Kisah Para Rasul 25
25
Gubernur Festus nsidang Paulus na tomwat Yahudyar sonirlury
25:1-12
1Lama Festus nait propinsi Yudea, ni lerar tel e, i nof kote Kaisarea ma kote Yerusalem. 2Na iano mangsompar ulnir ma mangfaret Yahudyar rti rmangadu Paulus ber Festus. 3Ma rtak Festus ma ntulung sir, nema nluan ma ror Paulus far Yerusalem. Fali rfat lo ma rfen i a na dalamtene let. 4Nempa Festus nfalak, “Paulus lolone namin sel a na Kaisarea, mpa kusnyalik ma kbwali yakw far iano. 5Mpa ni ngafele e, msyiduk tomwat silayar ketnir rof a kmi ma ror yakw ma mti Kaisarea. Ma farlan botuan feti i nose salar sa, ka myangadu i na iano.”
6Festus namin Yerusalem fafa lerar wal terik lere buti, betno nbali i far Kaisarea. Ni bobole ne Festus nafburat mangtetkar ma rsidang Paulus, mpe nluan ma ror i far ain sidang a ne. 7Lama Paulus nait e, tomwat Yahudyar ma rof Yerusalem ramdir a rkolu i, betno rfalak ni sal mabertar la rsoi i. Nempa to nir sasaf la rafdiat safe ma rsoi na i a ne. 8Ma Paulus nafdiat i ma nfalak, “Yakw to kose sal sasaf. To klwangas Musa ni tetetkar nre Kaisar Roma ni faretar ma to kufaknise nbal Ratu Ni Das silai.” 9Nempa Festus nose ma nalonge tomwat Yahudyar dalmir, mpa nenrat Paulus, “Mpweang ma mtwi Yerusalem e, nema kswidang nim ngriar na iano?” 10Ne Paulus a nfalak, “Amangw, ko mufai feti yakw to ningw sal sasaf ber tomwat Yahudyar. Ma lere ye rsidang yakw rlarat Kaisar Roma ni tetetkar, mpa ka mtwetak ningw ngrie na ye nbal. 11Ma farlan botuan feti kose salar sa ma bertyan nor tetetak mamate e, yakw knwengar motak ma mfyen yakw. Nempa farlan safe ma rfalak la rsoi yakw ne to botuan, to tomwate fen lese ma bise nanrenre yakw ber tomwat Yahudyar. Mpa ktwak ma Kaisar a ntetak ningw ngrie ye.” 12Lama Festus nor ni mangsnyurtar raale monuk andaun e, i nfalak, “Ko muloran nim a ngrie ti nait Kaisar, mpa ka mtwi mukmat Kaisar.”
Festus nluan Paulus ma nbali Agripa ma Bernike
25:13-27
13Lerar fir a rsak e, rai Agripa radu Bernike#25:13 Bernike ye rai Agripa urany. Ma rai Agripa ye Herodes Agripa anaky. Agripa ye i nfarete na propinsi Abilene, Galilea, Iturea, ma Trakhonitis. rti Kaisarea ma rose salam ber Festus. 14Lama ramin iane lerar fir a ne, Festus nfalyole Paulus ni ngrie ber rai Agripa, “Noak ma Feliks nose gubernur a na ye, i nau tomwatar sa na sel. 15Noak ma yakw kumin Yerusalem, mangsompar ulnir numur mangfaret Yahudyar rti rmangadu tomwate ne ber yakw, ma rtak nema kukun i. 16Nempa kfwalak ber sir feti tomwat Roma to biase ma ranrenre tomwatar sa ma rfasale i ma rukun i farane motak. Nempa ka ral let ber i a fuky la nafdiat i a na tomwatar ma rsoi i a ne sonirlury. 17Mpe maktem a ma ye. Ma ni bobole ne klwuan ma ror Paulus a nma ma ktwetak desar ni ngrie ne. 18Ne tomwatar monuk ma rose ngrie ror Paulus a ne ramdir ma rsoi i. Ma kufliak feti keta rfalak tomwate ye ni adat yatkar far ma kdwaun, safo tate. 19Sir rabangal na lan nir ngriagamar, ma na tomwat sa ngarany Yesus. Tomwate ne nmat lo nempa Paulus namkoran ma nfalak feti nmorip a nbali lo. 20Ma yakw to kufai feti kurus ngrie farpe, mpe kwenrat i feti mpweang ma mtwi Yerusalem e, nema rsidang nim ngrie na iano. 21Nempa Paulus ntak ma naloran ni ngrie ber Kaisar ma ntak a nbal ma namin sel terik ma Kaisar a ntetak ni ngrie ne. Mpa ktwayan i terik ma letyar sa betno kunrenre i ber Kaisar.” 22Ne rai Agripa nfalak ber Festus, “Yakw kmpweang ma kdwengar tomwate ne ma natanuk.” Ne Festus a nfalak, “Bobole la mdwengar i ma natanuk.”
23Ni bobole e, rai Agripa radu Bernike rma. Noak ma rti sidang dalam e, sir rfonak rayar nir rabtyar ma tomwatar ramdir ma rose alang ber sir. Sir raktem suldadwar ulnir ma tomwat silayar na kote ne rti ain sidang, betno Festus nluan ma ror Paulus far dalam. 24Ne Festus a nfalak, “Rai Agripa ma ninr kateman ma tamin ye. No msyalan tomwate ye! Tomwat Yahudyar monuk ma ramin ye ma na Yerusalem rmangadu i ber yakw lo. Sir rma rakmat yakw ma rafwayak dedesar feti kete mwinrang ma nmorip.” 25Nempa to ktwungan ni sale ma bertyan nor tetetak mamate. Ma i ntak ma naloran ni ngrie ye far Kaisar, mpa ktwetak ma ror i ber Kaisar. 26Nempa to kufai feti kfwalyole farpe ber Kaisar mpa kor i ber mir kateman na ye, ma nlengan desar e, ber rai Agripa ko ma mwenrat i na ni ngrie ne, nema bise ma kurengi kabar sa ber Kaisar. 27Fali kdwaun feti, tor tomwate ti motak e, to diat. Nempa ka tarengi ni sale nbal na surat dalam nema ror i numur surat a ne ber Kaisar.
Zur Zeit ausgewählt:
Kisah Para Rasul 25: YMD
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
