Kisah Para Rasul 26
26
Paulus nafdiat i a na rai Agripa sounlury
26:1-11
1 Rai Agripa nfalak ber Paulus, “Lere ye let ber ko ma mufdiat ko.” Mpe Paulus a nlobik limany ma nose ma natanuk betno nfalak, 2“Rai Agripa, yakw kswenang resi fali lere ye bise ma kufdiat yakw na soumlury, la kbwali safe-safe monuk ma tomwat Yahudyar rfalak la rsoi yakw ne. 3Ma ktwafal ma kswenang a nbal fali amangw nafai resi na Yahudyar nir adat, ma nir ngriar ma biase rabangal sir a na. Mpe ktwak ma mdwengar fen ngamone safe ma kfwalak ye.
4Tomwat Yahudyar monuk rafai ningw momorip, fali ningw ngarufuky e, kmworip kor sir na Yerusalem. 5Sir rafai yakw dodo lo, mpa farlan rmpeang e, bise ma rasaur na yakw feti yakw ye tomwat Farisyar sa ma klwarat desar mamy agame ni yayatur mabertar.#Kis. 23:6; Flp. 3:5 6Ma lere ye kumin ye ma rtetak ningw ngrie, fali kulele feti keta Ratu nafdiat safe ma nyoding ber nusmyamar. 7Mpe mamy nuse buti resin du a na Israel dedesar ma ralele safe ma Ratu nyoding a ne nbal, nwayat ma lere nronram e, rsampayang ber Ratu. O rai Agripa, tomwat Yahudyar rfasale yakw fali kulele safe ma Ratu nyoding a ne. 8Waingw Yahudyar a kmi, safema to milele feti Ratu nafmorip a nbali mangmwate? 9Luryain e, yakw kdwaun feti farlan kose safe-safe motak la kose yatak tomwatar ma ralele Yesus ma nof Nasaret a ne, iane nangafel.#Kis. 8:3; 22:4-5 10Mpe kose farane nbal na Yerusalem fali mangsomp ulnir ral surat kuase ber yakw ma komat tomwatar yadin ma ralele Yesus far sel. Ma kyoding a nbal ma ral tetetak mamate ber sir. 11Na das sampangar e, lain yadin ma kswiksa sir ma kureke ma ramsoal safe ma ralele ne. Ma dalangw maninik desar mpa kunriak kureke sir terik kotar na yampren walyetar.”
Paulus nasaur felan farpe ma nalele Yesus
26:12-18
12“Iane nwayat ma ktwi kote Damsyik ma konr surat kuase nof mangsompar ulnir nema bise ma kukun tomwatar ma ralele Yesus na iano.” 13Rai Agripa, noak ma lere nfat langit e, yakw lolone dalamtene let, metryat e, kswalan snyain ma idak resi nlengan nof lere, ntompur nof langit nbebar yakw numur tomwatar ma maktem a mpan a ne. 14Ne kam mfufw monuk. Ma kdwengar liliri ma nfalak nor Ibrani liriny la nfalak ber yakw farye, “Saulus, Saulus! Safema mtwean Yakw? Ko mose suse mbwali ko, fali ma mswiksa I a ne ko nim Mangnrur Silai.” 15Ne kfwalak, “Mangnrur Silai, ise ko?” Ne Mangnrur Silai nfalak, “Yakw ye Yesus ma mtwean Yakw ne.” 16Mpa mumdir! Kufbwotin Yakw ber ko fali kfwil ko ma mweluk mangkaryae. Ma ka mufwibar na kabanir monuk ma mswalan lere ye, ma na kabanir ma keta kuftutu ber ko. 17Keta kujake ko kof tomwat Yahudyar ma kof tomwatar ma to Yahudi sir. Ma keta kswiduk ko ber tomwatar ma to Yahudi sir a ne. 18Ma mose ma rakeban nema bise ma rbie rof makrokap ma rti ngaodir, ma rbie rof smwangat yatkar nir ulun ni kuase ma rbali sir ber Ratu. “Mpe farlan ralele Yakw keta klwure nir salar ma reluk Ratu Ni tomwatar.”
Paulus nfalyole feti felan farpe ma nafwibar Ibar Ngamone
26:19-23
19“Mpe rai Agripa, klwarat dedesar safe ma Yesus nfalak ber yakw noak ma nafbotin I nof surga. 20Luryain e, kufwibar ber tomwat Yahudyar na Damsyik, ma Yerusalem ma propinsi Yudea ni kateman, numur a nbal ber tomwat walyetar. Mpe kufwibar ber sir feti ka rtate nir salar ma ralele Ratu, ma rose lan kabain ngamonar la rfatutu feti rtate nir salar lo.#Kis. 9:20; 28:29 21Iane nwayat ma tomwat Yahudyar a romat yakw na Ratu Ni das silai ma rareke ma rfen yakw. 22Nempa Ratu najake yakw mpa lolone kmworip terik lere ye, ma bise ma kumdir ye ma kufwibar ber tomwat silayar ma tomwat marumtar. Ma safe ma kfwalak ye feleles far ma nabyar ma Musa rfalak lo. 23Iane feti Ray Silai ka nkoman suse, ma keta I nmorip baluan nof mangmwatar. Nema keta I nonry ngaodir ber tomwat Yahudyar ma tomwatar ma to Yahudi sir.”#Yes. 42:6; 49:6; 1Kor. 15:20
Paulus nfalak ber rai Agripa ma nalele Yesus
26:24-32
24Paulus lolone natanuk ma nafdiat i e, Festus nafwayak, “Hei Paulus ko mfukat, nim anfai nres mpa mfukat lo!” 25Nempa Paulus a nfalak, “Amangw Festus, to kfwukat! Ma safe ma kfwalak ye botuan ma ningw andaun lolone nangafel. 26Yakw kufai feti rai Agripa nafai ngriar monuk ma kfwalak ye lo fali to ngrie fen lese ma rfalak ramudim. Iane nwayat ma kbwaran ma kfwalak safe-safe monuk ber i. 27Rai Agripa, yakw kufai feti ko mulele safe ma nabyar a rfalak a ne nre!” 28Ne rai Agripa nfalak, “Mufliak feti nim tnyangkwar a ne rose ma kusnyalik ma kulele Yesus e?” 29Ne Paulus a nfalak, “Keta kswampayang ber Ratu, nema manrilak nre mangonim e, to lan ko nempa tomwatar monuk ma rdengar ma kutanuk ye bise ma ralele Yesus ma kete reluk napi far yakw ye.” 30Mpene rai ma gubernur ma Bernike numur tomwatar monuk ma ramtoran ror sir, ramdir ma rti burit. 31Lama rti burit e, rafalak ber sir feti, “Tomwate ne to nose ngrisasaf ma bertyan nor tetetak mamate nre tal i far sel.” 32Ne rai Agripa nfalak ber Festus, “Farlan tomwate ye to naloran ni ngrie ye ber Kaisar e, ni botuan e, lere ye nbie nof sel e lo.”
Zur Zeit ausgewählt:
Kisah Para Rasul 26: YMD
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
