tubu <Ngoi Reta 'isene 'oru ga'a ngowa'a gena-ge 'aḏi kanau, re ananga gena-ge manga demo-demo tero mode'e. 29Nyengara gari'a, ananga manga 'akala re sinyingara so'o gena-ge tau-taunu di'a 'aḏi silamo'o re mojongo Ngoi singadolo 'aḏi mete'e Ngoi 'Ari parenta mo-moini. Na'o so'o gena-ge, ananga remanga ju'uda tala ḏuanga i'a 'aḏi 'ahu la-la re tegoro ti'ara toma daeraha singadolo kasingado-ngadolo i'a! 30Nange-ne no 'uci re soma'a ananga mo-moini <<Maḏibo tamanga suyu'u matengo re matengo.>> 31Mada'a gena ḏua, ngana no maḏibo re tegoro 'ane marimoi ra Ngoi. Ngoi ḏuanga i'a To pula'a 'Ari parenta ti-tiai, gena-ge huku-hukumu re 'atoranga-'atoranga. Sidoto'o gena-ge ra ananga, la ananga ya siḏagi toma nagara ga'a ti'ara ua Ngoi To pula'a ra ananga di'a ḏegoro.> >>
32Dadi 'a Musa 'o kanau toma ngowa-ngowa'a Israel ma betongo so'o ne: <<Ioronongoḏu mo-moini, totoho la-la singadolo ngini ni siḏagi mode-mode'e mo-moini ga'a Ma JOU ro parenta ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso. Parenta-parenta gena-ge rimoi i'a mai ua, awa na siḏagi rapu. 33Ngini ninga 'ahu ma ngo'omo balasu 'i mete'e mo-moini gena-ge ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge Ro parenta ra ngini, la ngini ḏuanga i'a ni 'ahu la-la re ni tegoro ti'ara toma daeraha ga'a ngini ḏuanga i'a na ḏegoro.>>
Zur Zeit ausgewählt:
Dadunu 5: SAJ
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
2025 Indonesian Bible Society (LAI)