التكوين 19
19
خراب مدينتين سدوم و عموره
1و جو الملاكين إلى مدينة سدوم في حزة المغرب، و كان لوط قاعد عند باب المدینة. یوم شافهم قام یستقبلهم، وسجد على الأرض، 2و قال: «أسمعوا یا سادتي، تعالوا عندي في البیت، بیت خادمكم و ناموا عندي الليلة و غسلوا رجایلكم و قعدوا الصَّباح بدّري و توكلوا على ﷲ في الصبح و كمّلوا طریقكم.» وقالوا الملاكین: «لا بنّام في منطقة داخل المدینة.» 3قام لوط أصرّ علیهم لین ما راحوا إیاه و دخلوا بیته. و قام سوّى ليهم ولیمة، و خبز بدون خمیرة و أكلوا. 4وقبل ما یجي وقت النوم، جو كل رجال مدینة سدوم، كبارهم و صغارهم و حوّطوا البیت، 5و عیطوا على لوط وقالوا: «وینهم هالرجالین الا جو عندك اللیلة؟ تطلعهم لينا عشان نبغى ننام ويّاهم.» 6قام لوط طلع ليهم، و سكر الباب وراه، 7و قال ليهم: لا بعد ما یصیر چدي یا جماعة، تسوّوا هالمصیبة. 8تسمعوا، أنا عندي بنات ثنتین عدارى، باطلعهم ليكم و سوّوا فیهم الا تبغوا، لكن هالرجالین ما بخلیكم تسوّوا ليهم شي لأنهم ضیوف في بیتي. 9و رجال مدینة سدوم قالوا: «تروح بس روح» بعدین قالوا بینهم و بین بعض هالكلام عن لوط: «هالرجال أجنبي متغرب عندنا و جاي یبغى یتحكم فینا بعد. رجعوا یكلموا لوط بعصبیة الحین بنسوي فیك أعظمّ من هالرجالین الا ويّاك.» وقاموا إنهدوا على لوط و قربوا یكسروا الباب. 10و بعدین قاموا الرجالین ضیوف لوط مدوا إیاديهم من داخل و سحبوا لوط و دخلوه داخل البیت و سكروا الباب. 11و قاموا الملاكین الا على هیئة رجال عموا عیون الجماعة إلا عند الباب، صغیرهم و كبیرهم و تعبوا و هم یحاولوا یحصلوا الباب.
12و قالوا الملاكين للوط: «عندك نسايب هني في هالمدينة؟ اي أحد ينسب لك مثلا أولادك، أزواج بناتك أو بناتك، اي أحد یقرب لك؟ إدا عندك نسایب، طلعهم لينا، 13لأنا بندمر هالمكان. لأن صوت الإستغاثة بسِبّة هالمكان وصل حده عند ﷲ، و رسلنا ﷲ عشان ندمره.» 14قام راح لوط و قال لأزواج بناته: «یلا بسرعة إطلعوا من هالمكان، لأن ﷲ بيدمر هالمدینة.» و هم فكروه یتمسخر. 15و یوم جا الصبح، قاموا الملاكین یلحوا على لوط و يقولوا له: یلا أسرع خد زوجتك و بناتك الثنتين و اطلع عشان لا تنهلكوا إدا دمر ﷲ هالمدينة. 16و یوم الملاكین شافوا ان لوط تبیرد یطلعهم قاموا مسكوا إیده و اید زوجته و بناته الثنتین لأن ﷲ رحمهم، و طلعهم برا المدینة. 17و یوم اخدوهم بعید، قال لیهم واحد من الملاكین: «انجوا بعمركم ولا تطّلعوا وراكم ولا توقفوا في منطقة السهل بكبرها، روحوا عند الجبل عشان لا تروحوا فیها.» 18و قال له لوط: «لا یا سید، 19هدانا لقیت نعمة في عیونك، و عشان عهد الخیر الا بینا و لطفت بي و نقدت حیاتي. مانا رایح للجبل اخاف یصیر فیني شي و أموت وانا رایح.» 20«شوف هالمدينة القريبة اقدر اركض و اروح هناك. هدیها المدینة صغیرة و اقدر أفلح و اروح هناك و انجو بعمري.» 21و قال له الملاك: «تیلا روح، أنا وافقت على طلبك. أجل ما بدمر هالمدينة، عشانك بس. 22روح هج بعمرك هناك لأنّي ما بقدر اسوي ولا شي من الا جیت عشان اسویه الا لما توصل هناك سالم.» و عشان چدي صار إسم المدینة صوغر، بما معناه (صغیرة). 23و یوم شرقت الشمس على الأرض الا لوط داخل مدينة صوغر، 24ونزل ﷲ مطر من كبریت ونار على سدوم و عمورة من عنده من السماء. 25و دمر المدن والسهل المحوط بها و كل الساكنين فيها و كل نباتات الأرض. 26و زوجة لوط و قامت دارت وطلعت وراها و على طول صارت عمود ملح. 27وفي نفس الیوّم، إبراهیم راح الصبح بدّري إلى نفس المكان الا وقف فیه قدام ﷲ الحَيّ زي المرّة الا راحت. 28و طلعّ جهة سدوم و عمورة و عند جهة السهل، و شاف دخان يطلع منها زي التنور. 29و هدا الا صار، یوم ﷲ دمر المدن إلا في السهل، و ﷲ تدكر وعده لإبراهيم یوم توسل له إنه ما یدمر سدوم و عمورة، عشان چدي أنقد لوط من مكان الكارثة، وطلع من المدن المدمرة إلا كان عایش فیها. 30و بعد ما صار الا صار، طلع لوط و بناته الثنتین من صوغر، و استقروا في الجبل، لأنهم خافوا یسكنوا في صوغر. و عاشوا هو و بناته في كهف. 31قامت الكبيرة قالت لاختها الصغيرة: أبونا اكو عجّز و ما في رجال حوالینا یتزوجونا زي باقي الناس، 32خلنا نعطیه خمر و ننام إیاه عشان لا تنقطع دریة أبونا. 33قاموا خلو أبوهم یشرب خمر دیك اللیلة، و قامت الكبيرة نامت ويّا أبوها و أبوها ولا درى بنومتها إیاه و لا حس بقومتها. 34وفي اليوم الثاني قالت الكبیرة لاختها الصغيرة: إني نمت ويّا أبوي البارحة، تعالي نعطیه خمر اللیلة بعد و روحي نامي إیاه و نجیب من أبونا أولاد ولا ینقطع نسلنا. 35و سقوا أبوهم خمر هدیك اللیلة بعد و قامت البنت الصغیرة نامت ويّا أبوها، و هو لا درى بنومتها إیاه و لا حس بقومتها. 36وجدي ثنیتنهم حملوا من أبوهم. 37الكبیرة جابت ولد و سمّته «موآب» و معناه «من الاب،» وهو أبو الموآب إلى هالیوم. 38والصغيرة جابت ولد و سمّته «بن عمي» و معناه «ولد قومي» و هو أبو بني عمون إلى هالیوم.
Zur Zeit ausgewählt:
التكوين 19: QNAV
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Qatifi New Arabic Version © 2024 Strategic Resource Group
